ನ್ಯೂಜಿಲೆಂಡ್ ನಲ್ಲಿ ಕರಾಳ ಶುಕ್ರವಾರ : ಮಸೀದಿಯಲ್ಲಿ ರಕ್ತದೋಕುಳಿ

ಕ್ರೈಸ್ಟ್ ಚರ್ಚ್, ಮಾರ್ಚ್ 15 : ತನ್ನನ್ನು ತಾನು 'ಹೋರಾಟಗಾರ' ಎಂದು ಕರೆದುಕೊಂಡಿರುವ ಕೊಲೆಗಾರ, ನ್ಯೂಜಿಲೆಂಡ್ ನಲ್ಲಿ ಮಷೀನ್ ಗನ್ ಬಳಸಿ, ಶುಕ್ರವಾರ ಮಸೀದಿಗೆ ಪ್ರಾರ್ಥನೆಗೆಂದು ಬಂದಿದ್ದ ಇಪ್ಪತ್ತೈದಕ್ಕೂ ಹೆಚ್ಚು ಜನರನ್ನು ನಿರ್ದಯವಾಗಿ ಹತ್ಯೆಗೈದಿದ್ದಾನೆ.

ಡೀನ್ಸ್ ಅವೆನ್ಯೂನಲ್ಲಿರುವ ಅಲ್ ನೂರ್ ಮಸೀಗೆಯೊಳಗೆ ಹೊಕ್ಕ ಹತ್ಯೆಗಾರ ಮನಬಂದಂತೆ ಗುಂಡು ಹಾರಿಸಿದ್ದಾನೆ. ಪ್ರಾಣ ಉಳಿಸಿಕೊಳ್ಳಲು ಮಲಗಿದವರನ್ನೂ ಬಿಟ್ಟಿಲ್ಲ ಮತ್ತು ಓಡಲು ಯತ್ನಿಸಿದವರನ್ನು ಕೂಡ ಹತ್ಯೆ ಮಾಡಿದ್ದಾನೆ. ಹತ್ಯೆಯಾದವರ ಸಂಖ್ಯೆ ನಿಖರವಾಗಿ ತಿಳಿದಿಲ್ಲವಾದರೂ ಕನಿಷ್ಠ ಇಪ್ಪತ್ತೈದು ಜನರು ಸತ್ತಿರಬಹುದು ಎಂದು ಅಂದಾಜು ಮಾಡಲಾಗಿದೆ.

ಪ್ರತ್ಯಕ್ಷದರ್ಶಿಯೊಬ್ಬರ ಪ್ರಕಾರ, ಅವರಿಗೆ ಗುಂಡುಗಳ ಮೊರೆತ ಕೇಳಿಬಂದಿದೆ. ಸ್ವಲ್ಪ ಹೊತ್ತಿನಲ್ಲಿ ಹೋಗಿ ನೋಡುವಷ್ಟರಲ್ಲಿ ಅವರ ಪತ್ನಿಯೇ ಹತ್ಯೆಯಾಗಿ ರಕ್ತದ ಮಡುವಿನಲ್ಲಿ ಬಿದ್ದಿದ್ದರು. ಈ ಹಿನ್ನೆಲೆಯಲ್ಲಿ, ನ್ಯೂಜಿಲೆಂಡ್ ನಲ್ಲಿರುವ ಎಲ್ಲ ಮಸೀದಿಗಳನ್ನು ಬಂದ್ ಮಾಡಲು ಹೇಳಲಾಗಿದೆ ಮತ್ತು ಯಾರೂ ಮಸೀದಿಗೆ ಹೋಗಬಾರದೆಂದು ಆದೇಶಿಸಲಾಗಿದೆ.

ನ್ಯೂಜಿಲೆಂಡ್ ನ ಪ್ರಧಾನಿ ಜಸಿಂಡಾ ಅರ್ಡರ್ನ್ ಅವರು, ಇದು ನ್ಯೂಜಿಲೆಂಡ್ ಪಾಲಿಗೆ ಅತ್ಯಂತ ಕರಾಳ ದಿನ. ಹಿಂದೆಂದೂ ನಡೆದಿರದಂಥ ಭೀಕರ ಹಿಂಸಾಕೃತ್ಯ ಜರುಗಿಹೋಗಿದೆ. ಪೊಲೀಸರು ಹತ್ಯೆ ಮಾಡಿದವನನ್ನು ಬಂಧಿಸಿದ್ದಾರೆ. ಹತ್ಯೆಯಾದ ಹೆಚ್ಚಿನವರು ಹೊರದೇಶದಿಂದ ಬಂದವರು ಇರಬಹುದು ಎಂದು ಹೇಳಿಕೆ ನೀಡಿದ್ದಾರೆ.

What has happened in Christchurch is an extraordinary act of unprecedented violence. It has no place in New Zealand. Many of those affected will be members of our migrant communities – New Zealand is their home – they are us.

— Jacinda Ardern (@jacindaardern) March 15, 2019

ಹೀನ ಕೃತ್ಯವೆಸಗಿದ ಇಂಥ ವ್ಯಕ್ತಿಗಳಿಗೆ ನ್ಯೂಜಿಲೆಂಡ್ ನಲ್ಲಿ ಸ್ಥಳವಿಲ್ಲ. ಕ್ರೈಸ್ಟ್ ಚರ್ಚ್ ನಲ್ಲಿರುವವರು ಮನೆಯಿಂದ ಹೊರಬರಬಾರದು ಮತ್ತು ನ್ಯೂಜಿಲೆಂಡ್ ಪೊಲೀಸರ ಆದೇಶವನ್ನು ಕಟ್ಟುನಿಟ್ಟಾಗಿ ಪಾಲಿಸಿ. ಸದ್ಯದಲ್ಲೇ ಪೊಲೀಸ್ ಆಯುಕ್ತರು ಹೇಳಿಕೆ ನೀಡಲಿದ್ದಾರೆ. ಇಂದು ಸಂಜೆ ನಾನು ಮತ್ತಷ್ಟು ಮಾಹಿತಿ ನೀಡಲಿದ್ದೇನೆ ಎಂದು ಜಸಿಂಡಾ ಅರ್ಡರ್ನ್ ಅವರು ಟ್ವೀಟ್ ಮಾಡಿದ್ದಾರೆ.

The person who has committed this violent act has no place here. To those in Christchurch; I encourage you to stay inside and follow the instructions of @nzpolice. The Police Commissioner will be making a public statement at 5pm. I will update everyone again later this evening.

— Jacinda Ardern (@jacindaardern) March 15, 2019

ಕಪ್ಪು ಬಟ್ಟೆ ಮತ್ತು ಹೆಲ್ಮೆಟ್ ಧರಿಸಿದ ಕೊಲೆಗಡುಕ, ಮಸೀದಿಯ ಹಿಂಬಾಲಿನಿಂದ ಬಂದು ಆಟೋಮ್ಯಾಟಿಕ್ ಮಷೀನ್ ಗನ್ ಬಳಸಿ ಹದಿನೈದು ನಿಮಿಷಗಳ ಕಾಲ ಗುಂಡಿನ ಸುರಿಮಳೆಗೈದಿದ್ದಾನೆ. ಆತ ಯಾರು, ಯಾಕೆ ಈ ರೀತಿ ಹತ್ಯೆ ಮಾಡಿದ್ದಾನೆ ಎಂಬುದರ ಮಾಹಿತಿ ಇನ್ನೂ ಬರಬೇಕಿದೆ. ಆದರೆ, ಈ ಮಾರಣಹೋಮದಿಂದ ನ್ಯೂಜಿಲೆಂಡ್ ತತ್ತರಿಸಿಹೋಗಿದೆ.

ಇದು ಒಂದು ಮಸೀದಿಯಲ್ಲಿ ಮಾತ್ರವಲ್ಲ ಎರಡು ಕಡೆಗಳಲ್ಲಿ ನಡೆದಿದೆ ಎಂದು ಕ್ರೈಸ್ಟ್ ಚರ್ಚ್ ಪೊಲೀಸರು ತಿಳಿಸಿದ್ದಾರೆ. ಯಾರೂ ಮಸೀದಿಗೆ ಹೋಗುವ ಸಾಹಸ ಮಾಡಬಾರದು. ರಸ್ತೆಯಲ್ಲಿ ಸಂಚರಿಸಬಾರದು ಮತ್ತು ಸಂಶಯಾತ್ಮಕ ವ್ಯಕ್ತಿಗಳು ಕಂಡುಬಂದರೆ ಮಾಹಿತಿ ನೀಡಬೇಕು ಎಂದು ಆದೇಶಿಸಿದ್ದಾರೆ. ನಗರದಲ್ಲಿರುವ ಎಲ್ಲ ಶಾಲೆಗಳು ಕೂಡ ಬಂದ್ ಆಗಿವೆ.

English summary

Black Friday in Christchurch, New Zealand on 15th March : Bloodbath in Mosque. More than two dozen worshippers have been killed in one of the worst shoot out.