80 ವರ್ಷಗಳ ಹಿಂದೆ ಭೂಮಿಯಲ್ಲಿ ಹೂತಿಟ್ಟಿದ್ದ ನಿಧಿ ಪತ್ತೆ; ಇಡೀ ಕುಟುಂಬದ ಹಣೆಬರಹವನ್ನೇ ಬದಲಿಸಿತು ತಂದೆ ಕೊಟ್ಟ ಆ ಸುಳಿವು
ಯುರೋಪಿನ ಇತಿಹಾಸದಲ್ಲೇ ಅತ್ಯಂತ ಕರಾಳ ಹಾಗೂ ಯುದ್ಧದ ಭೀತಿಯ ದಿನಗಳಲ್ಲಿ ಬಚ್ಚಿಡಲಾಗಿದ್ದ ಕುಟುಂಬವೊಂದರ ಆಸ್ತಿ, ಕೇವಲ ಒಂದು ಕೈನಕ್ಷೆಯ (Hand-drawn Map) ಸಹಾಯದಿಂದ ಬರೋಬ್ಬರಿ 80 ವರ್ಷಗಳ ಬಳಿಕ ಪತ್ತೆಯಾಗಿದೆ. ತಲೆಮಾರುಗಳಿಂದ ಕೇವಲ ಕಥೆಯಾಗಿ ಉಳಿದಿದ್ದ ಈ ಸಂಗತಿ, ದಶಕಗಳ ಸುದೀರ್ಘ ಹುಡುಕಾಟದ ನಂತರ ಈಗ ನಿಜವಾಗಿದೆ. ದ್ವಿತೀಯ ಮಹಾಯುದ್ಧದ ಸಮಯದಲ್ಲಿ ರಕ್ಷಣೆಗಾಗಿ ಭೂಮಿಯಡಿಯಲ್ಲಿ ಹೂತಿಟ್ಟಿದ್ದ ಬೆಳ್ಳಿ, ಆಭರಣಗಳು ಹಾಗೂ ನೆನಪಿನ ವಸ್ತುಗಳು ಬೆಳಕಿಗೆ ಬಂದಿವೆ.
'ದಿ ಸನ್' ಪತ್ರಿಕೆಯ ವರದಿಯ ಪ್ರಕಾರ, ಜಾನ್ ಗ್ಲಾಜೆವ್ಸ್ಕಿ (Jan Glazewski) ಎಂಬುವವರು ತಮ್ಮ ತಂದೆಗೆ ನೀಡಿದ್ದ ಭರವಸೆಯನ್ನು ಈಡೇರಿಸಲು ವರ್ಷಗಟ್ಟಲೆ ಶ್ರಮಿಸಿ ಈ ನಿಧಿಯನ್ನು ಪತ್ತೆಹಚ್ಚಿದ್ದಾರೆ. ಈ ಇಡೀ ಕಥೆಯು ಅಂದಿನ ಪೂರ್ವ ಪೋಲೆಂಡ್ನಲ್ಲಿದ್ದ (ಪ್ರಸ್ತುತ ಉಕ್ರೇನ್ ದೇಶಕ್ಕೆ ಸೇರಿದ ಭಾಗ) ಗ್ಲಾಜೆವ್ಸ್ಕಿ ಕುಟುಂಬದ ಹಳೆಯ ಎಸ್ಟೇಟ್ ಸುತ್ತ ಸುತ್ತುತ್ತದೆ.
ಮಹಾಯುದ್ಧದ ಸಮಯದಲ್ಲಿ ನಿಧಿ ಅಡಗಿಸಿದ್ದು ಹೇಗೆ?
ಈ ಕಥೆ ಆರಂಭವಾಗುವುದು 1939ರ ಸೆಪ್ಟೆಂಬರ್ನಲ್ಲಿ. ಇಡೀ ಯುರೋಪಿನಲ್ಲಿ ದ್ವಿತೀಯ ಮಹಾಯುದ್ಧದ ಕಿಡಿ ಹೊತ್ತಿಕೊಂಡಿತ್ತು. ಸೋವಿಯತ್ ರಷ್ಯಾದ ಸೈನಿಕರು ತಮ್ಮ ಎಸ್ಟೇಟ್ ಕಡೆಗೆ ಮುನ್ನುಗ್ಗಿ ಬರುತ್ತಿರುವುದನ್ನು ಅರಿತ ಗ್ಲಾಜೆವ್ಸ್ಕಿ ಕುಟುಂಬದ ಸದಸ್ಯರು, ತಮ್ಮಲ್ಲಿದ್ದ ಬೆಲೆಬಾಳುವ ಆಭರಣಗಳು, ಬೆಳ್ಳಿಯ ಪಾತ್ರೆಗಳು ಹಾಗೂ ಕೌಟುಂಬಿಕ ಪರಂಪರೆಯ ವಸ್ತುಗಳನ್ನು ಒಂದು ಕಡೆ ಒಟ್ಟುಗೂಡಿಸಿದರು. ಶತ್ರುಗಳ ಕೈಗೆ ಸಿಗದಂತೆ ಅವುಗಳನ್ನು ಭೂಮಿಯಡಿ ಸುರಕ್ಷಿತವಾಗಿ ಬಚ್ಚಿಟ್ಟು, ಪ್ರಾಣ ಉಳಿಸಿಕೊಳ್ಳಲು ಅಲ್ಲಿಂದ ಪಲಾಯನ ಮಾಡಿದರು. ಪರಿಸ್ಥಿತಿ ತಿಳಿಯಾದ ಮೇಲೆ ವಾಪಸ್ ಬಂದು ಇದನ್ನು ತೆಗೆದುಕೊಂಡು ಹೋಗುವುದು ಅವರ ಪ್ಲ್ಯಾನ್ ಆಗಿತ್ತು.
ಆದರೆ ವಿಧಿಯ ಆಟವೇ ಬೇರೆಯಾಗಿತ್ತು. ಕುಟುಂಬದ ಮುಖ್ಯಸ್ಥ ಆಡಮ್ ಗ್ಲಾಜೆವ್ಸ್ಕಿ ಮಾತ್ರ ಮನೆಯಲ್ಲೇ ಉಳಿದುಕೊಂಡರೆ, ಉಳಿದವರು ಬೇರೆ ದೇಶಗಳಿಗೆ ಓಡಿಹೋದರು. ಆಸ್ತಿ ಬೇರೆಯವರ ಪಾಲಾಯಿತು. ಆಡಮ್ ಅವರ ಗಂಡುಮಕ್ಕಳು ತಮ್ಮ ತಾಯ್ನಾಡಿನಿಂದ ದೂರದ ದೇಶಗಳಲ್ಲಿ ಹೊಸ ಬದುಕನ್ನು ಕಟ್ಟಿಕೊಂಡರು. ಅವರ ಬಳಿ ಉಳಿದಿದ್ದು ಕೇವಲ ಹಳೆಯ ನೆನಪುಗಳು ಮಾತ್ರ. ಕಾಲಕ್ರಮೇಣ ಭೂಮಿಯಡಿ ಬಚ್ಚಿಟ್ಟ ಬೆಳ್ಳಿ-ಬಂಗಾರದ ಕಥೆಗಳು ಕೇವಲ ಕೌಟುಂಬಿಕ ಹರಟೆಯ ವಿಷಯಗಳಾಗಿಯೇ ಉಳಿದವು. ಆ ವಸ್ತುಗಳು ಇನ್ನೂ ಅಲ್ಲಿಯೇ ಇವೆಯೋ ಅಥವಾ ಯಾರಾದರೂ ಕದ್ದಿದ್ದಾರೋ ಎಂಬುದು ಯಾರಿಗೂ ತಿಳಿದಿರಲಿಲ್ಲ.
ನಿಧಿಯ ಹಾದಿ ತೋರಿಸಿದ ತಂದೆಯ ಕೈನಕ್ಷೆ
ವರ್ಷಗಳು ಉರುಳಿದವು, ಜಾನ್ ಅವರ ತಂದೆ ಗುಸ್ತಾವ್ (Gustaw) 1989ರಲ್ಲಿ. ಅಂದರೆ ಘಟನೆ ನಡೆದ ಅರ್ಧ ಶತಮಾನದ ನಂತರ, ಕೇವಲ ತಮ್ಮ ಹಳೆಯ ನೆನಪಿನ ಆಧಾರದ ಮೇಲೆ ಆ ನಿಧಿ ಇರುವ ಜಾಗದ ಒಂದು ಕರಡು ನಕ್ಷೆಯನ್ನು ಬಿಡಿಸಿದರು. ಅಲ್ಲಿನ ಹಳೆಯ ಕಟ್ಟಡಗಳು ನಾಶವಾಗಿದ್ದವು, ರಸ್ತೆಗಳು ಕಣ್ಮರೆಯಾಗಿದ್ದವು ಮತ್ತು ಕಾಡು ಬೆಳೆದಿತ್ತು. ಆದರೂ ಗುಸ್ತಾವ್ ಅವರು ಭವಿಷ್ಯದಲ್ಲಿ ತಮ್ಮ ಮಕ್ಕಳಿಗೆ ಸಹಾಯವಾಗಲಿ ಎಂದು ದಿಕ್ಕುಗಳು ಮತ್ತು ಕೆಲವು ಪ್ರಮುಖ ಗುರುತುಗಳನ್ನು ಆ ನಕ್ಷೆಯಲ್ಲಿ ಬರೆದಿದ್ದರು. 1991ರಲ್ಲಿ ಗುಸ್ತಾವ್ ನಿಧನರಾದರು. ಆದರೆ ಜಾನ್ ಅವರ ಪಾಲಿಗೆ ಆ ನಕ್ಷೆ ಕೇವಲ ಕಾಗದವಾಗಿರಲಿಲ್ಲ, ಅದು ಅವರ ತಂದೆಯ ಕೊನೆಯ ಆಸೆಯಾಗಿತ್ತು.
80 ವರ್ಷಗಳ ಹಳೆಯ ರಹಸ್ಯ
ಜಾಗತಿಕ ರಾಜಕೀಯ ಬದಲಾವಣೆಗಳಾಗಿ ಉಕ್ರೇನ್ ದೇಶಕ್ಕೆ ಸ್ವಾತಂತ್ರ್ಯ ಸಿಕ್ಕ ಬಳಿಕ ಜಾನ್ ಅವರಿಗೆ ತಮ್ಮ ಹಳೆಯ ಎಸ್ಟೇಟ್ಗೆ ಭೇಟಿ ನೀಡಲು ಅವಕಾಶ ಸಿಕ್ಕಿತು. ಆದರೆ ಒಂದು ಹಳೆಯ ರೇಖಾಚಿತ್ರವನ್ನು ಇಟ್ಟುಕೊಂಡು ನಿಖರವಾದ ಜಾಗ ಹುಡುಕುವುದು ಸುಲಭವಾಗಿರಲಿಲ್ಲ. ಎಸ್ಟೇಟ್ ಇದ್ದ ಜಾಗ ಈಗ ಸಂಪೂರ್ಣ ಬದಲಾಗಿತ್ತು. ಅಲ್ಲಿ ಒಮ್ಮೆ ಇದ್ದ ಭವ್ಯವಾದ ಬಂಗಲೆ ದಶಕಗಳ ಹಿಂದೆಯೇ ಧ್ವಂಸವಾಗಿತ್ತು. ಹೊಲ ಗದ್ದೆಗಳೆಲ್ಲ ಪಾಳುಬಿದ್ದು, ದಟ್ಟವಾದ ಕಾಡಾಗಿ ಮಾರ್ಪಟ್ಟಿತ್ತು.
ಜಾನ್ ಅವರು 2019ರಲ್ಲಿ ಅತ್ಯಂತ ಗಂಭೀರವಾಗಿ ಈ ಹುಡುಕಾಟದ ಕಾರ್ಯಾಚರಣೆ ಆರಂಭಿಸಿದರು. ಇದಕ್ಕೆ ಅವರ ಕುಟುಂಬದವರು ಮತ್ತು ಸ್ಥಳೀಯ ಮೆಟಲ್ ಡಿಟೆಕ್ಟರ್ ತಜ್ಞರು ಸಾಥ್ ನೀಡಿದರು. ಭೂಮಿಯಡಿ ಏನಾದರೂ ಸಿಗುತ್ತದೆ ಎಂಬ ಗ್ಯಾರಂಟಿ ಇರಲಿಲ್ಲ. ಎಷ್ಟೋ ವರ್ಷಗಳ ಹಿಂದೆಯೇ ಯಾರಾದರೂ ಕಾರ್ಮಿಕರು ಅಥವಾ ಸ್ಥಳೀಯರು ಅದನ್ನು ಅಗೆದು ತೆಗೆದಿರಬಹುದು ಎಂಬ ಶಂಕೆ ಇತ್ತು. ಆದರೂ ಜಾನ್ ಹಠ ಬಿಡಲಿಲ್ಲ. ನಕ್ಷೆಯಲ್ಲಿದ್ದ ಸುಳಿವುಗಳನ್ನು ಆಧರಿಸಿ ಒಂದು ನಿರ್ದಿಷ್ಟ ಜಾಗವನ್ನು ಗುರುತಿಸಿ ಹುಡುಕುತ್ತಿದ್ದಾಗ, ಮೆಟಲ್ ಡಿಟೆಕ್ಟರ್ನಿಂದ ದೊಡ್ಡದಾಗಿ ಶಬ್ದ ಕೇಳಿಸಿತು!
ಕಣ್ಣೀರು ತರಿಸಿದ ಕುಟುಂಬದ ನೆನಪುಗಳು
ಭೂಮಿಯನ್ನು ಅಗೆದಾಗ ಸಿಕ್ಕಿದ್ದು ಬರೀ ನಿಧಿಯಲ್ಲ, ಬದಲಿಗೆ ಆ ಕುಟುಂಬದ ಹಳೆಯ ಇತಿಹಾಸ. ಅಲ್ಲಿ ತಲೆಮಾರುಗಳ ಹಿಂದಿನ ಬೆಲೆಬಾಳುವ ಆಭರಣಗಳು, ಕುಟುಂಬದ ಬೆಳ್ಳಿಯ ವಸ್ತುಗಳು ಮತ್ತು ವೈಯಕ್ತಿಕ ಸಾಮಗ್ರಿಗಳು ಪತ್ತೆಯಾದವು. ಕೆಲವು ವಸ್ತುಗಳ ಮೇಲೆ ಕುಟುಂಬದ ಹಿರಿಯರ ಹೆಸರುಗಳನ್ನು ಕೆತ್ತಲಾಗಿತ್ತು. ಇದು ಅವರದೇ ಆಸ್ತಿ ಎಂಬುದನ್ನು ಖಚಿತಪಡಿಸಿತು.
ಅಲ್ಲಿ ಸಿಕ್ಕ ಕೆಲವು ವಸ್ತುಗಳನ್ನು ನೋಡಿ ಜಾನ್ ಕಣ್ಣೀರು ಹಾಕಿದರು. ಏಕೆಂದರೆ, ಅವುಗಳನ್ನು ಅವರ ತಾಯಿ ದೇಶ ಬಿಟ್ಟು ಓಡುವ ಮುನ್ನ ಸ್ವತಃ ಪ್ಯಾಕ್ ಮಾಡಿದ್ದರು. ಜಾನ್ ಚಿಕ್ಕ ಮಗುವಾಗಿದ್ದಾಗಲೇ ಅವರ ತಾಯಿ ತೀರಿಕೊಂಡಿದ್ದರು. ಅಂದರೆ 80 ವರ್ಷಗಳ ಹಿಂದೆ ತನ್ನ ತಾಯಿ ಕೊನೆಯ ಬಾರಿ ಸ್ಪರ್ಶಿಸಿದ್ದ ವಸ್ತುಗಳನ್ನು ಜಾನ್ ಈಗ ಮುಟ್ಟುತ್ತಿದ್ದರು. ಇದರ ಜೊತೆಗೆ ಹಳೆಯ ಬೇಟೆಯಾಡುವ ಬಂದೂಕುಗಳು ಹಾಗೂ ಇತರ ಕೌಟುಂಬಿಕ ಪಾರಂಪರಿಕ ವಸ್ತುಗಳು ಸುರಕ್ಷಿತವಾಗಿ ಸಿಕ್ಕಿವೆ.
ಆಸ್ತಿಗಿಂತ ಮಿಗಿಲಾದ ಭಾವನಾತ್ಮಕ ಮೌಲ್ಯ
ಈ ಒಟ್ಟು ನಿಧಿಯ ಮೌಲ್ಯ ಸಾವಿರಾರು ಪೌಂಡ್ಗಳಷ್ಟಿರಬಹುದು ಎಂದು ಅಂದಾಜಿಸಲಾಗಿದೆ. ಆದರೆ ಜಾನ್ ಅವರಿಗೆ ಇದರ ಹಣದ ಮೌಲ್ಯಕ್ಕಿಂತ ಭಾವನಾತ್ಮಕ ಮೌಲ್ಯವೇ ದೊಡ್ಡದಾಗಿದೆ. ತಂದೆಗೆ ಕೊಟ್ಟ ಮಾತನ್ನು ಉಳಿಸಿಕೊಂಡ ತೃಪ್ತಿ ಅವರದಾಗಿದೆ. ಈ ಕಥೆ ಇಷ್ಟೊಂದು ವಿಶೇಷವಾಗಲು ಮತ್ತೊಂದು ಕಾರಣ ಜಾನ್ ಅವರ ಆರೋಗ್ಯದ ಹೋರಾಟ. ಜಾನ್ ಅವರು ಹಿಮೋಫಿಲಿಯಾ ಕಾಯಿಲೆಯ ಚಿಕಿತ್ಸೆಯ ಸಂದರ್ಭದಲ್ಲಿ ಕಲುಷಿತ ರಕ್ತದ ಮೂಲಕ ಹೆಚ್ಐವಿ ಸೋಂಕಿಗೆ ಒಳಗಾಗಿದ್ದರು. ಅಂತಹ ಕಠಿಣ ಆರೋಗ್ಯದ ಪರಿಸ್ಥಿತಿಯಲ್ಲೂ ಜಾನ್ ಬದುಕುಳಿದು, ತಮ್ಮ ಜೀವಮಾನದ ಕನಸಾಗಿದ್ದ ಈ ಹುಡುಕಾಟವನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ. ಈ ನಿಧಿಯು ಈಗ ಯುದ್ಧ, ವಲಸೆ ಮತ್ತು ನಷ್ಟದಿಂದ ದೂರಾಗಿದ್ದ ಒಂದು ಕುಟುಂಬದ ತಲೆಮಾರುಗಳನ್ನು ಮತ್ತೆ ಜೋಡಿಸುವ ಕೊಂಡಿಯಾಗಿ ನಿಂತಿದೆ.
Click it and Unblock the Notifications
Sign in with Google