ಇದು ಕೇವಲ ಆರಂಭವಷ್ಟೇ ಎಂದು ಹೇಳುತ್ತಲೇ ಕಣ್ಣೀರಿಟ್ಟ ವೈಭವ್ ಸೂರ್ಯವಂಶಿ ಬಾಲ್ಯದ ಕೋಚ್
Vaibhva Sooryavanshi: ಮ್ಯಾಂಚೆಸ್ಟರ್ನಲ್ಲಿ ಭಾರತ ಹಾಗೂ ಇಂಗ್ಲೆಂಡ್ ನಡುವೆ ಟಿ20 ಸರಣಿಯ ಎರಡನೇ ಪಂದ್ಯ ನಡೆಯಿತು. ಬಿಹಾರದ ಬಾಲಕ ವೈಭವ್ ಸೂರ್ಯವಂಶಿ ಈ ಪಂದ್ಯದಲ್ಲಿ ಕಣಕ್ಕಿಳಿದು ಇತಿಹಾಸ ಬರೆಯುತ್ತಿದ್ದಂತೆ ಅವರ ಬಾಲ್ಯದ ಕೋಚ್ ಮನೀಶ್ ಓಜಾ ಭಾವುಕರಾಗಿದ್ದಾರೆ. ಕೇವಲ 15 ವರ್ಷದ ವಯಸ್ಸಿನಲ್ಲಿ ಟೀಮ್ ಇಂಡಿಯಾ ಜರ್ಸಿ ಧರಿಸಿ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರ ದಶಕಗಳ ಹಳೆಯ ದಾಖಲೆಯನ್ನು ಮುರಿದ ತನ್ನ ನೆಚ್ಚಿನ ಶಿಷ್ಯನ ಸಾಧನೆಯನ್ನು ಕಂಡು ಸಂತಸ ವ್ಯಕ್ತಪಡಿಸಿದ್ದಾರೆ.
ಒನ್ ಇಂಡಿಯಾಗೆ ನೀಡಿರುವ ವಿಶೇಷ ಸಂದರ್ಶನದಲ್ಲಿ ಕೋಚ್ ಮನೀಶ್ ಓಜಾ ಅವರು, ವೈಭವ್ ಅವರ ಕ್ರಿಕೆಟ್ ಜರ್ನಿ ಮತ್ತು ಅವರಲ್ಲಿರುವ ಅಸಾಧಾರಣ ಪ್ರತಿಭೆಯ ಬಗ್ಗೆ ಹಲವು ಆಸಕ್ತಿದಾಯಕ ವಿಷಯಗಳನ್ನು ಹಂಚಿಕೊಂಡಿದ್ದಾರೆ. ಇದು ಇದೀಗ ಸಾಮಾಜಿಕ ಜಾಲತಾಣದಲ್ಲಿ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಿದೆ.
'ಕಣ್ಣೀರು ತಡೆಯಲು ಸಾಧ್ಯವಾಗಲಿಲ್ಲ'
ವೈಭವ್ ಭಾರತ ತಂಡದ ಪರ ಕಣಕ್ಕಿಳಿಯುವ ಸುದ್ದಿ ತಿಳಿಯುತ್ತಿದ್ದಂತೆ ತಮಗಾದ ಸಂತೋಷವನ್ನು ಕೋಚ್ ಮನೀಶ್ ಓಜಾ ಮಾತುಗಳಲ್ಲಿ ವಿವರಿಸಿದ್ದಾರೆ. 'ಅವನು ಭಾರತದ ಪರ ಡೆಬ್ಯೂ ಕ್ಯಾಪ್ ಪಡೆಯುವ ದೃಶ್ಯವನ್ನು ಟಿವಿಯಲ್ಲಿ ನೋಡಿದಾಗ ನನ್ನ ಕಣ್ಣಲ್ಲಿ ಆನಂದಬಾಷ್ಪ ಹರಿಯಿತು. ಇದು ಕೇವಲ ವೈಭವ್ ಅಥವಾ ಅವನ ಕುಟುಂಬದ ಕನಸಲ್ಲ, ಬಿಹಾರದ ಪ್ರತಿಯೊಬ್ಬ ಉದಯೋನ್ಮುಖ ಕ್ರಿಕೆಟಿಗನ ಕನಸು ನನಸಾದ ಕ್ಷಣ. ಇಷ್ಟು ಕಿರಿಯ ವಯಸ್ಸಿಗೆ ಅವನು ಈ ಮಟ್ಟಕ್ಕೆ ತಲುಪುತ್ತಾನೆ ಎಂದು ನಾನು ಆರಂಭದಲ್ಲೇ ನಂಬಿದ್ದೆ,' ಎಂದು ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ.
'ಸಚಿನ್, ವಿರಾಟ್ ಹಾದಿ ಹಿಡಿದ ವೈಭವ್'
ವೈಭವ್ ಸೂರ್ಯವಂಶಿ ಕೇವಲ 15ನೇ ವಯಸ್ಸಿಗೆ ಸಚಿನ್ ತೆಂಡೂಲ್ಕರ್ ಅವರ ದಾಖಲೆಯನ್ನು ಮುರಿದಿರುವ ಬಗ್ಗೆ ಮಾತನಾಡಿದ ಮನೀಶ್, 'ದಾಖಲೆಗಳು ಬದಿಗೆ ಇರಲಿ, ಆದರೆ ಸಚಿನ್ ತೆಂಡೂಲ್ಕರ್ ಮತ್ತು ವಿರಾಟ್ ಕೊಹ್ಲಿ ಅವರಂತಹ ದಿಗ್ಗಜರು ತಮ್ಮ ವೃತ್ತಿಜೀವನದ ಆರಂಭಿಕ ದಿನಗಳಲ್ಲಿ ಕ್ರಿಕೆಟ್ ಮೇಲೆ ಎಂತಹ ಬದ್ಧತೆ ಮತ್ತು ಹಸಿವನ್ನು ಹೊಂದಿದ್ದರೋ, ಅದೇ ಗುಣವನ್ನು ನಾನು ವೈಭವ್ನಲ್ಲಿ ನೋಡುತ್ತಿದ್ದೇನೆ. ಅವನು ಮೈದಾನಕ್ಕಿಳಿದರೆ ಎದುರಾಳಿ ಬೌಲರ್ ಯಾರು ಎಂಬುದನ್ನು ನೋಡುವುದಿಲ್ಲ. ಕೇವಲ ಚೆಂಡನ್ನು ಮಾತ್ರ ಗಮನಿಸುತ್ತಾನೆ. ಅವನ ನಿರ್ಭಯ ಬ್ಯಾಟಿಂಗ್ ಶೈಲಿಯೇ ಅವನ ದೊಡ್ಡ ಶಕ್ತಿ,' ಎಂದು ಹೇಳಿದ್ದಾರೆ.
ಐಪಿಎಲ್ನಲ್ಲಿ ಆಕ್ರಮಣಕಾರಿ ಆಟ
ಬಿಹಾರದಂತಹ ಸೌಲಭ್ಯಗಳ ಕೊರತೆ ಇರುವ ಪ್ರದೇಶದಿಂದ ಬಂದು ಐಪಿಎಲ್ 2026ರಲ್ಲಿ ರಾಜಸ್ಥಾನ್ ರಾಯಲ್ಸ್ ಪರ ಅಬ್ಬರಿಸಿ ಈಗ ದೇಶವನ್ನು ಪ್ರತಿನಿಧಿಸುತ್ತಿರುವುದು ಸಾಮಾನ್ಯದ ಮಾತಲ್ಲ ಎಂದು ಕೋಚ್ ನೆನಪಿಸಿಕೊಂಡಿದ್ದಾರೆ. 'ಅವನಿಗೆ ಕಠಿಣ ಪರಿಶ್ರಮ ಮತ್ತು ಕ್ರಿಕೆಟ್ ಮೇಲಿನ ಪ್ರೀತಿ ಸದಾ ದಾರಿ ದೀಪವಾಗಿದೆ. ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಮೊದಲ ಪಂದ್ಯದಲ್ಲೇ ಅವನು 2 ಸಿಕ್ಸರ್ ಬಾರಿಸಿ ತನ್ನ ಆಕ್ರಮಣಕಾರಿ ಪ್ರದರ್ಶನವನ್ನು ತೋರಿಸಿದ್ದಾನೆ. ಮುಂಬರುವ ದಿನಗಳಲ್ಲಿ ಅವನು ಭಾರತ ತಂಡದ ಸ್ಟಾರ್ ಆಟಗಾರನಾಗಲಿದ್ದಾನೆ,' ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ 'ಇದು ಕೇವಲ ಆರಂಭವಷ್ಟೇ. ವೈಭವ್ ಸುದೀರ್ಘ ಕಾಲ ಭಾರತ ತಂಡಕ್ಕೆ ಸೇವೆ ಸಲ್ಲಿಸಬೇಕು ಮತ್ತು ವಿಶ್ವ ಕ್ರಿಕೆಟ್ನಲ್ಲಿ ತನ್ನದೇ ಆದ ಛಾಪು ಮೂಡಿಸಬೇಕು ಎಂಬುದು ನನ್ನ ಆಸೆ,' ಎಂದು ಹೇಳಿಕೊಂಡಿದ್ದಾರೆ.
Click it and Unblock the Notifications
Sign in with Google