ರಾಮ್ ರಹೀಮ್ಗೆ ಜೀವಾವಧಿ ಶಿಕ್ಷೆಗೆ ಸಂತ್ರಸ್ತೆಯರ ಪಟ್ಟು
ರೋಹ್ಟಕ್, ಆಗಸ್ಟ್ 28 : ಐವತ್ತು ವರ್ಷದ ಅತ್ಯಾಚಾರಿ ಬಾಬಾ ರಾಮ್ ರಹೀಮ್ ಸಿಂಗ್ ಗೆ 10 ವರ್ಷ ಕಠಿಣ ಜೈಲು ಶಿಕ್ಷೆಯನ್ನು ವಿಶೇಷ ನ್ಯಾಯಾಲಯ ಪ್ರಕಟಿಸುತ್ತಿದ್ದಂತೆ ತೀವ್ರ ಆಕ್ರೋಶಕ್ಕೊಳಗಾದವರು ಆತನ ಕಟ್ಟಾ ಅನುಯಾಯಿಗಳಲ್ಲ, ಅತ್ಯಾಚಾರಕ್ಕೊಳಗಾದ ಸಾಧ್ವಿಗಳು.
ಕಾವಿ ಧರಿಸಿ ಮಾಡಬಾರದ್ದನ್ನೆಲ್ಲ ಮಾಡಿರುವ ಸ್ಟೈಲಿಶ್ ಬಾಬಾ ಗುರ್ಮೀತ್ ರಾಮ್ ರಹೀಮ್ ಸಿಂಗ್ ಗೆ ಇನ್ನೂ ಉಗ್ರ ಶಿಕ್ಷೆ ನೀಡಬೇಕಾಗಿತ್ತು ಎಂದು ಢೋಂಗಿ ಬಾಬಾನಿಂದ ಸತತ ಮೂರು ವರ್ಷ ಅತ್ಯಾಚಾರಕ್ಕೊಳಗಾಗಿರುವ ಸಾಧ್ವಿಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಸ್ವಯಂ ಘೋಷಿತ ದೇವಮಾನವ ರಾಮ್ ರಹೀಮ್ ವಿರುದ್ಧ ನ್ಯಾ. ಜಗದೀಪ್ ಸಿಂಗ್ ಅವರು ನೀಡಿರುವ ಈ ತೀರ್ಪಿನ ವಿರುದ್ಧ ಮೇಲ್ಮನವಿ ಸಲ್ಲಿಸುವುದಾಗಿಯೂ ಅವರು ತೀರ್ಮಾನಕ್ಕೆ ಬಂದಿದ್ದಾರೆ. 10 ವರ್ಷದ ಬದಲು ಅತ್ಯಾಚಾರಿಗೆ ಜೀವಾವಧಿ ಶಿಕ್ಷೆ ವಿಧಿಸಬೇಕಾಗಿತ್ತು ಎಂಬುದು ಅವರ ಅಳಲು.
ಸರಕಾರಿ ವಕೀಲರು ಕೂಡ ದುರುಳ ಬಾಬಾನಿಗೆ ಜೀವಾವಧಿ ಶಿಕ್ಷೆ ವಿಧಿಸಬೇಕೆಂದು ವಾದ ಮಂಡಿಸಿದ್ದರು. ಇದನ್ನು ವಿರೋಧಿಸಿ, ಬಾಬಾ ಸಮಾಜ ಸೇವಕನಾಗಿರುವುದರಿಂದ ಶಿಕ್ಷೆ ಪ್ರಮಾಣವನ್ನು ತಗ್ಗಿಸಬೇಕೆಂದು ಬಾಬಾ ಪರ ವಕೀಲರು ಪ್ರತಿವಾದ ಮಂಡಿಸಿದ್ದರು.
ಹದಿನೈದು ವರ್ಷಗಳ ಹಿಂದೆಯೇ ರಾಮ್ ರಹೀಮ್ ವಿರುದ್ಧ ಅತ್ಯಾಚಾರದ ಕೇಸನ್ನು ಜಡಿಯಲಾಗಿತ್ತು. ಈ ಕೇಸಿನಲ್ಲಿ ತೀರ್ಪು ಪ್ರಕಟವಾಗಲು ಇಷ್ಟು ವರ್ಷ ಬೇಕಾಗಿದ್ದು ನಿಜಕ್ಕೂ ಕಳವಳಕಾರಿ ಸಂಗತಿ. ತನ್ನ ಜನಪ್ರಿಯತೆಯನ್ನು ದುರುಪಯೋಗ ಪಡಿಸಿಕೊಂಡು ಲೈಂಗಿಕ ದೌರ್ಜನ್ಯ ಎಸಗಿದ ಬಾಬಾನಿಗೆ ಕಡೆಗೂ ಶಿಕ್ಷೆಯಾಗಿರುವುದು ಹಲವರಿಗೆ ನಿರಾಳ ತಂದಿದೆ.
Click it and Unblock the Notifications
Sign in with Google