ಹಿಮಾಚಲದಲ್ಲಿ ಬಿಜೆಪಿ ಗೆದ್ದರೂ ಪ್ರೇಮ್ ಕುಮಾರ್ ಅವಧಿ ಪೂರೈಸಲ್ಲ!
ಬೆಂಗಳೂರು, ನವೆಂಬರ್ 21: ಹಿಮಾಚಲ ಪ್ರದೇಶದ 68 ಸ್ಥಾನಗಳಿಗೆ ನವೆಂಬರ್ 09ರಂದು ಒಂದು ಹಂತದ ಮತದಾನ ನಡೆದಿದ್ದು, , ಡಿಸೆಂಬರ್ 18ಕ್ಕೆ ಮತ ಎಣಿಕೆ ನಡೆಯಲಿದೆ. ಒಂದು ವೇಳೆ ಬಿಜೆಪಿ ಜಯಭೇರಿ ಬಾರಿಸಿದರೂ ಸಿಎಂ ಅಭ್ಯರ್ಥಿ ಪೂರ್ಣಾವಧಿ ಪೂರೈಸಲು ಸಾಧ್ಯವಾಗುವುದಿಲ್ಲ.
ಹಿಮಾಚಲ ಪ್ರದೇಶ ಮುಖ್ಯಮಂತ್ರಿ ಅಭ್ಯರ್ಥಿ ಪ್ರೇಮ್ ಕುಮಾರ್ ಧುಮಾಲ್ ಅವರು ಗೆಲುವು ಸಾಧಿಸಿ ಸಿಎಂ ಪಟ್ಟಕ್ಕೇರಿದರೂ ಅವರ ಅವಧಿ 2019ರ ಲೋಕಸಭೆ ಚುನಾವಣೆ ಹೊತ್ತಿಗೆ ಮುಗಿಯಲಿದೆ. ಇದಕ್ಕೆ ಭಾರತೀಯ ಜನತಾಪಕ್ಷದಲ್ಲಿರುವ ಅಲಿಖಿತ ನಿಯಮವೇ ಕಾರಣ.
ಒಂದು ವೇಳೆ ಕಾಂಗ್ರೆಸ್ ಮತ್ತೊಮ್ಮೆ ಅಧಿಕಾರಕ್ಕೆ ಬಂದರೆ(ಇತಿಹಾಸ ಅವಲೋಕಿಸಿದರೆ ಇಲ್ಲಿ ಒಮ್ಮೆ ಕೂಡಾ ಸತತವಾಗಿ ಯಾವುದೇ ಪಾರ್ಟಿ ಅಧಿಕಾರ ಉಳಿಸಿಕೊಂಡಿಲ್ಲ) 83 ವರ್ಷ ವಯಸ್ಸಿನ ವೀರಭದ್ರ ಸಿಂಗ್ ಅವರು ಮತ್ತೊಂದು ಅವಧಿಗೆ ಸಿಎಂ ಆಗಲಿದ್ದಾರೆ.
ಸದ್ಯದ ಸಮೀಕ್ಷೆಗಳ ಪ್ರಕಾರ ಬಿಜೆಪಿ 43 ರಿಂದ 47 ಸೀಟು ಗೆದ್ದು ಅಧಿಕಾರ ಸ್ಥಾಪಿಸಲಿದೆ. 35 ಸ್ಥಾನಗಳ ಮ್ಯಾಜಿಕ್ ಸಂಖ್ಯೆ ದಾಟುವ ಸಾಧ್ಯತೆ ಹೆಚ್ಚಿದೆ. ಕಾಂಗ್ರೆಸ್ 21 ರಿಂದ 25 ಸ್ಥಾನ ಗಳಿಸಬಹುದು.
2012ರಲ್ಲಿ ಕಾಂಗ್ರೆಸ್ 36 ಸ್ಥಾನ ಹಾಗೂ ಬಿಜೆಪಿ 26 ಸ್ಥಾನಗಳಿಸಿತ್ತು. ದಾಖಲೆಯ 6ನೇ ಬಾರಿಗೆ ವೀರಭದ್ರ ಸಿಂಗ್ ಸಿಎಂ ಆಗಿ ಪ್ರಮಾಣ ವಚನ ಸ್ವೀಕರಿಸಿದ್ದರು.
ಈಗಿನ ಸಂದರ್ಭದಲ್ಲಿ ಸದ್ಯ 73 ವರ್ಷ ವಯಸ್ಸಿನ ಪ್ರೇಮ್ ಕುಮಾರ್ ಅವರು ಅಧಿಕಾರಕ್ಕೆ ಬಂದರೆ 2019ರಲ್ಲಿ 75 ವರ್ಷಕ್ಕೆ ಕಾಲಿರಿಸುತ್ತಾರೆ. ಇದರ ಬೆನ್ನಲ್ಲೆ ಸಿಎಂ ಕುರ್ಚಿಯಿಂದ ಕೆಳಗಿಳಿಯಲೆ ಬೇಕಾಗುತ್ತದೆ. ಕಾರಣ, 75 ವರ್ಷಕ್ಕೂ ಮೇಲ್ಪಟ್ಟವರು ಉನ್ನತ ಹುದ್ದೆಯಲ್ಲಿರುವುದು ಭಾಜಪದಲ್ಲಿ ನಿಷಿದ್ಧ.
2014ರ ಲೋಕಸಭೆ ಚುನಾವಣೆ ವೇಳೆ ಬಿಜೆಪಿಯ ಹಿರಿಯ ನಾಯಕರಾದ ಎಲ್ ಕೆ ಅಡ್ವಾಣಿ, ಮುರಳಿ ಮನೋಹರ್ ಜೋಶಿ, ಯಶ್ವಂತ್ ಸಿನ್ಹಾ ಹಾಗೂ ಶಾಂತಕುಮಾರ್ ಅವರಿಗೆ ಬಂದ ಸ್ಥಿತಿ ಪ್ರೇಮ್ ಕುಮಾರ್ ಅವರಿಗೂ ಬರಲಿದೆ.
Click it and Unblock the Notifications
Sign in with Google