ಶೆಲ್ ಕಂಪನಿಗಳೇ ಮೋದಿ ಸರ್ಕಾರದ ಮುಂದಿನ ಟಾರ್ಗೆಟ್
ಅಕ್ರಮ ಶೆಲ್ ಕಂಪನಿಗಳ ವಿರುದ್ಧ ಮೋದಿ ಸರ್ಕಾರ ಬ್ರಹ್ಮಾಸ್ತ್ರ. ಶೆಲ್ ಕಂಪನಿ, ಅದರ ಅಧಿಕಾರಿಗಳು, ಇಂಥ ಕಂಪನಿಗಳಿ ಕುಮ್ಮಕ್ಕು ನೀಡಿದವರ ಮೇಲೂ ಕ್ರಮ ಕೈಗೊಳ್ಳಲು ನಿರ್ಧಾರ.
ನವದೆಹಲಿ, ಸೆಪ್ಟೆಂಬರ್ 7: ಹಲವಾರು ಕಂಪನಿಗಳ, ಅಕ್ರಮ ಧನ ದಂಧೆಕೋರರ ಕಪ್ಪು ಹಣಕ್ಕೆ ಆಶ್ರಯ ತಾಣವಾಗಿರುವ ಶೆಲ್ ಕಂಪನಿಗಳ ಮೇಲೆ ಶೀಘ್ರದಲ್ಲೇ ಮೋದಿ ಸರ್ಕಾರ ಬ್ರಹ್ಮಾಸ್ತ್ರ ಪ್ರಯೋಗಿಸಲಿದೆ ಎಂದು ವರದಿಯಾಗಿದೆ.
ಅಕ್ರಮ ಹಣವನ್ನು ಸರ್ಕಾರದ ಕಣ್ಣಿಗೆ ಬೀಳದಂತೆ ತಡೆಯುವ ಉದ್ದೇಶದಿಂದಲೇ ಆರಂಭವಾಗಿರುವ ಈ ಸಂಸ್ಥೆಗಳ ಎಲ್ಲಾ ವ್ಯವಹಾರಗಳ ಬಗ್ಗೆ ಕೂಲಂಕಷವಾಗಿ ತನಿಖೆ ನಡೆಸಲಾಗುವುದು ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.
ಆ ಕಂಪನಿಗಳು ಸಲ್ಲಿಸಿರುವ ಆದಾಯ ತೆರಿಗೆ ರಿಟರ್ನ್ಸ್ ಹಾಗೂ ಆ ಕಂಪನಿಗಳ ಉನ್ನತ ಅಧಿಕಾರಗಳ ಆದಾಯ ತೆರಿಗೆ ರಿಟರ್ನ್ಸ್ ಗಳನ್ನು ಕೂಲಂಕಷವಾಗಿ ಅಧ್ಯಯನ ಮಾಡಿ, ತಪ್ಪಿತಸ್ಥ ಕಂಪನಿಗಳ ವಿರುದ್ಧ ನಿರ್ದಾಕ್ಷಿಣ್ಯ ಕ್ರಮ ಕೈಗೊಳ್ಳಲು ನಿರ್ಧರಿಸಲಾಗಿದೆ.
ಇಷ್ಟೇ ಅಲ್ಲ, ಈ ಕಂಪನಿಗಳ ಕಳ್ಳ ವ್ಯವಹಾರಗಳಿಗೆ ಸುಳ್ಳು ಲೆಕ್ಕಪತ್ರ ಸೃಷ್ಟಿಸಿ ಕುಮ್ಮಕ್ಕು ನೀಡಿರುವ ಹಲವಾರು ಚಾರ್ಟರ್ಡ್ ಅಕೌಂಟಂಟ್ ಗಳು, ಕಂಪನಿ ಸೆಕ್ರೆಟರಿಗಳು, ಕಾಸ್ಟ್ ಅಕೌಂಟಟ್ ಗಳನ್ನು ಸರ್ಕಾರ ಪತ್ತೆ ಹಚ್ಚಿದ್ದು, ಇಂಥವರ ವಿರುದ್ಧವೂ ಕ್ರಮ ಕೈಗೊಳ್ಳಲಾಗುವುದು ಎಂದು ಅದು ತಿಳಿಸಿದೆ.