ಇರುವೆ ಗೂಡು ಸುಡಲು ಹೋಗಿ ತಾನೇ ದಹನವಾದ ಮಹಿಳಾ ಟೆಕ್ಕಿ

ಚೆನ್ನೈ, ನವೆಂಬರ್ 24: ಇರುವೆ ಗೂಡಿಗೆ ಬೆಂಕಿ ಹಚ್ಚಲು ಹೋದ 27 ವರ್ಷದ ಮಹಿಳೆ ತನ್ನನ್ನು ತಾನೇ ಸುಟ್ಟುಕೊಂಡು ಗಂಭೀರ ಗಾಯಗಳಿಂದ ಮೃತಪಟ್ಟ ಘಟನೆ ಚೆನ್ನೈನ ಅಮಿಂಜಿಕರೈನ ಪೆರುಮಾಳ್ ಕೋಯಿಲ್ ಸ್ಟ್ರೀಟ್‌ನಲ್ಲಿ ನಡೆದಿದೆ. ಘಟನೆ ವೇಳೆ ಮಹಿಳೆ ಪಾಲಿಸ್ಟರ್ ಬಟ್ಟೆ ಧರಿಸಿದ್ದರು. ಇದರಿಂದ ಬೆಂಕಿ ವೇಗವಾಗಿ ಅವರ ಮೇಗೆ ಆವರಿಸಿಕೊಂಡಿದೆ. ಶೇ 90ರಷ್ಟು ಸುಟ್ಟಗಾಯಕ್ಕೆ ಒಳಗಾಗಿದ್ದ ಅವರು, ಭಾನುವಾರ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾರೆ.

ಅಮಿಂಜಿಕರೈ ನಿವಾಸಿಯಾಗಿದ್ದ ಎಸ್. ಸಂಗೀತಾ, ಶೋಲಿಂಗನಲ್ಲೂರ್‌ನಲ್ಲಿ ಐಟಿ ಸಂಸ್ಥೆಯೊಂದರಲ್ಲಿ ಉದ್ಯೋಗಿಯಾಗಿದ್ದರು. ವೃತ್ತಿಯಿಂದ ಚಾಲಕರಾಗಿರುವ ತಂದೆ ಸತ್ಯಮೂರ್ತಿ ಲಾಕ್‌ಡೌನ್ ವೇಳೆ ಕೆಲಸ ಕಳೆದುಕೊಂಡಿದ್ದರಿಂದ ಸಂಗೀತಾ ಅವರೇ ಮನೆಯ ಏಕೈಕ ಆಧಾರವಾಗಿದ್ದರು.

ಕೋವಿಡ್ ಕಾರಣದಿಂದ ಸಂಗೀತಾ ಅವರು ಮನೆಯಿಂದಲೇ ಕೆಲಸ ಮಾಡುತ್ತಿದ್ದರು. ಶನಿವಾರ ಅವರು ತಮ್ಮ ಕೊಠಡಿಯಲ್ಲಿ ಇರುವೆಗಳು ಓಡಾಡುತ್ತಿರುವುದನ್ನು ಗಮನಿಸಿದರು. ಅವರಿಗೆ ಇರುವೆ ಗೂಡು ಕಂಡಿತ್ತು. ನೆಲವನ್ನು ಸ್ವಚ್ಛಗೊಳಿಸಿದ ಅವರು ಸೀಮೆ ಎಣ್ಣೆ ಸುರಿದು ಇರುವೆ ಗೂಡನ್ನು ಸುಡಲು ನಿರ್ಧರಿಸಿದ್ದರು. ಅಮ್ಮನ ಜತೆ ಸೇರಿ ಕಾಗದ ಒಂದಕ್ಕೆ ಸೀಮೆಎಣ್ಣೆ ಸುರಿದು ಗೂಡಿಗೆ ಬೆಂಕಿ ಹಚ್ಚಿದ್ದರು. ಕೂಡಲೇ ಗೂಡಿನಿಂದ ಹೊರಬಂದ ಇರುವೆಗಳು ಕೊಠಡಿಯ ತುಂಬೆಲ್ಲಾ ಓಡತೊಡಗಿದವು.

ಕೆಲವು ಇರುವೆಗಳು ಸಂಗೀತಾ ಅವರೆಡೆಗೆ ಧಾವಿಸಿ ಅವರ ಕಾಲುಗಳ ಮೇಲೆ ಹತ್ತತೊಡಗಿದವು. ಇದರಿಂದ ಗಾಬರಿಗೊಂಡ ಸಂಗೀತಾ ಅವುಗಳಿಂದ ತಪ್ಪಿಸಿಕೊಳ್ಳಲು ಜಿಗಿಯಲು ಪ್ರಯತ್ನಿಸಿದರು. ಆಗ ಬೆಂಕಿಯ ಸಮೀಪದಲ್ಲಿಯೇ ಸೀಮೆಎಣ್ಣೆ ಕ್ಯಾನ್ ಬಿದ್ದಿದೆ. ಆಗ ಸೀಮೆಎಣ್ಣೆ ಅವರ ಉಡುಪಿನ ಮೇಲೆ ಚೆಲ್ಲಿದ್ದರಿಂದ ಕ್ಷಣಮಾತ್ರದಲ್ಲಿಯೇ ಬೆಂಕಿ ಹೊತ್ತಿಕೊಂಡಿದೆ.

ಸಂಗೀತಾ ಅವರ ಕಿರುಚಾಟ ಕೇಳಿ ತಂದೆ ಸತ್ಯಮೂರ್ತಿ ರಕ್ಷಣೆಗೆ ಧಾವಿಸಿದರೂ ಆಗಾಗಲೇ ಬೆಂಕಿಯ ಜ್ವಾಲೆ ಅವರನ್ನು ಬಹುತೇಕ ಸುಟ್ಟುಹಾಕಿತ್ತು. ಸತ್ಯಮೂರ್ತಿ, ಸಂಗೀತಾರ ಹೋದರ ಮತ್ತು ನೆರೆಹೊರೆಯವರು ಬೆಂಕಿ ನಂದಿಸಲು ಪ್ರಯತ್ನಿಸಿದರು. ಒದ್ದೆ ಬ್ಲಾಂಕೆಟ್ ಅನ್ನು ಮೈಮೇಲೆ ಹಾಕಿದರೂ ಬೆಂಕಿಯನ್ನು ಆರಿಸಲು ತುಂಬಾ ಸಮಯ ಬೇಕಾಯಿತು. ಅವರ ತಾಯಿಗೂ ಸಣ್ಣಪುಟ್ಟ ಸುಟ್ಟ ಗಾಯಗಳಾಯಿತು. ಅವರನ್ನು ಶನಿವಾರ ರಾತ್ರಿ ಕಿಲ್ಪೌಕ್ ವೈದ್ಯಕೀಯ ಕಾಲೇಜಿಗೆ ದಾಖಲಿಸಲಾಯಿತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಭಾನುವಾರ ರಾತ್ರಿ 2.30ರ ಸುಮಾರಿಗೆ ಅವರು ಮೃತಪಟ್ಟರು.

English summary

A woman techie from Chennai succumbed to the injuries after her dress catches fire while she was trying to burn the ant nest at home.