'ಎರಡೆಲೆ ಚಿನ್ಹೆ' ನಮಗೆ ಕೊಡಿ, ಚುನಾವಣಾ ಆಯೋಗಕ್ಕೆ 3,10,000 ಅಫಿಡವಿಟ್!

ನವದೆಹಲಿ, ಜೂನ್ 12: ತಮಿಳುನಾಡು ರಾಜಕಾರಣವೇ ಹಾಗೆ ಅಲ್ಲಿ ನಗೆ ಉಕ್ಕುವ ಸನ್ನಿವೇಶಗಳಿಗೆ ಬರವೇ ಇಲ್ಲ. ಎಐಎಡಿಎಂಕೆಯ ಎರಡು ಬಣಗಳ ಜತೆ ಮಾತುಕತೆ ಮುರಿದು ಬೀಳುತ್ತಿದ್ದಂತೆ ಎರಡೆಲೆ ಚಿನ್ಹೆ ನಮಗೇ ಕೊಡಿ ಎಂದು ಮುಖ್ಯಮಂತ್ರಿ ಇ ಪಳನಿಸ್ವಾಮಿ ಬೆಂಬಲಿಗರು ಚುನಾವಣಾ ಆಯೋಗದ ಮೊರೆ ಹೋಗಿದ್ದಾರೆ.

ಆದರೆ ಇದಕ್ಕೆ ಅವರು ಬಳಸಿರುವ ಮಾರ್ಗ ಮಾತ್ರ ನಗು ತರಿಸುತ್ತಿದೆ. ಬರೋಬ್ಬರಿ 3,10,000 ಅಫಿಡವಿಟ್ ಗಳನ್ನು 4 ಟ್ರಕ್ ಗಳಲ್ಲಿ ತುಂಬಿ ತಮಿಳುನಾಡು ಕಾನೂನು ಸಚಿವ ಸಿವಿ ಶಣ್ಮುಗನ್ ಚುನಾವಣಾ ಆಯೋಗದ ಕಚೇರಿಗೆ ಸೋಮವಾರ ಭೇಟಿ ನೀಡಿದ್ದಾರೆ. ಇವರ ಅಫಿಡವಿಟ್ ಗಳನ್ನು ನೋಡಿ ಚುನಾವಣಾ ಆಯೋಗದ ಅಧಿಕಾರಿಗಳು ಸುಸ್ತು ಬೀಳುವುದೊಂದು ಬಾಕಿ.

ಈ ಅಫಿಡವಿಟ್ ಗಳಲ್ಲಿ ಇ ಪಳನಿಸ್ವಾಮಿಗೆ ಬೆಂಬಲ ಸೂಚಿಸಿ ಕಾರ್ಯಕರ್ತರು ಹಾಕಿರುವ ಸಹಿಗಳಿವೆ ಎನ್ನಲಾಗಿದೆ. ಮಾತ್ರವಲ್ಲ ತಮಗೆ 123 ಶಾಸಕರ ಬೆಂಬಲವಿದೆ ಎಂದು ಪಳನಿಸ್ವಾಮಿ ಪ್ರತಿಪಾದಿಸಿದ್ದಾರೆ.

ವಿಲೀನ ಪ್ರಕ್ರಿಯೆಗೆ ಮಾಜಿ ಮುಖ್ಯಮಂತ್ರಿ ಒ ಪನ್ನೀರ್ ಸೆಲ್ವಂ ತಾವು ರಚಿಸಿದ್ದ ಸಮಿತಿಯನ್ನು ವಿಸರ್ಜನೆ ಮಾಡುತ್ತಿದ್ದಂತೆ ಪಳನಿಸ್ವಾಮಿ ಬಣದ ಸದಸ್ಯರು ಈ ನಡೆ ಅನುಸರಿಸಿದ್ದಾರೆ.

ನಮಗೆ ಪಕ್ಷದ ಕಾರ್ಯಕರ್ತರ ಬೆಂಬಲವಿದೆ. ನಾವು ಎರಡೆಲೆ ಗುರುತು ಪಡೆದೇ ಪಡೆಯುತ್ತೇವೆ ಎಂದು ಪಳನಿಸ್ವಾಮಿ ಪ್ರತಿಕ್ರಿಯೆ ನೀಡಿದ್ದಾರೆ.

English summary

There were a whopping 3,10,000 affidavits taken in four trucks to the office of the Election Commission. Tamil Nadu Law Minister CV Shanmugham reached the Election Commission office on Monday morning to stake claim to the AIADMK’s ‘two-leaf’ symbol as merger talks broke down between the rival party factions.