ನಿವಾರ್ ಚಂಡಮಾರುತ: ತಮಿಳುನಾಡಿನ ಜನರಿಗೆ ಸಹಾಯವಾಣಿ

Updated: Wednesday, November 25, 2020, 14:40 [IST]

ಚೆನ್ನೈ, ನ.25: ನಿವಾರ್ ಚಂಡಮಾರುತವನ್ನು ಎದುರಿಸಲು ತಮಿಳುನಾಡು ಸಜ್ಜಾಗಿದೆ ಎಂದು ಮುಖ್ಯಮಂತ್ರಿ ಎಡಪ್ಪಾಡಿ ಪಳನಿಸ್ವಾಮಿ ಘೋಷಿಸಿದ್ದಾರೆ. ಸರ್ಕಾರರಿಂದ ಪ್ರಮುಖ ಜಿಲ್ಲೆಗಳಿಗೆ ಸಹಾಯವಾಣಿ ಪ್ರಕಟಿಸಲಾಗಿದೆ.

ರಾಷ್ಟ್ರೀಯ ವಿಪತ್ತು ನಿರ್ವಹಣಾ ದಳ(NDRF) 30 ಪಡೆ ಈಗಾಗಲೇ ತಮಿಳುನಾಡು ಹಾಗೂ ಆಂಧ್ರಪ್ರದೇಶದ ಕರಾವಳಿಯನ್ನು ಸುತ್ತುವರೆಯಲಾರಂಭಿಸಿವೆ. ಬಂಗಾಳ ಕೊಲ್ಲಿಯಲ್ಲಿ ವಾಯುಭಾರ ಕುಸಿತದಿಂದ ಮಳೆ ಆರಂಭವಾಗಿದ್ದು, ನವೆಂಬರ್ 25ರ ಸಂಜೆ ನಂತರ ದೈತ್ಯ ಅಲೆಗಳನ್ನು ಕಾರೈಕಲ್ ಹಾಗೂ ಮಹಾಬಲಿಪುರಂ ಸಮುದ್ರಗಳಲ್ಲಿ ನಿರೀಕ್ಷಿಸಬಹುದು. ಸುಮಾರು ಮೂರು ದಿನಗಳ ಕಾಲ ಚಂಡ ಮಾರುತದ ಅಬ್ಬರ ಇರುವ ನಿರೀಕ್ಷೆಯಿದೆ. ಸುಮಾರು 100 ರಿಂದ 200 ಕಿ.ಮೀ ಪ್ರತಿ ಗಂಟೆ ವೇಗದಲ್ಲಿ ಗಾಳಿ ಬೀಸಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಕಡಲೂರು, ಅರಿಯಾಲೂರು, ರಾಣಿಪೇಟ್, ತಿರುವಾರೂರ್, ತಂಜಾವೂರ್ ಹಾಗೂ ಕೊಯಮತ್ತೂರು ಮುಂತಾದ ಪ್ರದೇಶಗಳಿಗೆ ಸಹಾಯವಾಣಿಯನ್ನು ಪ್ರಕಟಿಸಲಾಗಿದೆ.