ರಾಜ್ಯ ಸರ್ಕಾರದ 'ರಿಯಲ್ ಎಸ್ಟೇಟ್ ಕಾಯ್ದೆ' ಶೀಘ್ರವೇ ಅನುಷ್ಠಾನ?
ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷೆಯ 'ರಿಯಲ್ ಎಸ್ಟೇಟ್ ಕಾಯ್ದೆ'ಗೆ ಶೀಘ್ರದಲ್ಲೇ ಅಂತಿಮ ಸ್ವರೂಪ. ಆನಂತರ, ಸಂಪುಟ ಸಭೆಯಲ್ಲಿ ಚರ್ಚೆಗೆ. ಕಾಯ್ದೆ ಜಾರಿ ಶೀಘ್ರದಲ್ಲೇ ಎಂದು ತಿಳಿಸಿದ ಮುಖ್ಯಮಂತ್ರಿ ಕಚೇರಿ.
ಬೆಂಗಳೂರು, ಜುಲೈ 1: ದೀರ್ಘಕಾಲದಿಂದಲೂ ಜನ ಸಾಮಾನ್ಯರಲ್ಲಿ ಭಾರೀ ನಿರೀಕ್ಷೆ ಹುಟ್ಟಿಸಿರುವ, ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷೆಯ ರಿಯಲ್ ಎಸ್ಟೇಟ್ ಕಾಯ್ದೆಯು ಶೀಘ್ರದಲ್ಲೇ ಅನುಷ್ಠಾನಕ್ಕೆ ಬರಲಿದೆ ಎಂದು ಕೆಲ ಮೂಲಗಳು ತಿಳಿಸಿವೆ.
ದೀರ್ಘಕಾಲದಿಂದಲೂ ನೆನೆಗುದಿಗೆ ಬಿದ್ದಿರುವುದರಿಂದ ಪ್ರಭಾವಶಾಲಿಯಾಗಿರುವ ಈ ಕಾಯ್ದೆಯನ್ನು ದುರ್ಬಲಗೊಳಿಸುವ ಪ್ರಯತ್ನಗಳು ನಡೆಯುತ್ತಿರುವ ಬಗ್ಗೆ ಜನ ಸಾಮಾನ್ಯರಲ್ಲಿ ಆತಂಕ ಹುಟ್ಟಿಸಿತ್ತು.
ಈ ಆತಂಕಗಳನ್ನು ದೂರಾಗಿಸಿರುವ ಮುಖ್ಯಮಂತ್ರಿ ಕಚೇರಿ, ಶೀಘ್ರದಲ್ಲೇ ಕಾಯ್ದೆಯನ್ನು ವಿಧಾನಸಭೆಯಲ್ಲಿ ಮಂಡಿಸುವುದಾಗಿ ತಿಳಿಸಿದೆ. ಅಲ್ಲದೆ, ಗ್ರಾಹಕರ ಸುರಕ್ಷೆಯನ್ನು ಗಮನದಲ್ಲಿಟ್ಟುಕೊಂಡೇ ಕಾಯ್ದೆಗೆ ಅಂತಿಮ ರೂಪ ನೀಡಲಾಗುತ್ತಿದೆ ಎಂದು ಹೇಳಿದೆ.
ಈ ಬಗ್ಗೆ ಮಾಧ್ಯಮವೊಂದಕ್ಕೆ ವಿವರಣೆ ನೀಡಿರುವ ಮುಖ್ಯಮಂತ್ರಿಗಳ ಪ್ರಧಾನ ಕಾರ್ಯದರ್ಶಿ (1) ಎಲ್.ಕೆ. ಅತೀಖ್, ''ಕಾಯ್ದೆಯ ಬಗ್ಗೆ ಕೆಲವಾರು ಸಂಸ್ಥೆಗಳಿಂದ ಆತಂಕ ವ್ಯಕ್ತವಾಗಿದ್ದರಿಂದ ಕಾಯ್ದೆ ಮಂಡನೆಗೆ ತಡವಾಯಿತು. ಶೀಘ್ರದಲ್ಲೇ ಕಾಯ್ದೆಗೆ ಅಂತಿಮ ಸ್ವರೂಪ ಕೊಟ್ಟು, ಅದನ್ನು ಮುಂದಿನ ಸಂಪುಟ ಸಭೆಯಲ್ಲಿ ಮಂಡಿಸಲಾಗುವುದು'' ಎಂದಿದ್ದಾರೆ.