ಜಿಎಸ್ಟಿ ತೆರಿಗೆ ದರದಲ್ಲಿ ಭಾರೀ ಇಳಿಕೆ: ಜನಸಾಮಾನ್ಯ ಫುಲ್ ಖುಷ್

ನವದೆಹಲಿ, ಡಿ 22: ಪುದುಚೇರಿಯ ಮುಖ್ಯಮಂತ್ರಿ ನಾರಾಯಣಸ್ವಾಮಿ ಅಧ್ಯಕ್ಷತೆ, ವಿತ್ತ ಸಚಿವ ಅರುಣ್ ಜೇಟ್ಲಿ ನೇತೃತ್ವದಲ್ಲಿ ನಡೆದ 31ನೇ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ಕೌನ್ಸಿಲ್ ಸಭೆ ಮುಕ್ತಾಯಗೊಂಡಿದೆ.

ಐಷಾರಾಮಿ 34 ವಸ್ತುಗಳನ್ನು ಹೊರತು ಪಡಿಸಿ, ಮಿಕ್ಕೆಲ್ಲಾ ವಸ್ತುಗಳನ್ನು ಶೇ. 28ರ ಸ್ಲ್ಯಾಬ್ ನಿಂದ ಶೇ. 18ಕ್ಕೆ ಇಳಿಸಲಾಗಿದೆ ಎಂದು ವಿತ್ತ ಸಚಿವ ಜೇಟ್ಲಿ ಹೇಳಿದ್ದಾರೆ. ಶೇ. 28ರ ಸ್ಲ್ಯಾಬ್ ನಿಂದ ಕೆಲವು ವಸ್ತುಗಳನ್ನು ಕಡೆಮೆ ತೆರಿಗೆ ದರದ ಸ್ಲ್ಯಾಬ್ ಗೆ ಇಳಿಸಿದ್ದಕ್ಕೆ, ಮೂರು ಕಾಂಗ್ರೆಸ್ ರಾಜ್ಯದ ಪ್ರತಿನಿಧಿಗಳು ವಿರೋಧ ವ್ಯಕ್ತಪಡಿಸಿದ್ದಾರೆ.

ಸುಮಾರು ನಲವತ್ತು ವಸ್ತುಗಳ ತೆರಿಗೆ ದರವನ್ನು ಇಳಿಸಿರುವುದರಿಂದ, ಜನಸಮಾನ್ಯರಿಗೆ ತೆರಿಗೆ ದರದ ಭಾರ ಇಳಿಯಲಿದೆ ಎಂದು ಕೇಂದ್ರ ಸಚಿವರು ಹೇಳಿದ್ದಾರೆ.

ಜನಧನ್ ಖಾತೆಯ ಮೇಲಿನ ಬ್ಯಾಂಕ್ ಸೇವಾ ದರದ ತೆರಿಗೆಯನ್ನು ಜಿಎಸ್ಟಿಯಿಂದ ವಿನಾಯತಿ ನೀಡಲಾಗಿದೆ.

32ಇಂಚಿನ ಟಿವಿ, ಸಿನಿಮಾ ಟಿಕೆಟ್ ಮೇಲಿನ ಜಿಎಸ್ಟಿ ದರ, ಟೈರ್ ಮುಂತಾದ ವಸ್ತುಗಳ ತೆರಿಗೆ ದರವನ್ನು ಶೇ. 28ರಿಂದ ಶೇ. 18ಕ್ಕೆ ಇಳಿಸಲಾಗಿದೆ.

ಸಿನಿಮಾ ಟಿಕೆಟ್ ಇನ್ನಷ್ಟು ಅಗ್ಗ

ನೂರು ರೂಪಾಯಿವರೆಗಿನ ಸಿನಿಮಾ ಟಿಕೆಟ್ ಮೇಲಿನ ಜಿಎಸ್ಟಿಯನ್ನು ಶೇ.18ರಿಂದ ಶೇ. 12ಕ್ಕೆ ಇಳಿಸಲಾಗಿದೆ. ನೂರು ರೂಪಾಯಿ ಮೇಲಿನ ತೆರಿಗೆಯನ್ನು ಶೇ. 28 ರಿಂದ ಶೇ.18ಕ್ಕೆ ಇಳಿಸಲಾಗಿದೆ.

ಮಾನಿಟರ್, ಟಿವಿ ಸ್ಕ್ರೀನ್, ಟೈರ್, ಬ್ಯಾಟರಿಯ ಪವರ್ ಬ್ಯಾಂಕ್

ಮಾನಿಟರ್, ಟಿವಿ ಸ್ಕ್ರೀನ್, ಟೈರ್, ಬ್ಯಾಟರಿಯ ಪವರ್ ಬ್ಯಾಂಕ್ ಮೇಲಿನ ತೆರಿಗೆಯನ್ನು ಶೇ. 28 ರಿಂದ ಶೇ.18ಕ್ಕೆ ಇಳಿಸಲಾಗಿದೆ. ದೆಹಲಿಯ ವಿಜ್ಞಾನ ಭವನದಲ್ಲಿ ಶನಿವಾರ (ಡಿ 22) ನಡೆದ ಸಭೆಯಲ್ಲಿ ಈ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲಾಗಿದೆ.

ವ್ಹೀಲ್ ಚೇರ್ ಮೇಲಿನ ದರ

ಪಾದರಕ್ಷೆಯ ಮೇಲಿನ ತೆರಿಗೆಯನ್ನು ಶೇ. 18ರಿಂದ ಶೇ. 12, ಹೆಪ್ಪುಗಟ್ಟಿದ ತರಕಾರಿಗಳ ಮೇಲಿನ ತೆರಿಗೆಯನ್ನು ಜಿಎಸ್ಟಿಯಿಂದ ವಿನಾಯತಿ ನೀಡಲಾಗಿದೆ. ವ್ಹೀಲ್ ಚೇರ್ ಮೇಲಿನ ದರವನ್ನು ಶೇ. 28 ರಿಂದ ಶೇ. 5ಕ್ಕೆ ಇಳಿಸಲಾಗಿದೆ.

ಹೊಸವರ್ಷದ ಉಡುಗೊರೆ ಎಂದಿರುವ ಜೇಟ್ಲಿ

ಜಿಎಸ್ಟಿ ಹೊಸ ತೆರಿಗೆ ದರ ಹೊಸವರ್ಷದ ಉಡುಗೊರೆ ಎಂದಿರುವ ಜೇಟ್ಲಿ, ಸಿಮೆಂಟ್, ಆಟೋ ಮೇಲಿನ ಬಿಡಿಭಾಗವನ್ನು ಶೇ.28ರ ಸ್ಲ್ಯಾಬಿನಲ್ಲೇ ಉಳಿಸಲಾಗಿದೆ. 32ಇಂಚಿನ ಮೇಲಿನ ಟಿವಿಯ ಮೇಲಿನ ತೆರಿಗೆ ದರವನ್ನು ಶೇ.28ರ ಸ್ಲ್ಯಾಬಿನಲ್ಲೇ ಮುಂದುವರಿಸಲಾಗಿದೆ.

01.01.2019ಕ್ಕೆ ಅನ್ವಯವಾಗುವಂತೆ ಜಾರಿಗೆ

ಮೇಲಿನ ಎಲ್ಲಾ ತೆರಿಗೆ ಬದಲಾವಣೆ 01.01.2019ಕ್ಕೆ ಅನ್ವಯವಾಗುವಂತೆ ಜಾರಿಗೆ ಬರಲಿದೆ. ತೆರಿಗೆ ದರ ಇಳಿಕೆಯಿಂದ ಕೇಂದ್ರ ಸರಕಾರಕ್ಕೆ 5,500 ಕೋಟಿ ರೂಪಾಯಿ ನಷ್ಟವಾಗಲಿದೆ. ಶೇ. 28ರ ಸ್ಲ್ಯಾಬ್ ಅನ್ನು ಹಿಂದಕ್ಕೆ ಪಡೆದುಕೊಂಡರೆ, ಸರಕಾರಕ್ಕೆ ತೀವ್ರ ನಷ್ಟವಾಗಲಿದೆ ಎನ್ನುವ ಕಾರಣಕ್ಕಾಗಿ ಮುಂದುವರಿಸಲಾಗಿದೆ ಎಂದು ವಿತ್ತ ಸಚಿವ ಜೇಟ್ಲಿ ಹೇಳಿದ್ದಾರೆ.

English summary

31st GSTCouncil Meet : Except 34 luxury items, all other will be now in 18%, 12% and 5% tax slabs~ Arun Jaitley