ನಮ್ಮ ಮೆಟ್ರೋ 2ನೇ ಹಂತ : ಸುರಂಗ ಕಾಮಗಾರಿ ಶೀಘ್ರ ಆರಂಭ
ಬೆಂಗಳೂರು, ಜೂನ್ 27 : ನಮ್ಮ ಮೆಟ್ರೋ 2ನೇ ಹಂತದ ಯೋಜನೆಯ ಸುರಂಗ ಮಾರ್ಗ ಕಾಮಗಾರಿ ಶೀಘ್ರದಲ್ಲೇ ಆರಂಭವಾಗಲಿದೆ. 2023ರ ವೇಳೆಗೆ ಸುರಂಗ ಮಾರ್ಗ ಕಾಮಗಾರಿ ಮುಕ್ತಾಯಗೊಳ್ಳುವ ನಿರೀಕ್ಷೆ ಇದೆ.
ನಾಗವಾರ-ಗೊಟ್ಟಿಗೆರೆ ತನಕ 25 ಕಿ.ಮೀ.ಮಾರ್ಗದ ನಮ್ಮ ಮೆಟ್ರೋ ಮಾರ್ಗ ನಿರ್ಮಾಣವಾಗಲಿದೆ. ಸುಮಾರು 11,500 ಕೋಟಿ ರೂ.ಗಳ ವೆಚ್ಚದ ಯೋಜನೆ ಇದಾಗಿದೆ. ಈ ಮಾರ್ಗದಲ್ಲಿ ಡೈರಿ ಸರ್ಕಲ್ನಿಂದ ನಾಗವಾರ ತನಕ 13.79 ಕಿ.ಮೀ. ಸುರಂಗ ಮಾರ್ಗ ಇರಲಿದೆ.
ಸುರಂಗ ಮಾರ್ಗ ನಿರ್ಮಾಣ ಮಾಡಲು ಬಿಎಂಆರ್ಸಿಎಲ್ 4 ಪ್ಯಾಕೇಜ್ಗಳ ಟೆಂಡರ್ ಕರೆದಿತ್ತು. 3 ಮತ್ತು 4ನೇ ಪ್ಯಾಕೇಜ್ ಟೆಂಡರ್ ಎಲ್&ಟಿ ಕಂಪನಿ ಪಾಲಾಗಿದೆ. ಎಂ.ಜಿ.ರಸ್ತೆ ಮತ್ತು ಶಿವಾಜಿನಗರದಲ್ಲಿ ನೆಲದಡಿ ನಿಲ್ದಾಣ ನಿರ್ಮಾಣವಾಗಲಿದೆ.
ವೆಲ್ಲಾರ ಜಂಕ್ಷನ್ನಿಂದ ಪಾಟರಿ ಟೌನ್ ತನಕ ಸುರಂಗ ಮಾರ್ಗದ ಲೈನ್ ಹಾದು ಹೋಗಲಿದ್ದು, ಎಲ್&ಟಿ ಕಂಪನಿ ಮಾರ್ಗದ ಮೇಲಿರುವ ಕಟ್ಟಡಗಳ ಸಮೀಕ್ಷೆ ಕಾರ್ಯವನ್ನು ಆರಂಭಿಸಿದೆ. ಶಿವಾಜಿನಗರ ನಿಲ್ದಾಣದಿಂದ ಸುರಂಗ ಮಾರ್ಗ ಕೊರೆಯುವ ಬೋರಿಂಗ್ ಮೆಷಿನ್ ಕೆಲಸ ಆರಂಭಿಸಲಿದೆ.
ಎಂ.ಜಿ.ರಸ್ತೆಯಲ್ಲಿ ನೆಲದಡಿ ನಿಲ್ದಾಣ ನಿರ್ಮಾಣ ಮಾಡಲು ಕಾಮರಾಜ ರಸ್ತೆಯಲ್ಲಿ ಈಗಾಗಲೇ ವಾಹನ ಸಂಚಾರ ಬಂದ್ ಮಾಡಲಾಗಿದೆ. 2ನೇ ಹಂತದ ಮೆಟ್ರೋ ಯೋಜನೆಯಲ್ಲಿ ಒಟ್ಟು 12 ನಿಲ್ದಾಣಗಳು ನೆಲದಡಿ ನಿರ್ಮಾಣಗೊಳ್ಳಲಿವೆ.
13.79 ಕಿ.ಮೀ. ಸುರಂಗ ಮಾರ್ಗ ನಿರ್ಮಾಣದ ಟೆಂಡರ್ ಅನ್ನು 4 ಪ್ಯಾಕೇಜ್ಗಳಾಗಿ ವಿಭಾಗ ಮಾಡಲಾಗಿದೆ. ಒಟ್ಟು 9 ಬೋರಿಂಗ್ ಮೆಷಿನ್ ಸುರಂಗ ಮಾರ್ಗ ಕೊರೆಯಲು ಬಳಕೆಯಾಗಲಿವೆ.
Click it and Unblock the Notifications
Sign in with Google