40 ವರ್ಷ ಬಾಳಿಕೆ ಬರುತ್ತದೆ ಎಂದಿದ್ದ ಇಂದಿರಾ ನಗರದ ರಸ್ತೆಯಲ್ಲಿ 30 ದಿನಗಳಲ್ಲಿಯೇ ಬಿರುಕು!

ಬೆಂಗಳೂರು, ಜ. 08: ಅತ್ಯಂತ ಸಂಭ್ರಮದಿಂದ ಬೆಂಗಳೂರಿನ ಇಂದಿರಾನಗರದಲ್ಲಿ 'ಕ್ಷಿಪ್ರ ರಸ್ತೆ ಕಾಮಗಾರಿ' ತಂತ್ರಜ್ಞಾನ ಬಳಸಿ ನಿರ್ಮಿಸಲಾದ ರಸ್ತೆ ಬಿರುಕು ಬಿಟ್ಟಿದ್ದು, ಕಾಮಗಾರಿಯ ಗುಣಮಟ್ಟ ಮತ್ತು ವಿಧಾನದ ಕಾರ್ಯಸಾಧ್ಯತೆಯ ಬಗ್ಗೆ ಆತಂಕ ಮೂಡಿಸಿದೆ.

ಇಂದಿರಾನಗರದ ಹಳೆಯ ಮದ್ರಾಸ್ ರಸ್ತೆಯ 375 ಮೀಟರ್ ವಿಸ್ತಾರವನ್ನು 20 ಅಡಿ ಉದ್ದ ಮತ್ತು 5 ಅಡಿ ಅಗಲದ ದೊಡ್ಡ ಪ್ರಿ-ಕಾಸ್ಟ್ ಕಾಂಕ್ರೀಟ್ ಬ್ಲಾಕ್‌ಗಳನ್ನು ಜೋಡಿಸಿ ನಿರ್ಮಿಸಲಾಗಿದೆ. ವರದಿಗಳ ಪ್ರಕಾರ, ವಿಸ್ತರಣೆಗೆ ಬಳಸಲಾದ 250 ಸ್ಲ್ಯಾಬ್‌ಗಳಲ್ಲಿ ಕನಿಷ್ಠ ಎಂಟರಲ್ಲಿ ಬಿರುಕುಗಳು ಕಾಣಿಸಿಕೊಂಡಿದೆ. ಒಂದು ಮುರಿದುಹೋಗಿದೆ ಎಂದು ವರದಿಯಾಗಿದೆ.

ನಗರದ ರಸ್ತೆಗಳಲ್ಲಿನ ಗುಂಡಿಗಳ ಹಾವಳಿಗೆ ಸಂಬಂಧಿಸಿದಂತೆ ನ್ಯಾಯಾಲಯಗಳು ಮತ್ತು ಸಾರ್ವಜನಿಕರಿಂದ ಛೀಮಾರಿ ಹಾಕಿಸಿಕೊಂಡ ನಂತರ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ರಾಪಿಡ್ ರೋಡ್ ತಂತ್ರಜ್ಞಾನವನ್ನು ಕಂಡುಹಿಡಿದಿದೆ. ಈ ತಂತ್ರಜ್ಞಾನದ ರಸ್ತೆಗಳು 40 ವರ್ಷ ಬಾಳಿಕೆ ಬರುತ್ತವೆ ಎಂದು ಬಿಬಿಎಂಪಿ ಹೇಳಿಕೊಂಡಿತ್ತು.

ಹೊಸ ರಸ್ತೆಯನ್ನು ಡಿಸೆಂಬರ್ 8 ರಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಸಾರ್ವಜನಿಕರ ಬಳಕೆಗೆ ಮುಕ್ತಗೊಳಿಸಿದರು. ಉದ್ಘಾಟನೆಯ ವೇಳೆ ಬಸವರಾಜ ಬೊಮ್ಮಾಯಿ ಅವರು, ತಂತ್ರಜ್ಞಾನವನ್ನು ಇತರ ರಸ್ತೆಗಳಿಗೆ ವಿಸ್ತರಿಸಲು ನಿರ್ಧರಿಸುವ ಮೊದಲು ಅಧಿಕಾರಿಗಳು ರಸ್ತೆಯ ಗುಣಮಟ್ಟ ಮತ್ತು ಸಹಿಷ್ಣುತೆಯನ್ನು ನಿರಂತರವಾಗಿ 20 ಟನ್‌ಗಿಂತ ಹೆಚ್ಚು ವಾಹನಗಳನ್ನು ಓಡಿಸಿದ ನಂತರ ವಿಶ್ಲೇಷಿಸಬೇಕು ಎಂದು ಹೇಳಿದ್ದರು.

ಇಷ್ಟು ಬೇಗ ಬಿರುಕು ಬಿಡುತ್ತದೆ ಎಂದು ನಿರೀಕ್ಷಿಸಿರಲಿಲ್ಲ ಎಂದು ಪೌರಾಯುಕ್ತರ ಹಿರಿಯ ಅಧಿಕಾರಿಗಳು ಹೇಳಿದ್ದಾರೆ. ಬಿಬಿಎಂಪಿ ಮುಖ್ಯ ಎಂಜಿನಿಯರ್ ಪ್ರಹ್ಲಾದ್ ಅವರ ಪ್ರಕಾರ, ಇದು ಹೊಸ ತಂತ್ರಜ್ಞಾನ ಮತ್ತು ಪ್ರಾಯೋಗಿಕ ಯೋಜನೆಯಾಗಿರುವುದರಿಂದ, ಇದರ ಬಗ್ಗೆ ಇನ್ನೂ ಕೆಲವು ಸಂಶೋಧನೆ ಮತ್ತು ಅಭಿವೃದ್ಧಿಯ ಅಗತ್ಯವಿದೆ. ಬಿರುಕು ಉಂಟಾಗಲು ಸಾಧ್ಯವಿರುವ ಕಾರಣಗಳನ್ನು ತಜ್ಞರು ವಿಶ್ಲೇಷಿಸುತ್ತಿದ್ದು, ಶೀಘ್ರವೇ ವರದಿ ಸಿದ್ಧಪಡಿಸಲಾಗುವುದು.

ಇದಕ್ಕೂ ಮೊದಲು ಬಿಬಿಎಂಪಿಯನ್ನು ಈ ಹಿಂದೆ ವೈಟ್‌ ಟಾಪಿಂಗ್ ಮಾಡಲು ನಿರ್ಧರಿಸಲಾಗಿತ್ತು. ಆದರೆ ಇದು ಹೆಚ್ಚು ಸಮಯ ತೆಗೆದುಕೊಳ್ಳುತ್ತದೆ ಮತ್ತು ಟ್ರಾಫಿಕ್ ಜಾಮ್‌ಗೆ ಕಾರಣವಾದ ಕಾರಣ, ಬಿಬಿಎಂಪಿ ಅಧಿಕಾರಿಗಳು ಕ್ಷಿಪ್ರ ರೋಡ್ ವಿಧಾನವನ್ನು ಅಳವಡಿಸಿಕೊಳ್ಳಲು ನಿರ್ಧರಿಸಿದ್ದಾರೆ.

ಒಂದು ಗಂಟೆಯೊಳಗೆ ಅರ್ಧ ಕಿಲೋಮೀಟರ್ ಹಾಕಬಹುದಾದ ರಸ್ತೆ ನಿರ್ಮಾಣದ ಅತ್ಯಂತ ವೇಗದ ವಿಧಾನ ಇದಾಗಿದೆ. ಆದರೆ, ಅದರ ವೆಚ್ಚವು ವೈಟ್‌ ಟಾಪಿಂಗ್ ವಿಧಾನಕ್ಕಿಂತ 30 ಪ್ರತಿಶತ ಅಧಿಕವಾಗಿರುತ್ತದೆ. ಹೀಗಾಗಿ ಈ ಕ್ಷಿಪ್ರ ರಸ್ತೆಗಳ ನಿರ್ಮಾಣಕ್ಕೆ ಕಾರ್ಪೊರೇಟ್ ಸಾಮಾಜಿಕ ಹೊಣೆಗಾರಿಕೆ (ಸಿಎಸ್‌ಆರ್) ನಿಧಿಯನ್ನು ಬಳಸುವುದಾಗಿ ಬಿಬಿಎಂಪಿ ಮೊದಲೇ ಹೇಳಿತ್ತು.

English summary

Indiranagar Rapid Road develops cracks within 30 days, Bruhat Bengaluru Mahanagara Palike (BBMP) Promised 40 years' life. know more.