Bengaluru Traffic: ಬೆಂಗಳೂರು ದಕ್ಷಿಣ ವಲಯದಲ್ಲಿ ಎಲ್ಲೆಲ್ಲಿ ಟ್ರಾಫಿಕ್ ಜಾಮ್ ಜಾಸ್ತಿ?

ಬೆಂಗಳೂರು, ಏಪ್ರಿಲ್. 22: ಬೆಂಗಳೂರು ಟ್ರಾಫಿಕ್ ಪೊಲೀಸ್ (ದಕ್ಷಿಣ ವಿಭಾಗ) ಫುಟ್‌ಪಾತ್ ಪಾರ್ಕಿಂಗ್ ಮತ್ತು ನೋ ಪಾರ್ಕಿಂಗ್ ಉಲ್ಲಂಘನೆಗಳ ವಿರುದ್ಧ ವಿಶೇಷ ಎನ್‌ಫೋರ್ಸ್‌ಮೆಂಟ್ ಅಭಿಯಾನ ಮಾಡಲು 75 ರಸ್ತೆಗಳನ್ನು ಗುರುತಿಸಿದೆ. ದಕ್ಷಿಣ ವಿಭಾಗವು ಪೈಲಟ್ ಆಧಾರದ ಮೇಲೆ ಟೋಯಿಂಗ್ ಅನ್ನು ಮರಳಿ ತರಲು ಯೋಜಿಸುತ್ತಿದೆ ಎಂದು ಬೆಂಗಳೂರು ಮಿರರ್ ವರದಿ ಮಾಡಿದೆ.

ಜನಸ್ಪಂದನದಿಂದ ನಾಗರಿಕರ ಪ್ರತಿಕ್ರಿಯೆ ಮತ್ತು ಟ್ರಾಫಿಕ್ ಪೊಲೀಸರ ತಜ್ಞರ ವೀಕ್ಷಣೆಯ ಆಧಾರದ ಮೇಲೆ, ದಕ್ಷಿಣ ವಿಭಾಗವು ಹಲವಾರು ಮುಖ್ಯ ರಸ್ತೆಗಳು ಮತ್ತು ಒಳ ರಸ್ತೆಗಳನ್ನು ಗುರುತಿಸಿದೆ. ಇವುಗಳು ತೀವ್ರ ಟ್ರಾಫಿಕ್ ದಟ್ಟಣೆಯ ಸ್ಥಳಗಳಾಗಿವೆ ಎಂದು ವರದಿಯಾಗಿದೆ.

ರಸ್ತೆಗಳಲ್ಲಿ ವಾಹನ ನಿಲುಗಡೆ ಸಮಸ್ಯೆಯಿಂದಾಗಿ ಸಂಚಾರ ದಟ್ಟಣೆ ಉಂಟಾಗುತ್ತಿದೆ ಎಂದು ಟ್ರಾಫಿಕ್ ಪೊಲೀಸರು ಹೇಳಿದ್ದಾರೆ. ದಕ್ಷಿಣ ವಿಭಾಗವು ಪ್ರಾಯೋಗಿಕ ಆಧಾರದ ಮೇಲೆ ಎರಡು ತಿಂಗಳ ಕಾಲ ವಿಶೇಷ ಜಾರಿ ಅಭಿಯಾನವನ್ನು ಆಯೋಜಿಸಲು ನಿರ್ಧರಿಸಿದೆ. ದಕ್ಷಿಣ ವಿಭಾಗದ 12 ಪೊಲೀಸ್ ಠಾಣೆಗಳಿಗೆ 75 ರಸ್ತೆಗಳಲ್ಲಿ ತಮ್ಮ ವ್ಯಾಪ್ತಿಯೊಳಗೆ ಸಂಚಾರ ನಿಯಮಗಳನ್ನು ಉಲ್ಲಂಘಿಸುವ ಅಪರಾಧಿಗಳ ವಿರುದ್ಧ ಕ್ರಮ ಕೈಗೊಳ್ಳಲು ತಿಳಿಸಲಾಗಿದೆ.

ಆಡುಗೋಡಿ, ಮಡಿವಾಳ, ಮೈಕೋ ಲೇಔಟ್, ಹುಳಿಮಾವು, ಬೆಳ್ಳಂದೂರು, ಎಚ್‌ಎಸ್‌ಆರ್ ಲೇಔಟ್, ಎಲೆಕ್ಟ್ರಾನಿಕ್ ಸಿಟಿ, ಬಸವನಗುಡಿ, ಜಯನಗರ, ಬನಶಂಕರಿ, ಕೆಎಸ್ ಲೇಔಟ್, ತಲಘಟ್ಟಪುರ ಸಂಚಾರಿ ಪೊಲೀಸ್ ಠಾಣೆಗಳಿಗೆ ವಿಶೇಷ ಆದೇಶ ಹೊರಡಿಸಲಾಗಿದೆ. ಹೀಗಾಗಿ ವಾಹನ ಸವಾರರು ಸಂಚಾರಿ ನಿಯಮ ಉಲ್ಲಂಘನೆಗೆ ಫುಲ್‌ಸ್ಟಾಪ್ ಇಡಬೇಕಾಗಿದೆ.

ಔಟರ್ ರಿಂಗ್ ರೋಡ್‌ನಲ್ಲಿ ಪಾರ್ಕಿಂಗ್ ಸಮಸ್ಯೆಗಳು ತೀವ್ರ ಟ್ರಾಫಿಕ್ ಸಮಸ್ಯೆಗಳಿಗೆ ಕಾರಣವಾಗಿವೆ ಎಂಬ ದೃಷ್ಟಿಯಿಂದ ಈ ಕ್ರಮವನ್ನು ತೆಗೆದುಕೊಳ್ಳಲಾಗಿದೆ. ಒಆರ್‌ಆರ್‌ನಲ್ಲಿ ನಿಲುಗಡೆ ಮಾಡಿದ ಒಂದೇ ಒಂದು ವಾಹನವೂ ಸಹ ತೀವ್ರ ಟ್ರಾಫಿಕ್ ಜಾಮ್‌ ಉಂಟುಮಾಡಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.

"ನಾವು ಸಾರ್ವಜನಿಕ ಪ್ರತಿಕ್ರಿಯೆ ಮತ್ತು ರಸ್ತೆಗಳಲ್ಲಿನ ದಟ್ಟಣೆಯ ಬಗ್ಗೆ ನಮ್ಮ ಅವಲೋಕನಗಳ ಆಧಾರದ ಮೇಲೆ ಈ ಜಾರಿ ಡ್ರೈವ್‌ಗಳನ್ನು ನಡೆಸಲು ನಿರ್ಧರಿಸಿದ್ದೇವೆ. ನಾವು ಆದ್ಯತೆಯ ಮೇಲೆ ಈ ರಸ್ತೆಗಳಲ್ಲಿ ಸಂಚಾರ ಉಲ್ಲಂಘನೆಗಳನ್ನು ಗಮನ ಹರಿಸುತ್ತಿದ್ದೇವೆ. ಪ್ರಾಥಮಿಕವಾಗಿ ಪಾರ್ಕಿಂಗ್ ಸಮಸ್ಯೆಗಳಾದ ರಸ್ತೆಬದಿ ಪಾರ್ಕಿಂಗ್, ನೋ-ಪಾರ್ಕಿಂಗ್ ಜಾರಿ ಮತ್ತು ಫುಟ್‌ಪಾತ್ ಪಾರ್ಕಿಂಗ್‌ಗೆ ಗಮನಹರಿಸುತ್ತಿದ್ದೇವೆ" ಎಂದು ಮಾಹಿತಿ ನೀಡಿದ್ದಾರೆ.

ಔಟರ್ ರಿಂಗ್ ರೋಡ್‌ನಲ್ಲಿ, ಪೀಕ್ ಸಮಯದಲ್ಲಿ, ಒಂದು ನಿಲುಗಡೆ ವಾಹನ ಕೂಡ ದಟ್ಟಣೆಗೆ ಕಾರಣವಾಗಬಹುದು. ಬೈಲೇನ್‌ಗಳಲ್ಲಿ ವಾಹನ ನಿಲುಗಡೆ ಮಾಡುವಂತೆ ಸಾರ್ವಜನಿಕರಿಗೆ ಪೊಲಿಸರು ಮನವಿ ಮಾಡಿದ್ದಾರೆ. ಇನ್ನು, ಅಪಾರ್ಟ್‌ಮೆಂಟ್‌ಗಳ ಮುಂದೆ ವಾಹನ ನಿಲುಗಡೆ ಮಾಡುವುದು ಸೇರಿದಂತೆ ಹಲವು ಸ್ಥಳಗಳ ಮೇಲೆ ಗಮನ ಹರಿಸಲಾಗುತ್ತಿದೆ.

ಸಂಚಾರಿ ನಿಯಮ ಉಲ್ಲಂಘನೆ: ಕಠಿಣ ಕ್ರಮ, ಟೋಯಿಂಗ್ ವಾಪಸ್!

ಸಂಚಾರಿ ಅಧಿಕಾರಿಗಳು ನಿಯಮ ಉಲ್ಲಂಘಿಸುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲು ಮುಂದಾಗಿದ್ದಾರೆ. ರಸ್ತೆಗಳಲ್ಲಿ ನಿಲ್ಲಿಸುವ ವಾಹನಗಳನ್ನು ಜಪ್ತಿ ಮಾಡಲಾಗುವುದು ಮತ್ತು ಅಪರಾಧಿಗಳು ನ್ಯಾಯಾಲಯದಲ್ಲಿ ದಂಡವನ್ನು ಪಾವತಿಸಬೇಕಾಗುತ್ತದೆ.

ದಕ್ಷಿಣ ವಿಭಾಗದಲ್ಲಿ ಪ್ರಾಯೋಗಿಕವಾಗಿ ಟೋಯಿಂಗ್ ಅನ್ನು ಮರಳಿ ತರಲು ಪೊಲೀಸರು ಚಿಂತಿಸುತ್ತಿದ್ದಾರೆ. "ನಾವು ಪ್ರಾಯೋಗಿಕವಾಗಿ ಟೋಯಿಂಗ್ ಅನ್ನು ಮರಳಿ ತರಲು ಯೋಜಿಸುತ್ತಿದ್ದೇವೆ. ಇದು ಬೆಳ್ಳಂದೂರು, ಎಚ್‌ಎಸ್‌ಆರ್ ಲೇಔಟ್ ಮತ್ತು ಕನಕಪುರ ರಸ್ತೆಯಂತಹ ಪ್ರಮುಖ ಜನದಟ್ಟಣೆ ಪ್ರದೇಶಗಳಲ್ಲಿ ಜಾರಿಗೆ ತರಲಾಗುವುದು" ಎಂದು ತಿಳಿಸಿದ್ದಾರೆ.ಬೆಂಗಳೂರಿನಲ್ಲಿ ವಾಹನಗಳ ಟೋಯಿಂಗ್ ಅನ್ನು ಫೆಬ್ರವರಿ 2022 ರಿಂದ ಸ್ಥಗಿತಗೊಳಿಸಲಾಗಿದೆ.

English summary

Bengaluru Traffic: Bangalore Traffic Police south division identify main roads and inner roads traffic congestion points in south zone. Know more.