ಜ್ಯೂಸ್ ಟೆಟ್ರಾ ಪ್ಯಾಕ್, ಬಿಸ್ಕೆಟ್ ಪ್ಯಾಕೆಟ್ ನಲ್ಲಿ 20 ಕೋಟಿಯ ಹೆರಾಯಿನ್ ಸಾಗಾಟ

Updated: Thursday, November 15, 2018, 19:51 [IST]

ಪಂಜಾಬ್ ಪೊಲೀಸರು ಬುಧವಾರ ಭರ್ಜರಿ ಬೇಟೆ ಆಡಿದ್ದಾರೆ. ಮಿಜೋರಾಮ್ ನ ಮಹಿಳೆ ಹಾಗೂ ಆಕೆಯ ಸಹಚರ- ಚಾಲಕನಿಂದ 4 ಕೇಜಿ ಹೆರಾಯಿನ್ ಖನ್ನಾ ಜಿಲ್ಲೆಯಲ್ಲಿ ವಶಪಡಿಸಿಕೊಂಡಿದ್ದಾರೆ. ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಅದರ ಮೌಲ್ಯ 20 ಕೋಟಿ ರುಪಾಯಿ ಎನ್ನಲಾಗಿದೆ.

ಖನ್ನಾ ಪೊಲೀಸರು ಅದೇ ನಗರದ, ಚಂಡೀಗಢದಿಂದ 50 ಕಿಲೋಮೀಟರ್ ದೂರದಲ್ಲಿರುವ ರಾಷ್ಟ್ರೀಯ ಹೆದ್ದಾರಿ ಬಳಿಯಲ್ಲಿ ವಾಹನ ತಪಾಸಣೆ ಮಾಡುವಾಗ ಹೆರಾಯಿನ್ ವಶಕ್ಕೆ ಪಡೆದಿದ್ದಾರೆ. ಖಚಿತ ಮಾಹಿತಿ ಮೇರೆಗೆ ಈ ಕಾರ್ಯಾಚರಣೆ ನಡೆಸಿದೆವು ಎಂದು ಹಿರಿಯ ಸೂಪರಿಂಟೆಂಡೆಂಟ್ ಆಫ್ ಪೊಲೀಸ್ ಧ್ರುವ್ ದಹಿಯಾ ತಿಳಿಸಿದ್ದಾರೆ.

ಮಹಿಳೆಯು ಮಿಜೋರಾಂನ ಶಿವಾಂಗಿ ಎಂದು ಗುರುತಿಸಲಾಗಿದೆ. ಇನ್ನು ಕಾರು ಚಾಲಕ ಆನಂದ್ ಕುಮಾರ್ ಪಂಜಾಬ್ ನ ಜಲಂಧರ್ ನವನು ಎನ್ನಲಾಗಿದೆ. ಹೆರಾಯಿನ್ ಅನ್ನು ಜ್ಯೂಸ್ ನ ಟೆಟ್ರಾ ಪ್ಯಾಕ್ ಗಳಲ್ಲಿ ಹಾಗೂ ಬಿಸ್ಕೆಟ್ ಪಾಕೆಟ್ ಗಳಲ್ಲಿ ಅಡಗಿಸಿಡಲಾಗಿತ್ತು. ಅವುಗಳನ್ನು ಗುರುತಿಸದಂತೆ ಮತ್ತೆ ಅದೇ ರೀತಿ ಪ್ಯಾಕ್ ಮಾಡಲಾಗಿತ್ತು.