ಅ15 ರಿಂದ ಸಂಜೆ 6ರ ಮೇಲೆ ಪೆಟ್ರೋಲ್ ಸಿಗೋಲ್ಲ

ಬೆಂಗಳೂರು, ಅ 13: ಪೆಟ್ರೋಲ್ ಬಂಕ್ ಮಾಲೀಕರು ಮತ್ತೆ ಪ್ರತಿಭಟನೆಗೆ ಇಳಿದಿದ್ದಾರೆ. ಈ ಬಾರಿ ವಿನೂತನ ರೀತಿಯಲ್ಲಿ ಪ್ರತಿಭಟನೆ ನಡೆಸಲು ಮುಂದಾಗಿರುವ ಪೆಟ್ರೋಲ್ ಬಂಕ್ ಮಾಲೀಕರು ನಿಗದಿತ ಸಮಯದಲ್ಲಿ ಮಾತ್ರ ಬಂಕ್ ನಿರ್ವಹಿಸಲು ಮುಂದಾಗಿದ್ದಾರೆ.

ಸೋಮವಾರ ಮಹಾಲಯ ಅಮಾವಾಸ್ಯೆಯ ದಿನವಾದ ಅಕ್ಟೋಬರ್ 15ರಿಂದ ನಗರ ಪ್ರದೇಶದಲ್ಲಿ ಬೆಳಗ್ಗೆ 9ರಿಂದ ಸಂಜೆ 6ರ ವರೆಗೆ ಮತ್ತು ಹೊರವಲಯ ಮತ್ತು ಹೆದ್ದಾರಿಗಳಲ್ಲಿ ಸಂಜೆ ಆರರಿಂದ ಬೆಳಗ್ಗೆ 9ಗಂಟೆಯವರೆಗೆ ಮಾತ್ರ ಕಾರ್ಯ ನಿರ್ವಹಿಸಲಿವೆ.

ಸದ್ಯ ಪೆಟ್ರೋಲ್ ಮೇಲೆ ಲೀಟರ್ ಗೆ 1.55 ರೂ, ಡೀಸೆಲ್ ಮೇಲೆ ಲೀಟರ್ ಗೆ 85 ಪೈಸೆ ಕಮಿಷನ್ ಬಂಕ್ ಮಾಲೀಕರು ಪಡೆಯುತ್ತಿದ್ದಾರೆ. ಪೆಟ್ರೋಲ್, ಡೀಸೆಲ್ ಮತ್ತು ಆಟೋ ಎಲ್ಪಿಜಿ ಮೇಲೆ ಶೇ.5ರಷ್ಟು ಕಮಿಷನ್ ನೀಡಬೇಕೆನ್ನುವುದು ಇವರ ಬೇಡಿಕೆ.

ಸದ್ಯ ನಾವು ಪಡೆಯುತ್ತಿರುವ ಕಮಿಷನ್ ನಲ್ಲಿ ಬಂಕ್ ನಿರ್ವಹಣೆ, ಕಾರ್ಮಿಕರ ವೇತನ ಇತ್ಯಾದಿಗಳಿಂದ ಕಷ್ಟವಾಗುತ್ತಿದೆ. ಹಲವು ಬಂಕ್ ಮಾಲೀಕರು ನಷ್ಟ ಅನುಭವಿಸುತ್ತಿದ್ದಾರೆ. ಹೀಗಾಗಿ ಮುಷ್ಕರ ನಡೆಸದೆ ನಮಗೆ ಬೇರೆ ದಾರಿಯಿಲ್ಲ ಎನ್ನುವುದು ಬಂಕ್ ಮಾಲೀಕರ ಹೇಳಿಕೆ.

ನಮ್ಮ ಬೇಡಿಕೆ ಈಡೇರುವವರೆಗೂ ಪ್ರತಿಭಟನೆ ಮುಂದುವರಿಯಲಿದೆ ಎಂದು ಪೆಟ್ರೋಲ್ ಬಂಕ್ ಮಾಲೀಕರು ಸ್ಪಷ್ಟ ಪಡಿಸಿದ್ದಾರೆ.

English summary

The Akhila Karnataka Federation of Petroleum Traders (AKFPT) has decided that bunks will operate only a single shift daily, as the recent hike in petrol and diesel prices had eroded dealers’ commission. Beginning Monday, October 15, petrol bunks in urban areas across the State will work from 9 am and 6 pm, while those outside the city areas and on highways will function only between 6 pm and 6 am.