ಇಂದಿನಿಂದಲೇ BIAL ಸುಂಕ ಸಂಗ್ರಹಕ್ಕೆ ಕೋರ್ಟ್ ಅಸ್ತು

ಬೆಂಗಳೂರು, ಆ.31: ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ (BIAL) ಹೋಗುವ ಮಾರ್ಗದಲ್ಲಿ ಚಿಕ್ಕಜಾಲ ಸಮೀಪ ಸಾದರಹಳ್ಳಿ ಗೇಟಿನ ಬಳಿ ಟೋಲ್ ಪಾವತಿ (ರಸ್ತೆ ಸುಂಕ) ಜಾಸ್ತಿಯಾಯಿತೆಂದು ಐದು ತಿಂಗಳ ಹಿಂದೆ (ಫೆ. 13) ಗೋಳಾಡಿದ್ದ ಸಂಚಾರಿಗಳ ಅಳಲಿಗೆ ಯಾವುದೇ ಕಿಮ್ಮತ್ತು ದೊರೆತಿಲ್ಲ. ಚಿಕ್ಕಜಾಲ ಟೋಲ್ ಗೇಟ್ ಮೂಲಕ ಸಂಚರಿಸುವ ವಾಹನ ಸವಾರರಿಂದ ಟೋಲ್ ವಸೂಲಿ ಮಾಡುವುದಕ್ಕೆ ಯಾವುದೇ ಅಭ್ಯಂತರವಿಲ್ಲ ಎಂದು ಹೈಕೋರ್ಟ್ ನಿನ್ನೆ ಹೇಳಿದೆ.

ಸುಂಕದವನ ಮುಂದೆ ಸುಖ-ದುಃಖವೇ?: ಈ ಸಂಬಂಧ ದೇವನಹಳ್ಳಿ ಕೋರ್ಟ್ ನೀಡಿದ್ದ ತಡೆಯಾಜ್ಞೆಯನ್ನು ಹೈಕೋರ್ಟ್ ತೆರವುಗೊಳಿಸಿದೆ. ಆದ್ದರಿಂದ ರಸ್ತೆ ನಿರ್ವಹಣೆ ಹೊಣೆ ಹೊತ್ತಿರುವ ನವಯುಗ ದೇವನಹಳ್ಳಿ ಟೋಲ್ ವೆ ಪ್ರೈವೇಟ್ ಲಿಮಿಟೆಡ್ (NDTPL) ಕಂಪನಿ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ಚಿಕ್ಕಜಾಲ ಟೋಲ್ ಗೇಟಿನಲ್ಲಿ (NH-7 Bangalore-Bellary road) ಇಂದಿನಿಂದಲೇ ವಾಹನ ಸವಾರರಿಂದ ಸುಂಕ ವಸೂಲಿ ಮಾಡಬಹುದಾಗಿದೆ.

'ಟೋಲ್ ಸಂಗ್ರಹವು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಪ್ರಯಾಣಿಸುವವರನ್ನು ಗಮನದಲ್ಲಿಟ್ಟುಕೊಂಡು ದುಬಾರಿಗೊಳಿಸಲಾಗಿದೆ. ಆದರೆ ಸುತ್ತಮುತ್ತಲ ರೈತಾಪಿ ವರ್ಗದವರು ರಾಜಧಾನಿಗೆ ಕೃಷ್ಯುತ್ಪನ್ನ ತರುವಂತಾಗಲು ಅನೇಕ ಕಾಲದಿಂದ ಈ ರಸ್ತೆಯು ಅನುಕೂಲಕರವಾಗಿದೆ.
ಆದ್ದರಿಂದ ದುಬಾರಿ ಸುಂಕ ಬೇಡವೆಂದು ಕೆಲ ವಕೀಲರು ಸ್ಥಳೀಯ ಕೋರ್ಟಿಗೆ ಮೊರೆಹೋಗಿದ್ದರು.

ಕಳೆದ ಫೆಬ್ರವರಿಯಲ್ಲಿ ಈ ಮಾರ್ಗದಲ್ಲಿ ಸಂಚರಿಸುವ BMTC ವಾಯುವಜ್ರ ಬಸ್ ಸಂಚಾರ ಪ್ರಯಾಣ ದರವನ್ನೂ ಹೆಚ್ಚಿಸಲಾಗಿತ್ತು. ದುಬಾರಿ ಟೋಲ್ ಪಾವತಿ ಕಡ್ಡಾಯಗೊಳಿಸಿರುವುದನ್ನು ವಿರೋಧಿಸಿ, ಲಾರಿ ಚಾಲಕರು ಭಾರಿ ಮುಷ್ಕರ ನಡೆಸಿದ್ದರು.

English summary

The stay on the collection of toll at the Sadarhalli Gate on the way to BIAL (on the NH-7 Bangalore-Bellary road) has been vacated by The Karnataka High Court on Thursday. As such The Navayuga Devanahalli Tollway Private Limited (NDTPL) would begin the toll collection from Friday (Aug 31).