ಗರಿ ಗರಿ ಮಸಾಲೆ ದೋಸೆಗೆ ಸಿಕ್ತು ವಿಶ್ವ ಗರಿಮೆ!

ನ್ಯೂಯಾರ್ಕ್, ಜುಲೈ 9: ನಮ್ಮ ನಿಮ್ಮೆಲ್ಲರ ಅಚ್ಚುಮೆಚ್ಚಿನ ಗರಿ ಗರಿ ಮಸಾಲೆ ದೋಸೆಗೆ ವಿಶ್ವ ಗರಿಮೆ ಪ್ರಾಪ್ತಿಯಾಗಿದೆ. 'ಜೀವನದಲ್ಲಿ ಒಮ್ಮೆ ನೋಡಿ ಜೋಗಾ ಗುಂಡಿ' ಎಂದು ಅಣ್ಣಾವ್ರು ಹಾಡಿರುವಂತೆ 'ಸಾಯೋಕ್ಮುಂಚೆ ಒಮ್ಮೆ ಮಸಲಾ ದೋಸೆಯನ್ನು ಮುರಿದು ಬಾಯಲ್ಲಿಟ್ಟುಕೊಂಡು ಶಿವಾ ಅನ್ನಿ!' ಎಂದಿದೆ ಖ್ಯಾತ Huffington Post ವೆಬ್ ಸೈಟ್.

ಪ್ರವಾಸೋದ್ಯಮಕ್ಕೆ ಸಂಬಂಧಿಸಿದಂತೆ Viator ಎಂಬ ಬ್ಲಾಗ್ ದಾತರು Huffington Post ಪರವಾಗಿ ಪಟ್ಟೀಕರಿಸಿರುವ ಪಟ್ಟಿಯಲ್ಲಿ ಮಸಾಲೆ ದೋಸೆಗೆ ಈ ಪಟ್ಟ ಗಿಟ್ಟಿದೆ. ದಕ್ಷಿಣ ಭಾರತದ ಅದರಲ್ಲೂ ಕರ್ನಾಟಕದ ಈ ತಿಂಡಿಯನ್ನು ಒಂದೇ ಒಂದು ಬಾರಿಯಾದರೂ taste ಮಾಡಿ ಎಂದು ಪ್ರಪಂಚ ಪರ್ಯಟನಕಾರರಿಗೆ 'ಉಚಿತ' ಸಲಹೆ ನೀಡಿದೆ.

ಉಳಿದಂತೆ ಅಮೆರಿಕದ BBQ ribs, ಚೀನಾದ Peking duck ಮತ್ತು ಜಪಾನಿನ teppanyaki ತಿಂಡಿಯನ್ನೂ ನಿಮ್ಮ ಜಿಹ್ವಾ ಸಾಮರ್ಥ್ಯಕ್ಕೆ ತಕ್ಕಂತೆ ತಿನ್ನಿ ಎನ್ನುತ್ತಿದೆ Huffington Post ಸಿದ್ಧಪಡಿಸಿರುವ ಪಟ್ಟಿ.

ಪ್ಲೇಟ್ ತುಂಬಾ ಹರಡಿಕೊಳ್ಳುವ, ತೆಳುವಾದ ಈ ದೋಸೆಯನ್ನು ಅಕ್ಕಿ ಮತ್ತು ಉದ್ದಿನ ಬೇಳೆಯಿಂದ ತಯಾರಿಸಲಾಗುತ್ತದೆ. ಸುಡುವ ಕಾವಲಿಯ ಮೇಲೆ ರುಬ್ಬಿದ ಹಿಟ್ಟನ್ನು ಹರಡಿ ಈ ದೋಸೆಯನ್ನು ಎಬ್ಬಿಸಲಾಗುತ್ತದೆ. ಬೆಂದ ಆಲೂಗಡ್ಡೆ- ಈರುಳ್ಳಿಯ ಪಲ್ಯ ಮತ್ತು ಬೇಕಾದಷ್ಟು ಬೆಳ್ಳುಳ್ಳಿ ಚಟ್ನಿಯನ್ನೂ serve ಮಾಡಲಾಗುತ್ತದೆ ಎಂದು ಚಿಕ್ಕದಾಗಿ ಚೊಕ್ಕವಾಗಿ ಮಸಾಲೆ ದೋಸೆ ತಯಾರಿ ಬಗ್ಗೆ ವಿವರಣೆಯನ್ನೂ ವೆಬ್ ಸೈಟ್ ನಲ್ಲಿ ನೀಡಲಾಗಿದೆ.

English summary

Huffington Post names Masala dosa in tops 10 dishes. Popular South Indian dish Masala dosa has been listed as the 'top 10 Foods to Try Before You Die', according to a list compiled by the Huffington Post.