ಶ್ರೀರಾಮುಲುಗೆ ಬಿಜೆಪಿ ಬಾಗಿಲು ಮುಚ್ಚಿದೆ: ಸಿಎಂ ಡಿವಿಎಸ್

ಬೆಂಗಳೂರು, ಡಿ.4: "ನಮ್ಮ ಅಂಗಡಿ ಬೀಗವನ್ನು ಬೇರೆಯವರಿಗೆ ನಂಬಿ ಕೊಟ್ಟಿದ್ದೆವು. ಈಗ ಅದನ್ನು ವಾಪಾಸ್ ಪಡೆದಿದ್ದೇವೆ. ಶ್ರೀರಾಮುಲು ಅವರ ಜಯವನ್ನು ಸ್ವಾಗತಿಸುತ್ತೇನೆ. ಆದರೆ, ಅವರನ್ನು ಮತ್ತೆ ಪಕ್ಷಕ್ಕೆ ಸೇರಿಸಿಕೊಳ್ಳುವುದಿಲ್ಲ. ಬಿಜೆಪಿಗೆ ಬಾಗಿಲು ಅವರಿಗೆ ಮುಚ್ಚಿದೆ" ಎಂದು ಮುಖ್ಯಮಂತ್ರಿ ಡಿವಿ ಸದಾನಂದ ಗೌಡರು ಬಳ್ಳಾರಿ ಉಪ ಚುನಾವಣೆ ಫಲಿತಾಂಶದ ಬಗ್ಗೆ ತಕ್ಷಣದ ಪ್ರತಿಕ್ರಿಯೆ ನೀಡಿದ್ದಾರೆ.

ಬಳ್ಳಾರಿಯಲ್ಲಿ ಕಳೆದ 15 ದಿನಗಳಿಂದ ಉತ್ತಮ ಸಾಧನೆ ಮೆರೆದಿದೆ. ಶೂನ್ಯದಿಂದ 17 ಸಾವಿರದಷ್ಟು ಮತಗಳಿಸುವುದು ಸುಲಭವಲ್ಲ. ಮುಂದಿನ ಚುನಾವಣೆಯಲ್ಲಿ ನಮಗೆ ಗೆಲುವು ಲಭಿಸಲಿದೆ. ಸಾಮೂಹಿಕ ನಾಯಕತ್ವದಡಿಯಲ್ಲಿ ಬಳ್ಳಾರಿಯಲ್ಲಿ ಪ್ರಚಾರ ಕಾರ್ಯ ನಡೆಸಲಾಯಿತು. ಮುಂದೆ ಕೂಡಾ ಸಮೂಹಿಕ ನಾಯಕತ್ವವನ್ನೇ ಬಿಜೆಪಿ ಬಳಸಲಿದೆ ಎಂದು ಸಿಎಂ ಸದಾನಂದ ಗೌಡ ಹೇಳಿದರು.

ನಗರದ ಬನಶಂಕರಿಯಲ್ಲಿ ನಿರ್ಮಾಣಗೊಂಡಿರುವ ನೂತನ ಟಿಟಿಎಂಸಿ ಬಸ್ ನಿಲ್ದಾಣದ ಉದ್ಘಾಟನೆ ಕಾರ್ಯ ನೆರವೇರಿಸಿದ ನಂತರ ಸದಾನಂದ ಗೌಡರು ಚುನಾವಣಾ ಫಲಿತಾಂಶದ ಬಗ್ಗೆ ಪ್ರತಿಕ್ರಿಯೆ ನೀಡಿದರು. ಶ್ರೀರಾಮುಲು ಗೆಲುವಿನಿಂದ ಸರ್ಕಾರಕ್ಕೆ ಯಾವುದೇ ತೊಂದರೆಯಾಗುವುದಿಲ್ಲ. ಪಕ್ಷದಿಂದ ಅಮಾನತುಗೊಂಡ ಬಳ್ಳಾರಿ ಶಾಸಕರನ್ನು ಹಿಂದಕ್ಕೆ ಕರೆಸಿಕೊಳ್ಳುವ ಪ್ರಶ್ನೆಯೇ ಇಲ್ಲ ಎಂದು ಸದಾನಂದ ಗೌಡ ಸ್ಪಷ್ಟಪಡಿಸಿದ್ದಾರೆ.

ಈ ನಡುವೆ ಕಾರ್ಯಕರ್ತರ ಗೊಂದಲದಿಂದ ಬಿಜೆಪಿಗೆ ಸೋಲು ಉಂಟಾಗಿದೆ ಎಂದು ಬಿಜೆಪಿ ನಾಯಕ ಆರ್ ಅಶೋಕ್ ಅವರು ಒಪ್ಪಿಕೊಂಡಿದ್ದಾರೆ.

English summary

Bellary By Election 2011 result: CM Sadananda Gowda in his quick reaction said BJP's performance over last 15 days in Bellary was good. we have to accept defeat and i will welcome B Sriramulu victory. But BJP never welcomes his come back to party said CM DV Sadananda Gowda.