• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಮೈಸೂರಿಗರನ್ನು ದಿಕ್ಕೆಡಿಸಿದ ಪುಂಡ ಆನೆ ಮಾಸ್ತಿ

By * ಬಿಎಂ ಲವಕುಮಾರ್, ಮೈಸೂರು
|
ಮೈಸೂರು, ಆ. 22 : ಜೆಎಸ್‌ಎಸ್ ಮಠಕ್ಕೆ ಸೇರಿದ ಸಾಕಾನೆಯೊಂದು ರಸ್ತೆಯಲ್ಲಿ ತೆರಳುತ್ತಿದ್ದಾಗ ಎದುರಿನಿಂದ ಶಬ್ದ ಮಾಡಿಕೊಂಡು ಬಂದ ಆಂಬ್ಯುಲೆನ್ಸ್‌ಗೆ ಹೆದರಿ ದಿಕ್ಕಾಪಾಲಾಗಿ ಓಡಿದ ಪರಿಣಾಮ ನಗರದ ಚಾಮುಂಡಿಪುರಂ ವ್ಯಾಪ್ತಿಯಲ್ಲಿ ಕೆಲಕಾಲ ಆತಂಕದ ವಾತಾವರಣ ಸೋಮವಾರ ಸೃಷ್ಟಿಯಾಗಿತ್ತು.

ಕಳೆದ ಎರಡು ತಿಂಗಳ ಹಿಂದೆಯಷ್ಟೇ ಮೈಸೂರಿಗೆ ಕಾಡಾನೆ ನುಗ್ಗಿ ದಾಂಧಲೆ ನಡೆಸಿದ್ದು ಇನ್ನೂ ಹಸಿರಾಗಿರುವಾಗಲೇ ರಸ್ತೆಯಲ್ಲಿ ಓಡಿ ಬರುತ್ತಿದ್ದ ಆನೆಯನ್ನು ಕಂಡ ಜನರು ಎಲ್ಲೆಂದರಲ್ಲಿ ಓಡಿ ಬದುಕಿದರೆ ಸಾಕಪ್ಪಾ ಎಂದು ನಿಟ್ಟುಸಿರು ಬಿಡತೊಡಗಿದ್ದರು. ಆದರೆ ಆನೆ ಹಿಂದೆಯೇ ಮಾವುತ ಹಿಂಬಾಲಿಸಿ ಬರುತ್ತಿದ್ದುದನ್ನು ಕಂಡ ಜನರು ಇದು ಕಾಡಾನೆ ಅಲ್ಲ ಸಾಕಾನೆ ಎಂಬುವುದನ್ನು ಮನದಟ್ಟು ಮಾಡಿಕೊಂಡರಾದರೂ ಕಾಲಿಗೆ ಬುದ್ದಿ ಹೇಳುವುದನ್ನು ಮರೆಯಲಿಲ್ಲ.

ಘಟನೆಯ ವಿವರ : ಮೈಸೂರಿನ ಚಾಮುಂಡಿಬೆಟ್ಟದ ತಪ್ಪಲಿನಲ್ಲಿರುವ ಸುತ್ತೂರು ಮಠದಲ್ಲಿ ಲಕ್ಷ್ಮಿ ಹಾಗೂ ಮಾಸ್ತಿ ಎಂಬ ಎರಡು ಸಾಕಾನೆಗಳಿದ್ದು, ಇವುಗಳನ್ನು ಮಠದಿಂದ ವಿಹಾರಕ್ಕೆ ಕರೆದೊಯ್ಯಲಾಗುತ್ತದೆ. ಸಾಮಾನ್ಯವಾಗಿ ಮಠದಿಂದ ಹೊರಕ್ಕೆ ಕರೆತರುವ ಮಾವುತರು ಅಗ್ರಹಾರ, ಬಸವೇಶ್ವರ ರಸ್ತೆ, ಚಾಮುಂಡಿಪುರಂ ವೃತ್ತಕ್ಕಾಗಿ ವಿಹಾರ ನಡೆಸಿ ಬಳಿಕ ಮಠಕ್ಕೆ ಕರೆದೊಯ್ಯುತ್ತಾರೆ.

ಅದರಂತೆ ಇಂದು ಮಧ್ಯಾಹ್ನ ಲಕ್ಷ್ಮಿ ಹಾಗೂ ಮಾಸ್ತಿ ಸಾಕಾನೆಗಳು ವಿಹಾರ ಮುಗಿಸಿ ಮಠದತ್ತ ತೆರಳುತ್ತಿದ್ದವು. ಚಾಮುಂಡಿಪುರಂ ವೃತ್ತದ ಬಳಿ ದಿಢೀರ್ ಶಬ್ದ ಮಾಡಿಕೊಂಡು ಎದುರಿನಿಂದ ಆಂಬ್ಯುಲೆನ್ಸ್ ವಾಹನ ಬಂದಿದೆ. ಶಬ್ದ ಕೇಳಿದ ಮಾಸ್ತಿ ಎಂಬ ಆನೆ ಹೆದರಿ ದಿಕ್ಕಾಪಾಲಾಗಿ ಓಡಿದೆ. ಜೊತೆಯಲ್ಲಿದ್ದ ಮಾವುತ ಅದನ್ನು ನಿಯಂತ್ರಿಸಲು ಮಾಡಿದ ಪ್ರಯತ್ನವೆಲ್ಲಾ ಈ ಸಂದರ್ಭ ವಿಫಲವಾಯಿತಲ್ಲದೆ, ಆತನ ಮೇಲೆಯೇ ದಾಳಿ ಮಾಡಲು ಮುಂದಾಯಿತು.

ಮರವೇರಿದ ಮಾವುತ : ರಸ್ತೆಯಲ್ಲಿ ಓಡಿದ ಪರಿಣಾಮ ಆಟೋ ರಿಕ್ಷಾವೊಂದು ಜಖಂಗೊಂಡಿತ್ತಾದರೂ ಯಾವುದೇ ಅನಾಹುತವಾಗಿಲ್ಲ. ಕೂಡಲೇ ಸಾಕಾನೆ ಲಕ್ಷ್ಮಿಯ ಮೂಲಕ ಮಾಸ್ತಿಯನ್ನು ನಿಯಂತ್ರಿಸಲು ಪ್ರಯತ್ನಿಸಲಾಯಿತು. ಆಗ ನಿಯಂತ್ರಣಕ್ಕೆ ಬಂದ ಮಾಸ್ತಿ ಮಠದ ಕಡೆಗೆ ತೆರಳಿತ್ತಾದರೂ ಮತ್ತೆ ತನ್ನ ಪುಂಡಾಟಿಕೆ ಪ್ರಾರಂಭಿಸಿತು. ಅಲ್ಲೇ ಇದ್ದ ಮರಕ್ಕೆ ಮೈಯ್ಯನ್ನು ಉಜ್ಜಲಾರಂಭಿಸಿತು. ಇದರಿಂದ ಹೆದರಿದ ಮಾವುತ ಮರವನ್ನೇರಿ ತಪ್ಪಿಸಿಕೊಂಡನು.

ಈ ಸಂದರ್ಭ ಲಕ್ಷ್ಮಿಯ ಮಾವುತನೇ ಮಾಸ್ತಿಯನ್ನು ನಿಯಂತ್ರಿಸಲು ಹೆಣಗಾಡಬೇಕಾಯಿತು. ಬಳಿಕ ಅಲ್ಲಿಂದ ಮುಂದೆ ಸಾಗಿದ ಆನೆ ಸ್ಮಶಾನದೊಳಕ್ಕೆ ಸೇರಿಕೊಂಡಿತು. ಅಷ್ಟರಲ್ಲಿಯೇ ಮೈಸೂರಿಗೆ ಆಗಮಿಸಿರುವ ಗಜಪಡೆಯ ಪೈಕಿ ಪುಂಡಾನೆಗಳನ್ನು ನಿಯಂತ್ರಿಸುವಲ್ಲಿ ಹೆಸರು ಮಾಡಿರುವ ಅಭಿಮನ್ಯು ಹಾಗೂ ಗಜೇಂದ್ರ ಎಂಬ ಎರಡು ಆನೆಗಳನ್ನು ಸ್ಥಳಕ್ಕೆ ಕರೆಸಲಾಯಿತು. ಅವುಗಳು ಮಾಸ್ತಿಯನ್ನು ನಿಯಂತ್ರಿಸಿ ಮಠಕ್ಕೆ ಸೇರಿಸಿದವು. ಇದರಿಂದ ಸುಮಾರು ಎರಡು ಗಂಟೆಗಳ ಕಾಲ ಸೃಷ್ಟಿಯಾಗಿದ್ದ ಆತಂಕ ದೂರವಾಯಿತಲ್ಲದೆ, ಈ ವ್ಯಾಪ್ತಿಯ ಜನ ನೆಮ್ಮದಿಯ ಉಸಿರು ಬಿಟ್ಟರು.

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

English summary
Elephant runs amok again in Mysore. Domestic elephant Masti runs helter and skelter reminding the public about the elephant menace happened two months back.

Oneindia ಬ್ರೇಕಿಂಗ್ ನ್ಯೂಸ್,
ತಾಜಾ ಸುದ್ದಿ ತಕ್ಷಣವೇ ಪಡೆಯಿರಿ

Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more