ಮಂತ್ರಿಗಿರಿಗೆ ಕಚ್ಚಾಟ, ಕಗ್ಗಂಟಾದ ಕರ್ನಾಟಕ

ಬೆಂಗಳೂರು, ಆ. 04 : ಭಿನ್ನಮತದ ಹೊಗೆ ಎಬ್ಬಿಸಿರುವ ಜಗದೀಶ್ ಶೆಟ್ಟರ್ ಬಣ ಹೊಸ ನೆವ, ಹೊಸ ಬೇಡಿಕೆಗಳನ್ನು ಮುಂದಿಡುತ್ತ ಡಿವಿ ಸದಾನಂದ ಗೌಡರ ನಾಯಕತ್ವದಲ್ಲಿ ರಚನೆಯಾಗುತ್ತಿರುವ ಸರಕಾರಕ್ಕೆ ನಾನಾ ತೊಂದರೆಗಳನ್ನು ಒಡ್ಡುತ್ತಿದೆ. ಮಂತ್ರಿಗಿರಿಗೆ ಸಂಬಂಧಿಸಿದಂತೆ ಭಾರೀ ಕಚ್ಚಾಟ ಶುರುಹಚ್ಚಿಕೊಂಡಿದೆ.

ಇಂದು ಸಂಜೆ 4.30ಕ್ಕೆ ರಾಜಭವನದಲ್ಲಿ ನಡೆಯಲಿರುವ ಪ್ರಮಾಣವಚನ ಸಮಾರಂಭದಲ್ಲಿ ಭಾಗವಹಿಸದಿರಲು ತೀರ್ಮಾನ ತೆಗೆದುಕೊಂಡಿರುವ ಶೆಟ್ಟರ್ ಮತ್ತು ಸಂಗಡಿಗರು ವರಿಷ್ಠರೇ ಹೊಸ ಸಂಪುಟವನ್ನು ರಚಿಸಬೇಕು ಎಂಬ ಹೊಸ ಬೇಡಿಕೆ ಮುಂದಿಟ್ಟಿದ್ದಾರೆ.

ಮೊದಲು, ನೋವಾಗುವಂತೆ ಯಡ್ಡಿ ಬಳಗ ಮಾತನಾಡಿದೆ, ಶಾಸಕರನ್ನು ಕೊಳ್ಳಲಾಗಿದೆ, ಬ್ಲಾಕ್ ಮೇಲ್ ಮಾಡಿ ಓಟು ಗಳಿಸಲಾಗಿದೆ ಎಂಬೆಲ್ಲ ವಾದವನ್ನು ಶೆಟ್ಟರ್ ಬಳಗ ಮುಂದಿಟ್ಟಿತ್ತು. ಈಗ ಸಂಪುಟ ರಚನೆ ಮತ್ತು ಖಾತೆ ಹಂಚಿಕೆ ಕುರಿತಂತೆ ಕ್ಯಾತೆ ತೆಗೆದಿದೆ.

ಬಿಜೆಪಿಯಲ್ಲಿ ಎಲ್ಲವೂ ಸರಿಯಾಗಿದೆ, ಎಲ್ಲರೂ ಪ್ರಮಾಣವಚನದಲ್ಲಿ ಭಾಗವಹಿಸುತ್ತಿದ್ದಾರೆ ಎಂದು ಸದಾನಂದ ಗೌಡರು ನಗುನಗುತ್ತಾ ಹೇಳುತ್ತಿದ್ದರೂ, ಯಾವುದೂ ಸರಿಯಿಲ್ಲ ಎಂದು ಭಿನ್ನರ ನಾಯಕರನೇಕರು ಹೇಳುತ್ತಿರುವ ಮಾತುಗಳಿಂದಲೇ ವೇದ್ಯವಾಗುತ್ತಿದೆ.

ಇಂದು ಸಂಜೆಯೇ ಜಗದೀಶ್ ಶೆಟ್ಟರ್ ನವದೆಹಲಿಗೆ ಧಾವಿಸುತ್ತಿದ್ದು, ಬಿಜೆಪಿ ವರಿಷ್ಠರೊಡನೆ ಮುಂದಿನ ನಡೆಗಳ ಬಗ್ಗೆ ಚರ್ಚಿಸಲಿದ್ದಾರೆ. ಅಂದ ಹಾಗೆ, ಇಂದು ಸದಾನಂದ ಗೌಡರೊಬ್ಬರೇ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ.

English summary

Just before sworn-in ceremony of DV Sadananda Gowda, the dissident BJP MLAs under Jagadish Shettar have brought another headache to the BJP high command. They have demanded that high command should form the cabinet and not DVS and BJP combination.