ಕಸದ ವಾಹನದಲ್ಲಿ ಹುತಾತ್ಮ ಯೋಧರ ಶವ ಯಾತ್ರೆ!

ದಾಂತೇವಾಡ ಜೂ 29: ದೇಶ ಕಾಯುವ ಯೋಧರನ್ನು ಕಸದ ಸಮಾನವಾಗಿ ಛತ್ತೀಸ್‌ಗಢ ರಾಜ್ಯ ಅವಮಾನಿಸಿದ ಘಟನೆ ನಡೆದಿದೆ. ನಕ್ಸಲರ ವಿರುದ್ಧ ಹೋರಾಡಿ ಹುತಾತ್ಮರಾದ ಯೋಧರನ್ನು ಕಸ ಸಾಗಿಸುವ ನಗರ ಪಾಲಿಕೆ ಟ್ರಕ್‌ನಲ್ಲಿ ಸಾಗಿಸಲಾಗಿದೆ. ಈ ಘಟನೆ ನಡೆದಿರುವುದನ್ನು ಒಪ್ಪಿಕೊಂಡಿರುವ ಸ್ಥಳೀಯ ಪೊಲೀಸ್ ಮುಖ್ಯಸ್ಥರು, ಆಂಬ್ಯುಲೆನ್ಸ್ ಆಗಲಿ, ಇತರೆ ವಾಹನವಾಗಲಿ ಸಿಗಲಿಲ್ಲ ಎಂದು ಸಮಜಾಯಿಸಿ ನೀಡಿದ್ದಾರೆ.

ಕಿರಂದುಲ್ ಎಂಬಲ್ಲಿ ನೆಲಬಾಂಬ್ ಸ್ಫೋಟಿಸಿ ಮೂವರು ಯೋಧರನ್ನು ನಕ್ಸಲರು ಬಲಿತೆಗೆದುಕೊಂಡಿದ್ದರು. ಮಂಗಳವಾರ ನಕ್ಸಲರಿಗೆ ಬಲಿಯಾದ ಲಕ್ಷ್ಮಣ್ ಭಗತ್, ಅಲ್ಸಾನ್ ಎಕ್ಕಾ ಹಾಗೂ ಭೂಷಣ್ ಮಾಂಡವಿ ಎಂಬ ಯೋಧರ ಶವವನ್ನು ಸಾಗಿಸಲು ಬೇರೆ ವಾಹನ ಸಿಗದಿದ್ದಾಗ, ಪೊಲೀಸರು ಪಾಲಿಕೆಯ ಕಸ ಸಾಗಿಸುವ ವಾಹನವನ್ನೇ ಬಳಸಿ 40 ಕಿ.ಮೀ ದೂರವಿರುವ ದಾಂತವೇಡಕ್ಕೆ ಒಯ್ದಿದ್ದಾರೆ.

ಟ್ರಕ್ ಅನ್ನು ಸ್ವಚ್ಛ ಮಾಡಿ ಬಳಿಕ ಯೋಧರ ಶವವನ್ನು ಅದರಲ್ಲಿ ಇರಿಸಲಾಯಿತು ಎಂದು ದಾಂತೇವಾಡ ಪೊಲೀಸ್ ಸೂಪರಿಂಟೆಂಡೆಂಟ್ ಅಂಕಿತ್ ಗಾರ್ಗ್ ತಿಳಿಸಿದ್ದಾರೆ. ಆದರೆ, ದಾಂತೇವಾಡ ಸುತ್ತಮುತ್ತಲಿನ ಜನರು ಪೊಲೀಸರ ಹೇಳಿಕೆಯನ್ನು ತಳ್ಳಿ ಹಾಕಿದ್ದಾರೆ. ಸ್ಥಳೀಯ ಜಿಲ್ಲಾಧಿಕಾರಿ ಕೂಡಾ ಪೊಲೀಸರ ಕ್ರಮವನ್ನು ಸಮರ್ಥಿಸಿಕೊಂಡಿದ್ದಾರೆ.

ಆದರೆ ಕಿರಂದುಲ್ ಸುತ್ತಮುತ್ತ ಬೇಕಾದಷ್ಟು ಅಂಬ್ಯುಲೆನ್ಸ್‌ಗಳಿವೆ, ಆಸ್ಪತ್ರೆಗಳಿವೆ. ಹೀಗಿದ್ದರೂ, ಇದರ ಅಗತ್ಯ ಪಡೆಯಲು ಪೊಲೀಸರು ಪ್ರಯತ್ನಿಸದೇ ಕಸದ ಟ್ರಕ್‌ನಲ್ಲಿ ಯೋಧರ ಶವ ಸಾಗಿಸಿ ಅವಮಾನ ಮಾಡಿದ್ದಾರೆಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

English summary

Dantewada police defended that due to the un availability of other vehicles we used garbage truck after cleaning. This is the reaction to disrespect to our martyrs, the bodies of three Chhattisgarh policemen were brought to Dantewada in a Municipal garbage truck.