ಎಂಸಿಐ ತಜ್ಞರ ಸಮಿತಿಯಲ್ಲಿ ಡಾ ದೇವಿಶೆಟ್ಟಿ

ನವದೆಹಲಿ, ಮೇ. 16 : ಭ್ರಷ್ಟಾಚಾರದಲ್ಲಿ ಸಿಲುಕಿರುವ ಭಾರತೀಯ ವೈದ್ಯಕೀಯ ಮಂಡಳಿಯನ್ನು(ಎಂಸಿಐ) ಕೇಂದ್ರ ಸರಕಾರ ಶನಿವಾರ ವಿಸರ್ಜಿಸಿದೆ. ಅದರ ಜಾಗದಲ್ಲಿ ಬೆಂಗಳೂರಿನ ನಾರಾಯಣ ಹೃದಯಾಲಯದ ಡಾ ದೇವಿ ಶೆಟ್ಟಿ ಸೇರಿದಂತೆ 6 ಮಂದಿ ತಜ್ಞ ವೈದ್ಯರ ಸಮಿತಿಯನ್ನು ರಚಿಸಲಾಗಿದೆ.

ಎಂಸಿಐ ಅಧ್ಯಕ್ಷರಾಗಿದ್ದ ಡಾ ಕೇತನ್ ದೇಸಾಯಿ ಇತ್ತೀಚೆಗೆ ಲಂಚ ಪ್ರಕರಣದಲ್ಲಿ ಸಿಲುಕಿದ ಹಿನ್ನೆಲೆಯಲ್ಲಿ 76 ವರ್ಷಗಳ ಹಿಂದೆ ರಚಿಸಲಾಗಿದ್ದ ಮಂಡಳಿಯ ವಿಸರ್ಜನೆಯ ಸುಗ್ರಿವಾಜ್ಞೆಗೆ ರಾಷ್ಟ್ರಪತಿ ಪ್ರತಿಭಾ ಪಾಟೀಲ್ ಸಹಿ ಹಾಕಿದರು. ಈ ಸಂಬಂಧ ಕಾನೂನು ಸಚಿವಾಲಯ ಅಧಿಸೂಚನೆ ಹೊರಡಿಸಿದೆ. ಡಾ ಎಸ್ಕೆ ಶರೀನ್ ನೇತೃತ್ವದಲ್ಲಿ ರಚಿಸಲಾಗಿರುವ ಸಮಿತಿಯಲ್ಲಿ ಡಾ ರಂಜಿತ್ ರಾಯ್ ಚೌಧರಿ, ಸೀತಾ ನಾಯಕ್, ಗೌತಮ್ ಸೇನ್, ಡಾ ದೇವಿ ಶೆಟ್ಟಿ ಹಾಗೂ ಆರ್ ಎಲ್ ಸಾಲ್ಡಾನಾ ಇದ್ದಾರೆ.

ಈ ವೈದ್ಯರ ಸಮಿತಿ ಮುಂದಿನ ಒಂದು ವರ್ಷದವರೆಗೆ ಕಾರ್ಯನಿರ್ವಹಿಸಲಿದೆ ಎಂದು ಆರೋಗ್ಯ ಸಚಿವಾಲಯದ ಕಾರ್ಯದರ್ಶಿ ಸುಜಾತಾ ರಾವ್ ತಿಳಿಸಿದ್ದಾರೆ. ದೇಶದಲ್ಲಿ ವೈದ್ಯಕೀಯ ಶಿಕ್ಷಣವನ್ನು ನಿಯಂತ್ರಿಸಲು ಮೇಲುಸ್ತುವಾರಿ ಮಂಡಳಿಯ ರಚನೆಗೆ ಹೊಸ ಕಾನೂನು ತರಲಾಗುವುದು ಎಂದು ಸರಕಾರ ತಿಳಿಸಿದೆ.