ಭಾರತವನ್ನು ಕೂಡಿಸಬೇಕಿದೆ : ರಾಹುಲ್ ಗಾಂಧಿ

ಪನ್ವೆಲ್, ಅ. 8 : ಮಹಾರಾಷ್ಟ್ರದಲ್ಲಿ ವಿಧಾನಸಭೆ ಚುನಾವಣೆಗಳ ದಿನದಿಂದ ದಿನಕ್ಕೆ ರಂಗೇರುತ್ತಿದ್ದು, ರಾಜಕೀಯ ಪಕ್ಷಗಳ ಪ್ರಚಾರ ಕಾರ್ಯದ ಭರಾಟೆ ಮುಗಿಲು ಮುಟ್ಟಿದೆ. ಇಂದು ಪನ್ವೆಲ್ ಕ್ಷೇತ್ರದಲ್ಲಿ ಚುನಾವಣೆಯಲ್ಲಿ ಪ್ರಚಾರ ಸಭೆಯಲ್ಲಿ ಪಾಲ್ಗೊಂಡು ಕಾಂಗ್ರೆಸ್ ಪಕ್ಷ ಪ್ರಧಾನ ಕಾರ್ಯದರ್ಶಿ ರಾಹುಲ್ ಗಾಂಧಿ ಪ್ರತಿಪಕ್ಷ ಬಿಜೆಪಿ ಮೇಲೆ ತೀವ್ರ ವಾಗ್ದಾಳಿ ನಡೆಸಿದರು.

ಈ ಚುನಾವಣೆಯಲ್ಲಿ ಎರಡು ವಿಷಯಗಳು ಪ್ರಮುಖವಾಗಿವೆ. ಹಿಂದುಳಿದ ಭಾರತ ಮತ್ತು ಮುಂದುವರೆದ ಭಾರತ ಎಂದು ಪ್ರತಿಪಕ್ಷಗಳು ವಿಂಗಡಿಸಿವೆ. ಪ್ರತಿಪಕ್ಷಗಳು ಶೈನಿಂಗ್ ಭಾರತಕ್ಕೆ ಅದ್ಯತೆ ನೀಡಿದೆ. ಅಂದರೆ ಮುಂದುವರೆದ ವರ್ಗಗಳಿಗೆ ಮಣೆ ಹಾಕುತ್ತಿದೆ. ಆದರೆ, ಕಾಂಗ್ರೆಸ್ ಮೈತ್ರಿಕೂಟ ಮಾತ್ರ ಹಿಂದುಳಿದ ಭಾರತವನ್ನು ಮುಂದುವರೆದ ಭಾರತದೊಂದಿಗೆ ಜೋಡಣೆ ಮಾಡಲು ನಿರ್ಧರಿಸಿದೆ ಎಂದು ಪ್ರತಿಪಕ್ಷಗಳನ್ನು ಟೀಕಿಸಿದರು.

ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆ ಯುಪಿಎ ಸರಕಾರದ ಪ್ರಮುಖ ಯೋಜನೆ. ಬಡವರಿಗೆ ಕೆಲಸ ನೀಡುವುದು ಕಾಂಗ್ರೆಸ್ ಪಕ್ಷದ ಪ್ರಮುಖ ಗುರಿ. ಉದ್ಯೋಗ ಖಾತ್ರಿ ಯೋಜನೆ ಆರಂಭಿಸಿದಾಗ ಬಿಜೆಪಿ ಪಕ್ಷ ಭಾರಿ ವಿರೋಧ ವ್ಯಕ್ತಪಡಿಸಿತು. ಅವರಿಗೆ ಬಡವರ ಕೈಗೆ ಕೆಲಸ ಕೊಡುವುದಕ್ಕಿಂತ ಶ್ರೀಮಂತರ ಹಿತಾಸಕ್ತಿ ಕಾಪಾಡುವುದೇ ಮುಖ್ಯ ಎಂದು ರಾಹುಲ್ ತರಾಟೆ ತೆಗೆದುಕೊಂಡರು.

(ಏಜನ್ಸೀಸ್)