ಒಬ್ಬ ಡಕಾಯಿತನನ್ನು ಹಿಡಿಯಲು 400 ಪೋಲಿಸ್ !!

ಚಿತ್ರಕೂಟ (ಉ.ಪ್ರ), ಜೂ. 18 : 400 ಜನ ಉತ್ತರಪ್ರದೇಶದ ಪೋಲೀಸರ 52 ಘಂಟೆಗಳ ಅವಿರತ ಪ್ರಯತ್ನದಿಂದ ಒಬ್ಬ ಅಂತರರಾಜ್ಯ ಡಕಾಯಿತನೊಬ್ಬನನ್ನು ಚಿತ್ರಕೂಟದ ಬಳಿ ಹೊಡೆದುರುಳಿಸಿ ಸಾಹಸ ಮೆರೆದಿದ್ದಾರೆ. ಹಾಗೇ ಬಲಿಯಾಗುವ ಮುಂಚೆ 4 ಜನ ಪೋಲೀಸರನ್ನು ಕೊಂದಿದ್ದಾನೆ.

ಘನಶ್ಯಾಮ ಕೇವಟ ಎನ್ನುವ ಈ ಡಕಾಯಿತನ ತಲೆಗೆ ಉತ್ತರಪ್ರದೇಶ ಸರಕಾರ 50 ಸಾವಿರ ರುಪಾಯಿ ಬಹುಮಾನ ಘೋಷಿಸಿತ್ತು. ಉತ್ತರಪ್ರದೇಶ ಮತ್ತು ಮಧ್ಯಪ್ರದೇಶ ರಾಜ್ಯದ ಗಡಿಭಾಗದಲ್ಲಿರುವ ಸುಮಾರು 40 ಮನೆಗಳನ್ನು ಹೊಂದಿರುವ ಜಾಮೌಲಿ ಗ್ರಾಮದಲ್ಲಿ ಘನಶ್ಯಾಮ ಅಡಗಿಕೊಂಡಿದ್ದ. ಗ್ರಾಮದಲ್ಲಿ ನೆಲೆಸಿದ್ದವರನ್ನು ತೆರವುಗೊಳಿಸಿದ ಪೊಲೀಸರು ಮನೆಗಳಿಗೆ ಬೆಂಕಿ ಹಚ್ಚಿ ಡಕಾಯಿತನನ್ನು ಉಸಿರುಗಟ್ಟಲು ಯತ್ನಿಸಿದ್ದರು. ಆದರೆ ಆತ ಅಡಗಿದ್ದ ಮನೆಯ ಸಮೀಪ ತೆರಳಲು ಪೊಲೀಸರು ಯತ್ನಿಸಿದ ವೇಳೆ ಘನಶ್ಯಾಮ ಗುಂಡಿನ ದಾಳಿ ನಡೆಸಿದ.

ಬೆಳಗಿನ ಜಾವ ಈ ಡಕಾಯಿತ ತಪ್ಪಿಸಿಕೊಳ್ಳಲು ಯತ್ನಿಸಿ ಎದುರಿಗೆ ಬಂದ ಪೊಲೀಸರಿಗೆ ಯದ್ವಾತದ್ವಾ ಗುಂಡು ಹಾರಿಸಿ ನಾಲ್ಕು ಜನ ಪೋಲೀಸರ ಸಾವಿಗೆ ಕಾರಣನಾದ. ಆಗ ಪೊಲೀಸರು ಇಡೀ ಗ್ರಾಮವನ್ನು ಸುತ್ತುವರಿದು ಪ್ರತಿಯಾಗಿ ಗುಂಡು ಹಾರಿಸಿ ಡಕಾಯಿತನನ್ನು ಕೊನೆಗೂ ಹೊಡೆದುರುಳಿಸಿ ನಿಟ್ಟುಸಿರು ಬಿಟ್ಟಿದ್ದಾರೆ.

(ಏಜನ್ಸೀಸ್)