ಸಂಬಳ ವಿಳಂಬ : ಏರ್ ಇಂಡಿಯಾ ಕಾರ್ಮಿಕರ ವಿರೋಧ

ನವದೆಹಲಿ, ಜೂ. 17 : ಸಂಸ್ಥೆ ನಷ್ಟದಲ್ಲಿರುವ ಹಿನ್ನೆಲೆಯಲ್ಲಿ ಜುಲೈ ತಿಂಗಳ ಸಂಬಳವನ್ನು ತಡವಾಗಿ ಪಾವತಿ ಮಾಡಲಾಗುವುದು ಎಂದು ಏರ್ ಇಂಡಿಯಾ ಆಡಳಿತ ಮಂಡಳಿ ಹೊರಡಿಸಿರುವ ಆದೇಶಕ್ಕೆ ಏರ್ ಇಂಡಿಯಾ ಕಾರ್ಮಿಕರ ಸಂಘ ತೀವ್ರವಾಗಿ ವಿರೋಧಿಸಿದೆ. ಸೂಕ್ತ ಸಮಯದಲ್ಲಿ ಸಂಬಳ ಪಾವತಿ ಮಾಡದಿದ್ದರೆ ಅನಿರ್ಧಷ್ಟಾವಧಿ ಮುಷ್ಕರ ಕೈಗೊಳ್ಳಲಾಗುವುದು ಎಂದು ಅದು ಎಚ್ಚರಿಕೆ ನೀಡಿದೆ.

ಮಂಗಳವಾರ ಏರ್ ಇಂಡಿಯಾ ಕಾರ್ಮಿಕರ ಸಂಘ ಸಭೆ ಸೇರಿದ್ದು, ಸಂಬಳ ವಿಳಂಬಕ್ಕೆ ಸಂಬಂಧಿಸಿದಂತೆ ಏರ್ ಇಂಡಿಯಾ ಆಡಳಿತ ಮಂಡಳಿ ನೀಡಿರುವ ಸುತ್ತೋಲೆಗೆ ತೀವ್ರವಾಗಿ ವಿರೋಧ ವ್ಯಕ್ತವಾಗಿದೆ. ಆಡಳಿತ ಮಂಡಳಿ ಕಾರ್ಮಿಕರ ಸಂಬಳವನ್ನು ನಿಗದಿತ ಸಮಯದಲ್ಲಿ ನೀಡದಿದ್ದರೆ ಅನಿರ್ಧಿಷ್ಟವಾಧಿ ಮುಷ್ಕರ ಕೈಗೊಳ್ಳಲು ತೀರ್ಮಾನಿಸಲಾಗಿದೆ ಎಂದು ಸಂಘದ ಪ್ರಧಾನ ಕಾರ್ಯದರ್ಶಿ ಜೆ ಬಿ ಕಡಿಯನ್ ತಿಳಿಸಿದ್ದಾರೆ.

ಏರ್ ಇಂಡಿಯಾ ಮಾಲೀಕತ್ವ ವಹಿಸಿಕೊಂಡಿರುವ ನ್ಯಾಷನಲ್ ಏವಿಯೇಷನ್ ಕಂಪನಿ ಆಫ್ ಇಂಡಿಯಾದ ಆಡಳಿತ ಮಂಡಳಿ ಸೋಮವಾರ ಸುತ್ತೋಲೆಯೊಂದನ್ನು ಹೊರಡಿಸಿದ್ದು, ಜುಲೈ ತಿಂಗಳ ಕಾರ್ಮಿಕರ ಸಂಬಳ 15 ದಿನ ತಡವಾಗಿ ಪಾವತಿ ಮಾಡಲಾಗುತ್ತಿದೆ ಎಂದು ತಿಳಿಸಿದ್ದರು.

(ಏಜನ್ಸೀಸ್)