ವಿದ್ಯಾರ್ಥಿಗಳ ಪ್ರತಿಭಟನೆ : ಕಂಪ್ಯೂಟರ್ ಗಳು ನಾಶ

ಬೆಂಗಳೂರು, ಮೇ. 7 : ಮೂಲಭೂತ ಸೌಲಭ್ಯಗಳಿಲ್ಲ ಎಂದು ರೊಚ್ಚಿಗೆದ್ದ ಸುಮಾರು 100 ಕ್ಕೂ ಹೆಚ್ಚು ವಿದ್ಯಾರ್ಥಿ ಕಾಲೇಜಿನ 80 ಕಂಪ್ಯೂಟರ್ ಸೇರಿ ಅನೇಕ ಪಿಠೋಪಕರಣಗಳನ್ನು ಧ್ವಂಸ ಮಾಡಿರುವ ಘಟನೆ ನಗರದ ಬಿಟಿಎಂ ಲೇಔಟ್ ಎನ್ ಎಸ್ ಪಾಳ್ಯದಲ್ಲಿರುವ ಇಕ್ಫಾಯ್(ICFAI) ಕಾಲೇಜಿನಲ್ಲಿ ನಡೆದಿದೆ.

ಇಕ್ಫಾಯ್ ಕಾಲೇಜಿನಲ್ಲಿ ಮೂಲಭೂತ ಸೌಕರ್ಯಗಳಿಲ್ಲ. ಮುಖ್ಯವಾಗಿ ಲೈಬ್ರರಿ, ಪ್ರಯೋಗಾಲಯಗಳ ಕೊರತೆ ಇದೆ. ಈ ಕುರಿತು ಅನೇಕ ಕಾಲೇಜಿನ ಆಡಳಿತ ಮಂಡಳಿಗೆ ವಿದ್ಯಾರ್ಥಿಗಳು ದೂರು ಸಲ್ಲಿಸಿ ಸೌಲಭ್ಯಗಳನ್ನು ಒದಗಿಸಲು ಮನವಿ ಮಾಡಿಕೊಂಡಿದ್ದಾರೆ. ಆದರೆ, ಕಾಲೇಜಿನ ಮುಖ್ಯಸ್ಥರು ಕ್ಯಾರೇ ಎನ್ನದೆ ಹಿನ್ನೆಲೆಯಲ್ಲಿ ಇಂದು ರೊಚ್ಚಿಗೆದ್ದ ಸುಮಾರು 100 ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಏಕಾಏಕಿ ಕಾಲೇಜಿಗೆ ನುಗ್ಗಿ 80ಕ್ಕೂ ಹೆಚ್ಚು ಕಂಪ್ಯೂಟರ್ ಗಳನ್ನು ಒಡೆದು ಹಾಕಿದ್ದಾರೆ. ಕಾಲೇಜಿನ ಕಿಟಕಿ, ಗಾಜು ನುಚ್ಚನೂರಾಗಿವೆ. ಮಹತ್ವದ ದಾಖಲೆಗಳು ನಾಶವಾಗಿವೆ.

ಉತ್ತರಾಂಚಲ ಮೂಲದ ಕಾಲೇಜು ಇದಾಗಿದ್ದು, ಮಾನ್ಯತೆ ಇಲ್ಲದಿರುವುದು ವಿದ್ಯಾರ್ಥಿಗಳ ಕೋಪ ನೆತ್ತಿಗೇರುವಂತೆ ಮಾಡಿದೆ. ಪ್ರವೇಶ ಪಡೆದುಕೊಳ್ಳುವಾಗ ನಮ್ಮ ಕಾಲೇಜು ಮಾನ್ಯತೆ ಹೊಂದಿದೆ ಎಂದು ಆಡಳಿತ ಮಂಡಳಿ ವಿದ್ಯಾರ್ಥಿಗಳಿಗೆ ನಂಬಿಸಿತ್ತು. ಇದೀಗ ಉತ್ತರಾಂಚಲದಲ್ಲಿರುವ ಕಾಲೇಜಿನ ಮುಖ್ಯಸ್ಥರು ಇತ್ತೀಚೆಗೆ ಬೆಂಗಳೂರಿನ ಕಾಲೇಜಿಗೆ ಮಾನ್ಯತೆ ಇಲ್ಲ ಎಂದಿರುವುದು ವಿದ್ಯಾರ್ಥಿಗಳ ಆಕ್ರೋಶಕ್ಕೆ ಕಾರಣವಾಗಿದೆ. ಘಟನೆಗೆ ಸಂಬಂಧಿಸಿದಂತೆ 25 ವಿದ್ಯಾರ್ಥಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)