ಅಕ್ಕಿಧಾರಣೆ ಇದೀಗ ಕೆಜಿಗೆ 50 ರುಪಾಯಿ ?

ಬೆಂಗಳೂರು, ಮಾ. 25 : ಅಕ್ಕಿ ದರ ಗಗನಮುಖಿಯಾಗಿರುವ ಬೆನ್ನಲ್ಲೇ ಶ್ರೀಸಾಮಾನ್ಯನಿಗೆ ಹೊರೆಯಾಗುವ ಇನ್ನೊಂದು ಸುದ್ದಿ ಭತ್ತದ ಖಣಜ ಎಂದೇ ಖ್ಯಾತಿಯಾಗಿರುವ ನೆರೆಯ ಆಂಧ್ರಪ್ರದೇಶದಿಂದ ಹೊರಬಿದ್ದು ಐದು ತಿಂಗಳು ಕಳೆದಿದೆ. ಆಂಧ್ರಪ್ರದೇಶದಲ್ಲಿ ಲೋಕಸಭೆ ಮತ್ತು ವಿಧಾನಸಭೆ ಚುನಾವಣೆಗಳು ಭರಾಟೆ ತಾರಕಕ್ಕೇರಿದೆ. ಮತದಾರರನನ್ನು ಒಲಿಸಿಕೊಳ್ಳಲು ರಾಜಕೀಯ ಪಕ್ಷಗಳು ಹರಸಾಹಸ ಮಾಡುತ್ತಿದ್ದು, ಪರಿಣಾಮವಾಗಿ ಅಂತಾರಾಜ್ಯ ರಫ್ತು ಕಾಯ್ದೆಯನ್ನು ಮಾಡುವುದನ್ನು ಅಲ್ಲಿನ ಸರ್ಕಾರ ನಿಷೇಧಿಸಿದೆ. ಇದರಿಂದ ಕೆಲ ಭಾಗಗಳಲ್ಲಿ ಅಕ್ಕಿ ದರ ದುಪ್ಪಟ್ಟು ಆಗುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.

ಕಳೆದ ವರ್ಷ ನವೆಂಬರ್ ತಿಂಗಳು ಆಂಧ್ರಪ್ರದೇಶದ ಕಾಂಗ್ರೆಸ್ ಸರ್ಕಾರ ಅಂತಾರಾಜ್ಯ ಅಕ್ಕಿ ರಫ್ತುನ್ನು ನಿಷೇಧಿಸಿತ್ತು. ಪ್ರತಿಪಕ್ಷಗಳ ಒತ್ತಡಕ್ಕೆ ಮಣಿದಿದ್ದ ಮುಖ್ಯಮಂತ್ರಿ ವೈ ಎಸ್ ರಾಜಶೇಖರರೆಡ್ಡಿ ಈ ನಿರ್ಧಾರ ಕೈಗೊಂಡಿದ್ದರು. ಆಂಧ್ರಪ್ರದೇಶದಿಂದ 4.31 ಮಿಲಿಯನ್ ಟನ್ ಅಕ್ಕಿ ಆಮದು ಮಾಡಿಕೊಳ್ಳುತ್ತಿತ್ತು. ಆದರೆ, ಅಮದು ಕಡಿಮೆಯಾಗಿರುವ ಕಾರಣ ಅಕ್ಕಿಯ ದರ ದುಪ್ಪಟ್ಟಾಗಲಿದೆ. ಇದರಿಂದ ತುಂಬಾ ಸಮಸ್ಯೆ ಎದುರಾಗುವ ಸಾಧ್ಯತೆಗಳು ಇವೆ ಎಂದು ಬೆಂಗಳೂರು ಎಪಿಎಂಸಿ ಕಾರ್ಯದರ್ಶಿ ಪ್ರಸನ್ನ ಕುಮಾರ್ ಕಳವಳ ವ್ಯಕ್ತಪಡಿಸಿದ್ದಾರೆ.

ಅಕ್ಕಿ ಧಾರಣೆ ಶೀಘ್ರದಲ್ಲಿ ಇಳಿಮುಖವಾಗಲಿದೆ. ಕೇಂದ್ರ ಸರ್ಕಾರದಿಂದ ನ್ಯಾಯಬೆಲೆ ದರದಲ್ಲಿ ಸುಮಾರು 20,000 ಟನ್ ಅಕ್ಕಿ ಖರೀದಿಸಲಾಗುವುದು ಎಂದು ಕರ್ನಾಟಕದ ಆಹಾರ ಮತ್ತು ನಾಗರಿಕ ಪೂರೈಕೆ ಇಲಾಖೆ ಸಚಿವ ಹರತಾಳ್ ಹಾಲಪ್ಪ ತಿಳಿಸಿದ್ದಾರೆ.

(ದಟ್ಸ್ ಕನ್ನಡ ವಾರ್ತೆ)