ಕ್ರೈಸ್ಟ್ ಚರ್ಚ್, ಭಾರತಕ್ಕೆ ಗೆಲುವು, 2-0 ರಿಂದ ಮೇಲುಗೈ

ಕ್ರೈಸ್ಟ್ ಚರ್ಚ್, ಮಾ. 8 : ಟ್ವಿಂಟಿ -20 ಪಂದ್ಯದಲ್ಲಿ ಸೋಲುವ ಮೂಲಕ ಮುಖಭಂಗ ಅನುಭವಿಸಿದ್ದ ಟೀಮ್ ಇಂಡಿಯಾ ಇಂದು ಕ್ರೈಸ್ಟ್ ಚರ್ಚ್ ನಲ್ಲಿ ನಡೆದ ತೃತೀಯ ಏಕದಿನ ಪಂದ್ಯದಲ್ಲಿ ಕೂಡ 58 ರನ್ ಗಳ ಅರ್ಹ ಜಯಗಳಿಸಿತು. ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರ ಭರ್ಜರಿ ಶತಕ ಬಾರಿಸುವ ಧೋನಿ ಪಡೆ ಬ್ರೆಂಡನ್ ಮೆಕಲಮ್ ತಂಡವನ್ನು ದೂಳಿಪಟ ಮಾಡಿ ಸರಣಿಯಲ್ಲಿ 2-0 ಮುನ್ನೆಡೆ ಸಾಧಿಸಿತು.

ನಿಗದಿತ 50 ಓವರ್ ಗಳಲ್ಲಿ ಭಾರತದ ದಾಂಡಿಗರು ನಾಮೇಲೂ, ತಾಮೇಲೂ ಎಂದು ಕಿವಿ ಬೌಲರ್ ಗಳ ಕಿವಿ ಹಿಂಡುತ್ತಿರುವುದನ್ನು ನೋಡುತ್ತಿರುವುದೇ ಒಂದು ಮಹಾದಾನಂದ ಗಳಿಗೆಯಾಗಿತ್ತು. ಅನುಭವಿ ಆಟಗಾರ ಸಚಿನ್ ತೆಂಡೂಲ್ಕರ್ ಅವರ ಸೊಗಸಾದ 163 ರನ್ ಗಳ ಭರ್ಜರಿ ಶತಕದಿಂದ ಧೋನಿ ತಂಡ ಬೃಹತ್ ಎನ್ನಲಾದ 393 ರನ್ ಗಳನ್ನು ಕಲೆ ಹಾಕುವಲ್ಲಿ ಯಶಸ್ವಿಯಾಯಿತು.

ಯುವರಾಜ್ ಸಿಂಗ್ 87, ನಾಯಕ ಮಹೇಂದ್ರ ಸಿಂಗ್ ಧೋನಿ 63, ಸುರೇಶ್ ರೈನಾ ಕಿವಿ ಬೌಲರ್ ಗಳ ಪ್ರತಿ ಬೌಲ್ ಗಳನ್ನು ಮನಬಂದಂತೆ ದಂಡಿಸಿ ಮೈದಾನದ ಮೂಲೆಮೂಲೆಗೂ ಚಂಡನ್ನು ಅಟ್ಟುವ ಮೂಲಕ ಭಾನುವಾರದಂದು ಕ್ರಿಕೆಟ್ ಪ್ರಿಯರಿಗೆ ರಸದೌತಣ ನೀಡಿದರು.

ಭಾರತದ ಬೃಹತ್ ಮೊತ್ತ ಬೆನ್ನಟ್ಟಿದೆ ಕಿವೀಸ್ ಬ್ಯಾಟುಗಾರರು ಆರಂಭದಲ್ಲಿ ಭಾರಿ ಪ್ರತಿರೋಧ ತೋರಿದರಾದರೂ ಭಾರತೀಯ ಬೌಲರ್ ಗಳ ಕರಾರುವಾಕ್ಕಾದ ದಾಳಿಗೆ ಗೆಲುವಿನ ಕನಸು ಕನಸಾಗಿಯೇ ಉಳಿಯಿತು. ಆರಂಭಿಕರಾದ ರೈಡರ್ 105 ಹಾಗೂ ನಾಯಕ ಬ್ರೆಂಡನ್ ಮೆಕಲಮ್ ಅವರ 71 ರನ್ ಗಳಿಸುವ ಮೂಲಕ ಉತ್ತಮ ಅಡಿಪಾಯ ಹಾಕಿಕೊಟ್ಟರಾದರೂ ಉಳಿದ ಆಟಗಾರರ ಕ್ರಿಸ್ ಬಳಿ ಹೆಚ್ಚು ಹೊತ್ತು ನಿಲ್ಲಲು ಸಾಧ್ಯವಾಗಲಿಲ್ಲ. 45.1 ಒವರ್ ಗಳಲ್ಲಿ ನ್ಯೂಜಿಲ್ಯಾಂಡ್ ಆಲ್ ಔಟಾಗಿ 58 ರನ್ ಗಳ ಸೋಲನ್ನು ಒಪ್ಪಿಕೊಂಡಿತು. ಸಚಿನ್ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಬಾಜನರಾದರು.

ಭಾರತ, 50 ಓವರ್ ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 392 ರನ್.
ನ್ಯೂಜಿಲ್ಯಾಂಡ್ 45.1 ಓವರ್ ಗಳಲ್ಲಿ 334 ರನ್ ಗಳಿಗೆ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು ಸೋಲು.
ನಾಲ್ಕನೇ ಪಂದ್ಯ ಹ್ಯಾಮಿಲ್ಟನ್ ನಲ್ಲಿ ಮಾರ್ಚ್ 11 ರಂದು ನಡೆಯಲಿದೆ.

(ದಟ್ಸ್ ಕನ್ನಡ ವಾರ್ತೆ)
ಮಹಿಳಾ ಕ್ರಿಕೆಟ್: ಪಾಕ್ ವಿರುದ್ಧ ಭಾರತಕ್ಕೆ ಜಯ