ದಳ ನಾಯಕರ ಒಂದು ಗುಂಪು ಸೋನಿಯಾಗೆ ಇಂದು ಶರಣು

ದಳ ನಾಯಕರ ಒಂದು ಗುಂಪು ಸೋನಿಯಾಗೆ ಇಂದು ಶರಣು
ಇದು ಅವಕಾಶವಾದಿ ರಾಜಕಾರಣ ಎಂದು ಬಿ.ಸೋಮಶೇಖರ್‌ ಪ್ರತಿಕ್ರಿಯೆ

ಪ್ರಗತಿಪರ ಹಾಗೂ ತಟಸ್ಥ ಜನತಾದಳದ ಪ್ರಮುಖ ನಾಯಕರು ಇಂದು ಕಾಂಗೈಗೆ ಸೇರಲಿದ್ದಾರೆ. ಇಷ್ಟು ದಿನ ಮೌನವಾಗಿದ್ದ ವಿಧಾನ ಪರಿಷತ್‌ ಸಭಾಪತಿ ಬಿ.ಎಲ್‌.ಶಂಕರ್‌, ಉಮೇಶ್‌ ಕತ್ತಿ, ಕೃಷ್ಣ ಭೈರೇಗೌಡ , ಮಹಾಂತೇಶ್‌ ಕೌಜಲಗಿ ಸೇರಿದಂತೆ 11 ಶಾಸಕರು ಅಧಿಕೃತವಾಗಿ ಕಾಂಗೈ ಸೇರುವರು. ಇವರಲ್ಲದೇ ರಮೇಶ್‌ ಕುಮಾರ್‌, ಬಸವರಾಜ ಹೊರಟ್ಟಿ , ಬಸವರಾಜ ರಾಯರೆಡ್ಡಿ , ಕೆ.ಎಚ್‌.ಶ್ರಿನಿವಾಸ್‌ ಮುಂತಾದ ವಿಧಾನ ಪರಿಷತ್‌ ಶಾಸಕರು ಸಹ ಕಾಂಗೈಗೆ ಸೇರ್ಪಡೆಗೊಳ್ಳಲಿರುವರು. ಇವರೊಂದಿಗೆ ರಾಜ್ಯದ ಮಾಜಿ ಹಿರಿಯಾಧಿಕಾರಿಗಳಾದ ಬಿ.ಎಸ್‌.ಪಾಟೀಲ್‌, ರೇವಣ್ಣ ಸಿದ್ದಯ್ಯ ಕಾಂಗೈಗೆ ಸೇರಲಿದ್ದಾರೆ.

ಈ ಮೂಲಕ ಪ್ರಗತಿಪರ ದಳದಲ್ಲಿದ್ದ 14 ಶಾಸಕರ ಪೈಕಿ 11 ಮಂದಿ ಕಾಂಗೈಯಲ್ಲಿ ಲೀನವಾಗಲಿದ್ದಾರೆ. ಈ ನಾಯಕರುಗಳು ಇಂದು (ಫೆ18) ಸೋನಿಯಾ ಗಾಂಧಿ ಸಮ್ಮುಖದಲ್ಲಿ , ನವದೆಹಲಿಯಲ್ಲಿ ಕಾಂಗ್ರೆಸ್‌ಗೆ ಸೇರುವ ಕಾರ್ಯಕ್ರಮವಿದೆ. ಜನತಾದಳದ ವಿಲೀನ ಪ್ರಕ್ರಿಯೆ ಮರೀಚಿಕೆಯಾಗಿದ್ದು , ಹೆಗಡೆ ಮರಣದ ಬಳಿಕ ಈ ಬಣ ಕಳೆಗುಂದಿತ್ತು. . ಈ ಸಂದಿಗ್ಧ ಪರಿಸ್ಥಿತಿಯಲ್ಲಿ ಬೇಸತ್ತ ರಾಜಕಾರಣಿಗಳ ಪಕ್ಷಾಂತರ ಕಾರ್ಯ ಮುಂದುವರಿದಿದೆ.

‘ಇದೊಂದು ದುರದೃಷ್ಟಕಾರಿ ಬೆಳವಣಿಗೆ. ಅವಕಾಶವಾದಿ ರಾಜಕಾರಣದ ಒಂದು ಮುಖ. ಇದರಿಂದ ಒಂದು ಪಕ್ಷವನ್ನು ದುರ್ಬಲಗೊಳಿಸಲು ಸಾಧ್ಯವಿಲ್ಲ ’ ಎಂದು ಪ್ರಗತಿಪರ ದಳದ ಶಾಸಕಾಂಗ ಪಕ್ಷದ ನಾಯಕ ಸೋಮಶೇಖರ್‌ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ.

ಮುಖಪುಟ / ವಾರ್ತೆಗಳು