ಇನ್ಫೋಸಿಸ್ ನಾರಾಯಣಮೂರ್ತಿ; ವಿಶ್ವದ 21ನೇ ಪ್ರಭಾವೀ ಸಿಇಓ
ಬೆಂಗಳೂರು : ವಿಶ್ವದ 25 ಮಂದಿ ಪ್ರಭಾವಿ ಕಾರ್ಯನಿರ್ವಾಹಕ ಅಧಿಕಾರಿಗಳ ಪಟ್ಟಿಯಲ್ಲಿ ಇನ್ಫೋಸಿಸ್ ಸಾಫ್ಟ್ವೇರ್ ಕಂಪೆನಿಯ ಮುಖ್ಯಸ್ಥ ಹಾಗೂ ಭಾರತದ ಶ್ರೀಮಂತ ಉದ್ಯಮಿಗಳಲ್ಲಿ ಒಬ್ಬರಾದ ಎನ್. ಆರ್. ನಾರಾಯಣಮೂರ್ತಿ ಸ್ಥಾನ ಪಡೆದಿದ್ದಾರೆ.
ಪ್ರತಿಷ್ಠಿತ ದಿ ಟೈಮ್ ಪತ್ರಿಕೆ ನಾರಾಯಣ ಮೂರ್ತಿ ಅವರನ್ನು ಪ್ರಭಾವೀ ಕಾರ್ಯನಿರ್ವಾಹಕನೆಂದು ಗುರುತಿಸಿದ್ದು, ಶ್ರೀಮಂತಿಕೆಯ ಜೊತೆಗೆ ಉದ್ದಾತ್ತ ಮೌಲ್ಯಗಳನ್ನು ಹರಡುವಲ್ಲಿ ನಾರಾಯಣ ಮೂರ್ತಿ ಪ್ರಮುಖ ಪಾತ್ರ ವಹಿಸಿದ್ದಾರೆ ಎಂದು ಅಭಿಪ್ರಾಯ ಪಟ್ಟಿದೆ. ಟೈಮ್ ಪತ್ರಿಕೆಯ ಈ ಪಟ್ಟಿಯಲ್ಲಿರುವ ಇರುವ ಏಕೈಕ ಭಾರತೀಯನ ಹೆಸರು ನಾರಾಯಣ ಮೂರ್ತಿಯವರದು.
25 ಮಂದಿ ಪ್ರಭಾವೀ ಕಾರ್ಯನಿರ್ವಾಹಕ ಅಧಿಕಾರಿಗಳ ಪಟ್ಟಿಯಲ್ಲಿ ನಾರಾಯಣ ಮೂರ್ತಿ ಅವರದು 21ನೇ ಹೆಸರು. ಇತ್ತೀಚಿನ ದಶಕಗಳಲ್ಲಿ ಟೈಮ್ ಪತ್ರಿಕೆಯ ಪಟ್ಟಿಯಲ್ಲಿ ರಾಜ್ಯದ ಯಾವ ವ್ಯಕ್ತಿಯ ಹೆಸರು ಉಲ್ಲೇಖವಾಗಿರಲಿಲ್ಲ.
25 ಮಂದಿಯ ಪಟ್ಟಿಯಲ್ಲಿ ವಿಶ್ವದ ಅಗ್ರಮಾನ್ಯ ಕಂಪೆನಿಗಳ ಮುಖ್ಯ ಕಾರ್ಯನಿರ್ವಾಹಕರ ಹೆಸರುಗಳಿವೆ. ಜಪಾನಿನ ನಿಸ್ಸಾನ್ನ ಕಾರ್ಲೋಸ್ ಘೋಷಮ್, ಮೈಕ್ರೋಸಾಫ್ಟ್ ಕಂಪೆನಿಯ ಬಿಲ್ ಗೇಟ್ಸ್, ಎಒಎಲ್ ಟೈಮ್ ವಾರ್ನರ್ ಕಂಪೆನಿಯ ಜೆರ್ರಿ ಲೆವೆನ್ ಹಾಗೂ ಸ್ಟೀವ್ ಕೇಸ್ ಪಟ್ಟಿಯ ಮೊದಲ ಮೂರು ಸ್ಥಾನಗಳಲ್ಲಿದ್ದಾರೆ. ಮಾಧ್ಯಮ ಸಾಮ್ರಾಟನೆನಿಸಿಕೊಂಡಿರುವ ನ್ಯೂಸ್ ಕಾರ್ಪ್ ಕಂಪೆನಿಯ ರುಪರ್ಟ್ ಮುರ್ಡೋಕ್ 10 ನೇ ಸ್ಥಾನದಲ್ಲಿದ್ದಾರೆ.
(ಇನ್ಫೋ ವಾರ್ತೆ)
ಮುಖಪುಟ / ಕರ್ನಾಟಕ ಸಿಲಿಕಾನ್ ಕಣಿವೆ