ಪಟಾಕಿ ಸಿಡಿದು ಆಸ್ಪತ್ರೆಗೆ ಹೋದ ಬೆಂಗಳೂರಿನ 30 ಮಕ್ಕಳು

ಬೆಂಗಳೂರು : ಕಳಪೆ ಗುಣ ಮಟ್ಟದ ಪಟಾಕಿಗಳು ಅಥವಾ ಎಚ್ಚರಿಕೆ ವಹಿಸದೆ ಹಚ್ಚಿದ ಪರಿಣಾಮ ಸುಟ್ಟ ಗಾಯಗಳಾಗಿ, ಸುಮಾರು 30 ಮಕ್ಕಳು ನಗರದ ವಿವಿಧ ಆಸ್ಪತ್ರೆಗಳಲ್ಲಿ ಈವರೆಗೆ ಚಿಕಿತ್ಸೆ ಪಡೆದಿದ್ದಾರೆ.

ಶುಕ್ರವಾರ ಒಂದೇ ದಿನ ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ 6 ಮಕ್ಕಳು ಚಿಕಿತ್ಸೆ ಪಡೆದಿದ್ದಾರೆ. ಈ ಪೈಕಿ ಸುನಿತಾ (15) ಮತ್ತು ಗೋವರ್ಧನ್‌ಗೆ ಹೆಚ್ಚು ಸುಟ್ಟ ಗಾಯಗಳಾಗಿದ್ದವು. ಸುನಿತಾ ದೇಹ ಪ್ರತಿಶತ 30ರಷ್ಟು ಸುಟ್ಟಿದೆ. ಮೊದಲೇ ಹಚ್ಚಿದ್ದ ಪಟಾಕಿಗಳ ರಾಶಿ ಮಾಡಿ ಬೆಂಕಿ ಇಟ್ಟ ಕಾರಣ, ಸ್ಫೋಟಗೊಂಡು ಗೋವರ್ಧನ ಗಾಯಾಳುವಾದ.

ನಗರದ ಅನೇಕ ಕಡೆ ಪೊಲೀಸರು ಧ್ವನಿ ವರ್ಧಕಗಳ ಮೂಲಕ ಪಟಾಕಿ ಹಚ್ಚುವ ನಿಯಮಾವಳಿಗಳನ್ನು ಹೇಳುತ್ತಲೇ ಸಾಗಿದ್ದರು. 10 ಗಂಟೆಯ ನಂತರ ಪಟಾಕಿ ಹೊಡೆಯಕೂಡದೆಂದು ಬೊಬ್ಬೆ ಹೊಡೆಯುತ್ತಿದ್ದರೂ, ಆ ನಿಯಮವನ್ನು ಎಷ್ಟೋ ಕಡೆ ಗಾಳಿಗೆ ತೂರಲಾಯಿತು. 125 ಡೆಸಿಬಲ್‌ಗಿಂತ ಹೆಚ್ಚು ಶಬ್ದ ಮಾಡುವ ಪಟಾಕಿಗಳನ್ನು ಮಾರುವುದು ನಿಷೇಧ. ಅದನ್ನೂ ಮೀರಿ ಮಾರಾಟ ಮಾಡಿರುವ 12 ಪ್ರಕರಣಗಳನ್ನು ನಗರ ಪೊಲೀಸರು ದಾಖಲು ಮಾಡಿಕೊಂಡಿದ್ದಾರೆ.

ಹುಬ್ಬಳ್ಳಿ ವರದಿ : ಉಣಕಲ್‌ ಕ್ರಾಸ್‌ನ ಪ್ರಕಾಶ ಮಾಲಸೂರೆ (11) ಎಂಬ ಹುಡುಗನಿಗೆ ಶುಕ್ರವಾರ ಮಧ್ಯಾಹ್ನ ಪಟಾಕಿ ಸ್ಫೋಟಿಸಿ ಗಂಭೀರ ಸ್ವರೂಪದ ಗಾಯಗಳಾಗಿದ್ದು, ಕಿಮ್ಸ್‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. ಎದೆ ಮತ್ತು ಹೊಟ್ಟೆಯ ಭಾಗಗಳಿಗೆ ಸುಟ್ಟ ಗಾಯಗಳಾಗಿದ್ದು, ಬೊಬ್ಬೆ ಎದ್ದಿದೆ.

(ಇನ್ಫೋ ವಾರ್ತೆ)

ಮುಖಪುಟ / ದೀಪಾವಳಿ