ಲಾಡೆನ್‌ನನ್ನು ಅಮೆರಿಕೆಗೆ ಒಪ್ಪಿಸಲು ತಾಲಿಬಾನ್‌ಗೆ ಪಾಕ್‌ ಗಡುವು

By Super

Updated: Monday, September 2, 2013, 13:33 [IST]

ಇಸ್ಲಾಮಾಬಾದ್‌ : ಕರಾಳ ಮಂಗಳವಾರ ಅಮೆರಿಕೆಯಲ್ಲಿ ನಡೆದ ವಾಯುದಾಳಿಗೆ ಕಾರಣ ಎಂದು ಶಂಕಿಸಲಾಗಿರುವ ಅಂತಾರಾಷ್ಟ್ರೀಯ ಉಗ್ರಗಾಮಿ ಒಸಮಾ ಬಿನ್‌ ಲಾಡೆನ್‌ನನ್ನು ಅಮೆರಿಕೆಗೆ ಒಪ್ಪಿಸಿ, ಸಂಭವನೀಯ ಯುದ್ಧ ತಡೆಯುವಂತೆ ಪಾಕಿಸ್ತಾನ ತಾಲಿಬಾನ್‌ಗೆ ಅರಿಕೆ ಮಾಡಿಕೊಂಡಿದೆ.

ಈ ಸಂಬಂಧ ಮಾತುಕತೆ ನಡೆಸಲು ಪಾಕ್‌ ರಾಜತಾಂತ್ರಿಕ ನಿಯೋಗ ಕಾಬೂಲ್‌ಗೆ ತೆರಳುತ್ತಿದೆ. ಲಾಡೆನ್‌ನನ್ನು ಒಪ್ಪಿಸಲು ಪಾಕ್‌ ಮೂರು ದಿನಗಳ ಗಡುವು ನೀಡಿದ್ದು, ಈ ಮನವಿ ತಿರಸ್ಕರಿಸಿದರೆ, ಅಮೆರಿಕದಿಂದ ಯುದ್ಧ ಎದುರಿಸಬೇಕಾದೀತು ಎಂದು ಎಚ್ಚರಿಕೆಯನ್ನು ನೀಡಿದೆ ಎಂದು ಸಿಎನ್‌ಎನ್‌ ವರದಿ ಮಾಡಿದೆ.

ಆಫ್ಘಾನಿಸ್ತಾನದ ಮೇಲೆ ನಡೆಯಬಹುದಾದ ಭಾರಿ ಯುದ್ಧವನ್ನು ತಡೆಯಲು ನಾವು ಸರ್ವ ಪ್ರಯತ್ನ ಮಾಡುತ್ತಿದ್ದೇವೆ. ಈ ಹಿನ್ನೆಲೆಯಲ್ಲಿ ಲಾಡೆನ್‌ನನ್ನು ಒಪ್ಪಿಸುವಂತೆ ತಾಲಿಬಾನ್‌ಗೆ ಗಡುವು ನೀಡಲಾಗುತ್ತಿದೆ ಎಂದು ಪಾಕಿಸ್ತಾನದ ಹಿರಿಯ ಅಧಿಕಾರಿಗಳು ತಿಳಿಸಿದ್ದಾಗಿ ಎಎಫ್‌ಪಿ ವರದಿ ತಿಳಿಸಿದೆ.

ಚೀನಾಕ್ಕೆ ಮುಷರ್ರಫ್‌ : ಈ ಮಧ್ಯೆ ಅಮೆರಿಕ ಮೇಲಿನ ದಾಳಿಯ ನಂತರದ ಪರಿಸ್ಥಿತಿಯ ಬಗ್ಗೆ ಸಮಾಲೋಚನೆ ನಡೆಸಲು ಪಾಕ್‌ ಮಿಲಿಟರಿ ಆಡಳಿತಗಾರ ಹಾಗೂ ಅಧ್ಯಕ್ಷ ಮುಷರ್ರಫ್‌ ಒಂದೆರಡು ದಿನದಲ್ಲೇ ಚೀನಾಕ್ಕೆ ಭೇಟಿ ನೀಡುತ್ತಿದ್ದಾರೆ. ಚೀನೀ ನಾಯಕರ ಜತೆ ಮುಷರ್ರಫ್‌ ಚರ್ಚೆ ನಡೆಸಲಿದ್ದಾರೆ.

ಈಗಾಗಲೇ ಚೀನದ ರಾಯಭಾರಿ ಲು ಷಿನ್‌ ಲಿನ್‌ ಅವರ ಜೊತೆ ಮುಷರ್ರಫ್‌ ಸುದೀರ್ಘ ಮಾತುಕತೆ ನಡೆಸಿದ್ದಾರೆ. ಮುಷರ್ರಫ್‌ ಮುಂದಿನ ವಾರದಲ್ಲಿ ಸೌದಿಗೆ ಭೇಟಿ ನೀಡಿ ನಾಯಕರ ಜೊತೆ ಮಾತುಕತೆ ನಡೆಸುವ ಇಂಗಿತ ವ್ಯಕ್ತಪಡಿಸಿದ್ದಾರೆ. (ಪಿ.ಟಿ.ಐ)