ಬೆಂಗಳೂರು ನನ್ನ ಎರಡನೆಯ ಮನೆ : ಗೋಪಿಚಂದ್‌ ಬಣ್ಣನೆ

ಬೆಂಗಳೂರು : ಆಲ್‌ ಇಂಗ್ಲೆಂಡ್‌ ಓಪನ್‌ ಚಾಂಪಿಯನ್‌ಷಿಪ್‌ ಗೆಲ್ಲುವ ಮೂಲಕ ಅತ್ಯುತ್ತಮ ಸಾಧನೆ ಮೆರೆದ ದೇಶದ ಅಗ್ರ ಕ್ರಮಾಂಕದ ಬ್ಯಾಡ್ಮಿಂಟನ್‌ ಆಟಗಾರ ಪುಲ್ಲೇಲ ಗೋಪಿಚಂದ್‌ ಹಾಗೂ ಅವರ ಕೋಚ್‌ ಗಂಗೂಲಿ ಪ್ರಸಾದ್‌ ಅವರಿಗೆ ರಾಜ್ಯ ಸರ್ಕಾರ ಬೆಂಗಳೂರಿನಲ್ಲಿ ನಿವೇಶನ ನೀಡುವುದೆಂದು ಮುಖ್ಯಮಂತ್ರಿ ಎಸ್‌.ಎಂ. ಕೃಷ್ಣ ಹೇಳಿದ್ದಾರೆ.

ಗುರುವಾರ ವಿಧಾನಸೌಧದ ಮುಂಭಾಗದಲ್ಲಿ ನಡೆದ ಸರಳ ಸಮಾರಂಭವೊಂದರಲ್ಲಿ ಗೋಪಿಚಂದ್‌ ಅವರಿಗೆ ಶಾಲು ಹಾಗೂ ಗಂಧದ ಕೆತ್ತನೆಯ ಸುಂದರ ಶ್ರೀಕೃಷ್ಣನ ಮೂರ್ತಿಯನ್ನು ನೀಡಿ ಪುರಸ್ಕರಿಸಿ, ಮುಖ್ಯಮಂತ್ರಿ ಕೃಷ್ಣ ಮಾತನಾಡುತ್ತಿದ್ದರು. ಪ್ರಕಾಶ್‌ ಪಡುಕೋಣೆ ಪ್ರಶಸ್ತಿ ಗಳಿಸಿದ 21 ವರ್ಷಗಳ ನಂತರ ಚಾಂಪಿಯನ್‌ಷಿಪ್‌ ಗಳಿಸಿದ ಗೋಪಿಚಂದ್‌ ಅವರ ಸಾಧನೆಯನ್ನು ಮುಕ್ತಕಂಠದಿಂದ ಹೊಗಳಿದ ಅವರು, ಮುಂದಿನ ವರ್ಷವೂ ಗೋಪಿಚಂದ್‌ ಚಾಂಪಿಯನ್‌ಷಿಪ್‌ ಗೆಲ್ಲಲಿ, ವಯಸ್ಸು ಅವರ ಪರವಿದೆ ಎಂದು ಹಾರೈಸಿದರು.

ಇದಕ್ಕೂ ಮುನ್ನ , ಬೆಂಗಳೂರಿಗೆ ಆಗಮಿಸಿದ ಗೋಪಿಚಂದ್‌ ಅವರಿಗೆ ವಿಮಾನ ನಿಲ್ದಾಣದಲ್ಲಿ ಆತ್ಮೀಯ ಸ್ವಾಗತ ನೀಡಲಾಯಿತು. ಕ್ರೀಡಾ ಸಚಿವ ಎಸ್‌.ಎಸ್‌. ಮಲ್ಲಿಕಾರ್ಜುನ ಹಾಗೂ ಭಾರತೀಯ ಕ್ರೀಡಾ ಪ್ರಾಧಿಕಾರದ (ದಕ್ಷಿಣ ವಲಯ) ಕಾರ್ಯಕಾರಿ ನಿರ್ದೇಶಕ ಎಂ.ಪಿ. ಗಣೇಶ್‌ ವಿಮಾನ ನಿಲ್ದಾಣದಲ್ಲಿ ಹಾಜರಿದ್ದರು.

ತೆರೆದ ಜೀಪಿನಲ್ಲಿ ಆಲ್‌ ಇಂಗ್ಲೆಂಡ್‌ ಓಪನ್‌ ಚಾಂಪಿಯನ್‌ಷಿಪ್‌ ಗೆದ್ದ ಗೋಪಿಚಂದ್‌ ಅವರನ್ನು ಮೆರವಣಿಗೆ ಮಾಡಲಾಯಿತು. ಬೆಚ್ಚನೆಯ ಸ್ವಾಗತಕ್ಕೆ ಸ್ಪಂದಿಸಿದ ಆಂಧ್ರಮೂಲದ ಗೋಪಿಚಂದ್‌ ಕರ್ನಾಟಕವನ್ನು ತಮ್ಮ ಎರಡನೆಯ ಮನೆ ಎಂದು ಬಣ್ಣಿಸಿದರು ಹಾಗೂ ತಮ್ಮ ನಿವೃತ್ತಿ ನಂತರ ರಾಜ್ಯಕ್ಕೆ ಯಾವುದೇ ಬಗೆಯ ಸೇವೆ ಸಲ್ಲಿಸಲು ತಾವು ಉತ್ಸುಕರಾಗಿರುವುದಾಗಿ ಹೇಳಿದರು.

(ಯುಎನ್‌ಐ)