ವಿಶ್ವಾಸ ಮತ ಯಾಚನೆಗೆ ವಾಜಪೇಯಿ ನಿರ್ಧಾರ

ನವದೆಹಲಿ : ರಕ್ಷಣಾ ಹಗರಣದ ಆರೋಪದ ಹಿನ್ನೆಲೆಯಲ್ಲಿ ಎನ್‌ಡಿಎ ಸರ್ಕಾರ ಬರುವ ವಾರ ಸಂಸತ್ತಿನಲ್ಲಿ ವಿಶ್ವಾಸ ಮತ ಯಾಚಿಸಲಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

ತೃಣಮೂಲ ಕಾಂಗ್ರೆಸ್‌ನ ಮಮತಾ ಬ್ಯಾನರ್ಜಿ ಹೊರನಡೆದಿರುವ ಪ್ರಸ್ತುತ ಪರಿಸ್ಥಿತಿಯಲ್ಲಿ ಎನ್‌ಡಿಎ ಪ್ರಮುಖ ಅಂಗ ಪಕ್ಷ ತೆಲುಗು ದೇಶಂನೊಂದಿಗೆ ಚರ್ಚಿಸಿ ವಿಶ್ವಾಸ ಮತ ಯಾಚನೆ ಬಗ್ಗೆ ಅಂತಿಮ ನಿರ್ಣಯ ಕೈಗೊಳ್ಳಲಾಗುವುದು. ಶುಕ್ರವಾರ 2 ತಾಸಿಗೂ ಹೆಚ್ಚು ಕಾಲ ನಡೆದ ಎನ್‌ಡಿಎ ಸಭೆಯಲ್ಲಿ ಈ ವಿಷಯದ ವಾಸನೆ ಬಡಿಯಿತು.

ಸುಪ್ರಿಂಕೋರ್ಟ್‌ ನ್ಯಾಯಾಧೀಶರಿಂದ ತನಿಖೆ : ಸುಪ್ರಿಂಕೋರ್ಟಿನ ಹಾಲಿ ನ್ಯಾಯಾಧೀಶರೊಬ್ಬರಿಂದ ರಕ್ಷಣಾ ಹಗರಣ ಕುರಿತಂತೆ ಸಮಗ್ರ ತನಿಖೆ ನಡೆಸಲು ಸಭೆ ಅನುಮೋದಿಸಿತು . ತನಿಖೆ ನಡೆಸಲು ನ್ಯಾಯಾಧೀಶರನ್ನು ನೇಮಿಸುವಂತೆ ಪ್ರಧಾನಿ ವಾಜಪೇಯಿ, ಸುಪ್ರಿಂಕೋರ್ಟ್‌ ಮುಖ್ಯ ನ್ಯಾಯಮೂರ್ತಿ ಎ.ಎಸ್‌.ಆನಂದ್‌ ಅವರನ್ನು ಕೋರಲಿದ್ದಾರೆ. ತೃಣಮೂಲ ಕಾಂಗ್ರೆಸ್‌ನೊಂದಿಗೆ ಯಾವುದೇ ಮಾತುಕತೆ ನಡೆಸಕೂಡದು ಎಂದು ತೀರ್ಮಾನಿಸಲಾಯಿತು. ರಾಜೀನಾಮೆ ಕೊಟ್ಟಿರುವ ಸಮತಾ ಪಕ್ಷದ ಸಚಿವರು ತಮ್ಮ ಪಟ್ಟು ಸಡಿಲಿಸುವಂತೆ ಮನವೊಲಿಸಬೇಕೆಂದು ಜಾರ್ಜ್‌ ಫರ್ನಾಂಡಿಸ್‌ ಅವರಲ್ಲಿ ಪ್ರಧಾನಿ ಮನವಿ ಮಾಡಿಕೊಂಡಿದ್ದಾರೆ ಎಂದು ರಾಸಾಯನಿಕ ಮತ್ತು ಕೀಟನಾಶಕಗಳ ಖಾತೆ ಸಚಿವ ಸುಖದೇವ್‌ ಸಿಂಗ್‌ ಧಿಂಡ್ಸಾ ಹೇಳಿದರು.

ಜಾರ್ಜ್‌ ಇನ್ನು ಎನ್‌ಡಿಎ ಸಂಚಾಲಕ : ಪ್ರಧಾನಿ ಕಚೇರಿಯ ಯಾವುದೇ ಅಧಿಕಾರಿ ರಾಜೀನಾಮೆ ಕೊಡಕೂಡದು. ಈ ಆರೋಪದ ಬಗ್ಗೆ ಇನ್ನು 6 ತಿಂಗಳಲ್ಲಿ ತನಿಖೆ ಮುಗಿಯಲಿದೆ. ಜಾರ್ಜ್‌ ಫರ್ನಾಂಡಿಸ್‌ ಅವರು ನಿರ್ದೋಷಿ ಅನ್ನುವುದೇ ಎನ್‌ಡಿಎ ನಂಬುಗೆ. ಅವರು ನಿರ್ದೋಷಿ ಎಂಬುದು ಸಾಬೀತಾದ ತಕ್ಷಣ ಮತ್ತೆ ಸಚಿವರಾಗಿ ಸರ್ಕಾರಕ್ಕೆ ಸೇರಿಸಿಕೊಳ್ಳಲಾಗುವುದು. ಆವರೆಗೆ ಅವರು ಎನ್‌ಡಿಎ ಸಂಚಾಲಕರಾಗಿ ಕಾರ್ಯ ನಿರ್ವಹಿಸಬೇಕೆಂದು ಸಭೆ ತೀರ್ಮಾನಿಸಿತು ಎಂದು ಸಂಸದೀಯ ವ್ಯವಹಾರಗಳ ಸಚಿವ ಪ್ರಮೋದ್‌ ಮಹಾಜನ್‌ ಹೇಳಿದರು.

(ಪಿಟಿಐ)

ವಾರ್ತಾ ಸಂಚಯ
ಮುಖಪುಟ / ಇವತ್ತು... ಈ ಹೊತ್ತು...