ಮದಕರಿ ನಾಯಕರ ಕಾಲದ ವಿಗ್ರಹಗಳ ವಶ

ಬೆಂಗಳೂರು : ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿಕೋಟಿ ಗಟ್ಟಲೆ ಬೆಲೆ ಬಾಳುವ ಚಿತ್ರದುರ್ಗಮದಕರಿ ನಾಯಕರ ಕಾಲಕ್ಕೆ ಸೇರಿದ್ದೆನ್ನಲಾದ ನೂರಕ್ಕೂ ಹೆಚ್ಚು ಕಲಾತ್ಮಕ ಪಂಚಲೋಹದ ಹಾಗೂ ಕಂಚಿನ ಪ್ರತಿಮೆಗಳನ್ನು ಬೆಂಗಳೂರು ಅಪರಾಧ ವಿಭಾಗದ ಪೊಲೀಸರು ವಶಪಡಿಸಿಕೊಂಡಿದ್ದು, ಈ ಅಪೂರ್ವ ಪ್ರಾಚ್ಯ ವಸ್ತುಗಳನ್ನು ಅಕ್ರಮವಾಗಿ ಮಾರಾಟ ಮಾಡಲು ಯತ್ನಿಸುತ್ತಿದ್ದ ಆರೋಪಿಯಾಬ್ಬನನ್ನು ಬಂಧಿಸಿದ್ದಾರೆ.

18ನೇ ಶತಮಾನ ಅಥವಾ ಅದಕ್ಕೂ ಹಿಂದಿನದೆಂದು ಹೇಳಲಾಗಿರುವ ಈ ಪ್ರಾಚೀನ ವಿಗ್ರಹಗಳನ್ನು ಅಶೋಕಾ ಹೋಟೆಲ್‌ ಎದುರು ಮಾರಾಟ ಮಾಡಲು ಯತ್ನಿಸುತ್ತಿದ್ದ ದೇವಕುಮಾರ್‌ ಎಂಬುವವನನ್ನು ಪೊಲೀಸರು ಬಂಧಿಸಿದ್ದಾರೆ. ಈ ವಿಷಯವನ್ನು ನಗರ ಪೊಲೀಸ್‌ ಕಮೀಷನರ್‌ ಟಿ. ಮಡಿಯಾಳ್‌ ಬುಧವಾರ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.

ಮದಕರಿ ನಾಯಕರ ವಂಶಸ್ಥನೆಂದು ಹೇಳಿಕೊಳ್ಳುವ ಚಿತ್ರದುರ್ಗದ ಗಂಡುಗಲಿ ನಾಯಕ ಎಂಬಾತನ ಸಹಕಾರದೊಂದಿಗೆ ದೇವಕುಮಾರ್‌ ಅಕ್ರಮವಾಗಿ ಈ ವಿಗ್ರಹಗಳನ್ನು ಮಾರಾಟ ಮಾಡುತ್ತಿದ್ದ ಎಂದು ಅವರು ಹೇಳಿದ್ದಾರೆ. ದೇವಕುಮಾರ್‌ ನೀಡಿದ ಸುಳಿವಿನ ಮೇರೆಗೆ ಚಿತ್ರದುರ್ಗದ ಗಂಡುಗಲಿ ನಾಯಕನ ಮನೆಯ ಮೇಲೆ ದಾಳಿ ನಡೆಸಲಾಗಿದೆ. ಈತ ಮದಕರಿ ನಾಯಕರ ವಂಶಸ್ಥ ಎಂಬುದು ಇನ್ನೂ ಖಚಿತಪಟ್ಟಿಲ್ಲ ಎಂದು ಅವರು ಹೇಳಿದರು.

ದೇವಕುಮಾರ್‌ ಸಹ ಗಂಡುಗಲಿ ನಾಯಕರ ಸಂಬಂಧಿ ಎನ್ನಲಾಗಿದೆ. ಗಂಡುಗಲಿ ನಾಯಕರು ಈಗ ನಾಪತ್ತೆಯಾಗಿದ್ದು, ಅವರ ಶೋಧ ಮುಂದುವರಿದಿದೆ. ಹೈಗ್ರೌಂಡ್ಸ್‌ ಪೊಲೀಸರು ಮೊಕದ್ದಮೆ ದಾಖಲಿಸಿಕೊಂಡು ತನಿಖೆ ಮುಂದುವರಿಸಿದ್ದಾರೆ.

ಗೃಹ ಸಚಿವರ ಪ್ರಶಂಸೆ : ಅತ್ಯಮೂಲ್ಯವಾದ ಈ ವಿಗ್ರಹಗಳನ್ನು ವಶಪಡಿಸಿಕೊಂಡಿರುವ ಪೊಲೀಸರನ್ನು ಗೃಹ ಸಚಿವ ಮಲ್ಲಿಕಾರ್ಜುನ ಖರ್ಗೆ ಅವರು ಮುಕ್ತ ಕಂಠದಿಂದ ಪ್ರಶಂಸಿಸಿದ್ದಾರೆ.

English summary

one arrested : archeological monuments recovered