ಅವನ ಆಟ ನಿಲ್ಲಿಸಬೇಕು ನನ್ನ ನೆಚ್ಚಿನ ಸಂಪಾದಕರೇ

ಅವನ ಆಟ ನಿಲ್ಲಿಸಬೇಕು ನನ್ನ ನೆಚ್ಚಿನ ಸಂಪಾದಕರೇ ,

ನನ್ನ ಹೃತ್ಪೂರ್ವಕ ವಂದನೆಗಳು. ನಿಮ್ಮ ಎಲ್ಲಾ ಅಂಕಣಗಳು ತುಂಬಾ ಚೆನ್ನಾಗಿ ಮೂಡಿ ಬರುತ್ತಿವೆ. ಸುದ್ದಿಗಳೇ ಆಗಲಿ , ಒಳನಾಡು ಹಾಗೂ ಹೊರನಾಡಿನ ವಿಷಯಗಳೇ ಇರಲಿ, ಸಾಹಿತ್ಯವೇ ಆಗಿರಲಿ, ಆರೋಗ್ಯದ ವಿಚಾರವೇ ಇರಲಿ , ಅದ್ಭುತವಾಗಿ ವರ್ಣಿಸಲಾಗಿದೆ. ಮನಸು ಸೆಳೆಯುವಂಥದ್ದು ಡಾ. ರಾಜ್‌ಕುಮಾರ್‌ ಅವರ ಅಪಹರಣ ಸಂಬಂಧಿತ ಸುದ್ದಿಗಳು... ನನಗೆ ಅವರು ಚೆನ್ನಾಗಿದ್ದಾರೆ ಎಂಬ ಸುದ್ದಿ ನಿಮ್ಮ ವಾರ್ತೆಗಳಲ್ಲಿ ಓದಿದ ತಕ್ಷಣ ಮನಸ್ಸಿಗೆ ನೆಮ್ಮದಿ ಹಾಗೂ ಸಂತೋಷಗಳೂ ಒಮ್ಮೆಗೇ ಆದವು.

ಬೆಂಗಳೂರಿನಲ್ಲಿ ಜನರು ರೊಚ್ಚಿಗೆದ್ದಿದ್ದಾರೆ....ಸಹಜ... ನಾವೆಲ್ಲಾ ಪ್ರೀತಿಸುವ ನೆಚ್ಚಿನ ನಾಯಕ, ಒಬ್ಬ ಕೀಳು ಮಟ್ಟದ ದಂತಚೋರನಿಂದ ಅಪಹರಣಕ್ಕೊಳಗಾಗಿದ್ದಾರೆ ಎಂದರೆ ಎಂಥ ಕಲ್ಲು ಹೃದಯವೂ ಮರುಗುವುದು ಸಹಜ.

ಆದರೆ ಜನ ಒಂದು ವಿಷಯವನ್ನು ಮರೆಯದಿದ್ದರೆ ಒಳಿತು. ಒಂದು ಸಲ ಡಾ. ರಾಜ್‌ ಅವರು ಅಲ್ಲಿಂದ ಬಂದ ಮೇಲೆ ನಾವು ಕನ್ನಡಿಗರೆಲ್ಲ ಬೇಕಾದರೆ ಕಾಡಿಗೆ ನುಗ್ಗಬಹುದು. ಜನ ಶಕ್ತಿಯ ಮುಂದೆ ಎಂಥ ಶಕ್ತಿಯೂ ನಿಲ್ಲಲಾರದು. ನಮ್ಮ ಸರಕಾರಗಳು ಒಂದು ಇಲಿಯನ್ನು ಹಿಡಿಯುವ ಶಕ್ತಿಯನ್ನೂ ಕಳೆದುಕೊಂಡು ಬಿಟ್ಟಿವೆ. ಅಂಥ ಸರಕಾರವನ್ನು ನಂಬಿಕೊಂಡು ಕುಳಿತರಾಗದು. ಜನರು ಮುಂದೆ ಬರಬೇಕು. ಈಗ ನಡೆಯುತ್ತಿರುವ ಪ್ರತಿಭಟನೆಗಳು , ಸಭೆಗಳು, ಭಜನೆಗಳು, ಪೂಜೆ ಹಾಗೂ ಪ್ರಾರ್ಥನೆಗಳು ನಾವು ಕನ್ನಡಿಗರೆಲ್ಲಾ ಒಂದು, ನಮ್ಮನ್ನು ಅಳಿಸಿಹಾಕುವುದಾಗಲೀ, ನಮ್ಮ ಹುತ್ತಕ್ಕೆ ಕೈ ಹಾಕುವುದಾಗಲಿ ಮಾಡುವುದು ಹಾನಿಕಾರಕ ಎಂಬುದನ್ನು ಸಾಬೀತು ಪಡಿಸಿವೆ. ನಮ್ಮ ಅಭಿಮಾನವನ್ನು ಕೆಣಕುವುದು ಆ ವೀರಪ್ಪನಿಗೆ ಆಟ ಆಗಿದೆ. ಅವನ ಆಟವನ್ನು ನಿಲ್ಲಿಸಲೇಬೇಕು. ಅಣ್ಣಾವ್ರ ಅಪಹರಣ ಅವರ ಕೊನೆ ಅಪಹರಣವಾಗಬೇಕು. ಅಂಥ ನಿಟ್ಟಿನಲ್ಲಿ ನಿಮ್ಮ ಪತ್ರಿಕೆ ಜನರ ಭಾವನೆಗಳನ್ನು ಬಿತ್ತರಿಸುವಂತಹ ಕೆಲಸ ಮಾಡಬೇಕು ಎಂಬುದೇ ನನ್ನ ಕಳಕಳಿಯ ಪ್ರಾರ್ಥನೆ. ನಿಮ್ಮಲ್ಲಿ ಸರಕಾರವನ್ನು ಬಡಿದೆಬ್ಬಿಸುವ ಶಕ್ತಿಯಿದೆ ಎಂಬುದನ್ನು ಮರೆಯದಿರಿ. ನನ್ನ ಆಶಯ ವೀರಪ್ಪನನ್ನು ಬಂಧೀಖಾನೆಯಲ್ಲಿ ನೋಡುವುದು... ಅದೂ ಕರ್ನಾಟಕದ ಬಂಧೀಖಾನೆಯಲ್ಲಿ. ಅವನು ಈವರೆಗೆ ನಡೆಸಿದ ಅನಾಹುತಗಳು ಕರ್ನಾಟಕದವರ ಪಾಲಿನಲ್ಲಿ ಹೆಚ್ಚಿಗೆ ಇದೆ. ಆದ್ದರಿಂದ ಅವನ ವಿಚಾರಣೆ ಇಲ್ಲೇ ಆಗಬೇಕು.

ನಿಮ್ಮ ಒಳಿತಿನ ಕೆಲಸವನ್ನು ಹೀಗೇ ಮುಂದುವರೆಸಿ ಎಂದು ಹಾರೈಸುವ ಓದುಗ.

English summary

Solidarity With Rajkumar