ಎಮ್ಮ ಮನೆಯಂಗಳದಿ ಬೆಳದೊಂದು ಹೂವನ್ನು..

ಬೆಂಗಳೂರಿನಲ್ಲಿ ಸ್ವಂತ ಮನೆಯೇ ಇಲ್ಲದಿದ್ದರೆ ಹೇಗೆ ಸಾಧ್ಯ? ಮನೆ ಕೊಳ್ಳಬೇಕು ಎಂದು ಆಗಾಗ ಚಿಂತೆ ಜೋರಾದಾಗ ಮನೆ ಹುಡುಕುವ ಪ್ರಯತ್ನ ಮಾಡಿ ಮತ್ತೆ ಅದನ್ನು ಮುಂದೆ ಹಾಕುವ ಕ್ರಿಯೆ ಆಗಾಗ ಮಾಡುತ್ತಿದ್ದೇನೆ. ಇದು ಸುಮಾರು ಹತ್ತು ವರ್ಷಗಳಿಂದ ಮಾಡಿಕೊಂಡು ಬಂದಿದ್ದೇನೆ. ಇನ್ನೂ ಸ್ವಂತ ಮನೆ ಆಗಿಲ್ಲ, ಇರಲಿ.

ಇದೇ ರೀತಿ ಸುಮಾರು ಒಂದು ವರ್ಷದ ಹಿಂದೆ ಒಮ್ಮೆ ಮನೆ ಹುಡುಕುತ್ತಾ ಇಸ್ರೋ ಬಡಾವಣೆಯ ಪಕ್ಕ ಒಂದು ಅಪಾರ್ಟ್ಮೆಂಟ್ ಮನಸ್ಸಿಗೆ ಖುಷಿಯಾಗಿ ಅದರ ಯಜಮಾನರೊಡನೆ ಮಾತನಾಡಲು ಅವರ ಮನೆಗೆ ಹೋದೆ. ಮಾತುಕತೆಯಾಗಿ ಹೊರಗೆ ಬರುವಾಗ ಅವರ ಮನೆಯಂಗಳದಲ್ಲಿ ದೊಡ್ಡದಾಗಿ ಬೆಳೆದಿದ್ದ ಬ್ರಹ್ಮಕಮಲದ ಗಿಡ ಕಣ್ಣಿಗೆ ಬಿತ್ತು.

ಮುಂದಿನ ಹಂತದ ಮಾತುಕತೆಗೆ ಹೋದಾಗ ಧೈರ್ಯಮಾಡಿ ಅವರಲ್ಲಿ ಕೇಳಿಕೊಂಡು ಆ ಗಿಡದ ಒಂದು ಚಿಕ್ಕ ಎಲೆ/ಗೆಲ್ಲು ಪಡಕೊಂಡು ಬಂದೆ. ಅದನ್ನು ಬೆಳೆಸಲು ನಾನಿರುವ ಬಾಡಿಗೆ ಮನೆಯ ಮುಂದೆಯಾಗಲೀ ಮುಂದಾಗಲೀ ಖಾಲಿ ಜಾಗ, ಮಣ್ಣಿರುವಂತದ್ದು ಇಲ್ಲವೇ ಇಲ್ಲ. ಅದು ಸುಮಾರು ಹತ್ತು ಹನ್ನೆರಡು ಅಡಿ ಬೆಳೆಯುವ ಕಳ್ಳಿ ಜಾತಿಯ ಗಿಡ. ಬೆಳೆಸಲು ವಿಶೇಷ ಆರೈಕೆಯೇನೂ ಬೇಕಾಗಿಲ್ಲ. ಕೊನೆಗೆ ಒಂದು ದೊಡ್ಡ ಗಾತ್ರದ ಪಾತಿ ಕೊಂಡುಕೊಂಡು ಅದಕ್ಕೆ ಹಾಕಲು ಮಣ್ಣನ್ನೂ ಕೊಂಡುಕೊಂಡು ಅದರಲ್ಲಿ ಗಿಡ ನೆಟ್ಟದ್ದಾಯಿತು.

ಗಿಡ ಚೆನ್ನಾಗಿಯೇನೋ ಬೆಳೆಯಿತು. ಕಳೆದ ವರ್ಷ ಒಮ್ಮೆ ಅದರಲ್ಲಿ ಮೊಗ್ಗು ಬಿಟ್ಟಿತ್ತು ಆದರೆ ಅದು ಪೂರ್ತಿ ಅರಳುವ ಮೊದಲೇ ತುಂಡಾಗಿ ಬಿತ್ತು. ಸುಮಾರು ವಾರದ ಹಿಂದೆ ಎರಡು ಮೊಗ್ಗು ಬಿಟ್ಟಿತು. ಪ್ರತಿ ದಿನ ಅದು ಎಷ್ಟು ದೊಡ್ಡದಾಗಿ ಬೆಳೆದಿದೆ, ಯಾವಾಗ ಅರಳಬಹುದು ಎಂದು ಕಾತರದಿಂದ ನೋಡುವುದು ಮನೆಮಂದಿಯೆಲ್ಲರ ಕುತೂಹಲವಾಯಿತು. ಮೊಗ್ಗಿನ ಬೆಳವಣಿಗೆಯ ವಿವಿಧ ಹಂತಗಳಲ್ಲಿ ಫೋಟೊ ತೆಗೆದೂ ಆಯಿತು. ಡಿಜಿಟಲ್ ಕ್ಯಾಮರಾ ಇರುವುದರ ಲಾಭ ಇದೇ ನೋಡಿ. ಫಿಲ್ಮ್ ಹಾಳಾಗುವ ಭಯವಿಲ್ಲದೆ ಎಷ್ಟು ಬೇಕಾದರೂ ಕ್ಲಿಕ್ ಮಾಡಬಹುದು.

ಹಾಗೆಯೇ ಮಾಡಿದೆವು ಕೂಡ. ಮೊನ್ನೆ ರಾತ್ರಿ (02/07/09) ಸುಮಾರು 9 ಗಂಟೆ ಹೊತ್ತಿಗೆ ಹೂವುಗಳೆರಡೂ ದೊಡ್ಡದಾಗಿ ಅರಳಿದ್ದವು. ಮಗನಿಗೆ ಇಂದು ಇಂಜಿನಿಯರಿಂಗ್ 4ನೆಯ ಸೆಮೆಸ್ಟರಿನ ಪರೀಕ್ಷೆ ಇದ್ದರೂ ಓಡಿ ಹೋಗಿ ನನಗೆ ಆಸ್ಪದವನ್ನೇ ಕೊಡದೆ ಫೋಟೋ ಕ್ಲಿಕ್ ಮಾಡಿದ. ಮತ್ತೆ ನಾನೂ ಕೆಲವು ಫೋಟೋ ಕ್ಲಿಕ್ ಮಾಡಿದೆ. ಎರಡು ಹೂವುಗಳಲ್ಲಿ ಒಂದನ್ನು ಗಿಡದಲ್ಲೇ ಬಿಟ್ಟು ಇನ್ನೊಂದನ್ನು ಕೊಯಿದು ದೇವರ ಮುಡಿಗೆ ಏರಿಸಿ ಆಯಿತು. ಇಂದು ಆ ಫೋಟೋಗಳನ್ನು ಪಿಕಾಸಾದಲ್ಲಿ ಹಾಕಿಯೂ ಆಯಿತು.

ಓದುಗರ ಅವಗಾಹನೆಗೆ ಕೆಲವು ಫೋಟೋಗಳನ್ನು ಲಗತ್ತಿಸಿದ್ದೇನೆ. ಹೆಚ್ಚಿನ ಫೋಟೋಗಳನ್ನು ಜಾಲತಾಣದಲ್ಲಿ ನೋಡಬಹುದು.