ಒಂದೇ ರೈಲು ಯಾತ್ರೆ 3 ಧಾಮ, 11 ಜ್ಯೋತಿರ್ಲಿಂಗ ದರ್ಶನ! IRCTCಯಿಂದ ವಿಶೇಷ ಪ್ಯಾಕೇಜ್

By Shiddalingesh S

Updated: Thursday, June 11, 2026, 14:54 [IST]

ಧಾರ್ಮಿಕ ಕ್ಷೇತ್ರಗಳ ದರ್ಶನ ಮಾಡಲು ಬಯಸುವ ಭಕ್ತರಿಗಾಗಿ ಭಾರತೀಯ ರೈಲ್ವೆ ಇಲಾಖೆ ಮತ್ತು ಪ್ರವಾಸೋದ್ಯಮ ನಿಗಮ (IRCTC) ವಿಶೇಷ ಪ್ಯಾಕೇಜ್ ಘೋಷಿಸಿದೆ. 'ಭಾರತ ಗೌರವ ಡಿಲಕ್ಸ್ ಪ್ರವಾಸಿ ರೈಲು' ಮೂಲಕ ಭಕ್ತರು ಒಂದೇ ಪ್ರವಾಸದ ಯಾತ್ರೆಯಲ್ಲಿ 3 ಪ್ರಮುಖ ಧಾಮಗಳು ಹಾಗೂ 11 ಜ್ಯೋತಿರ್ಲಿಂಗಗಳ ದರ್ಶನ ಪಡೆಯುವ ಸದಾವಕಾಶ ಭಾರತೀಯ ರೈಲ್ವೆ ಇಲಾಖೆ ಕಲ್ಪಿಸಿದೆ.

ಈ ವಿಶೇಷ ದೇವರ ದರ್ಶನ ಯಾತ್ರೆ: 3 ಧಾಮ ಮತ್ತು 11 ಜ್ಯೋತಿರ್ಲಿಂಗದ ಪ್ರವಾಸವು ಸೆಪ್ಟೆಂಬರ್ 3ರಂದು ದೆಹಲಿಯ ಸಫ್ದರ್‌ಜಂಗ್ ರೈಲು ನಿಲ್ದಾಣದಿಂದ ಪ್ರಾರಂಭವಾಗಲಿದೆ. ಒಟ್ಟು 17 ರಾತ್ರಿ ಮತ್ತು 18 ದಿನಗಳ ಈ ಯಾತ್ರೆಯಲ್ಲಿ ಸುಮಾರು 10,000 ಕಿಲೋಮೀಟರ್‌ ದೂರ ಸಂಚರಿಸಲಾಗುತ್ತದೆ.

ಯಾವ ಧಾರ್ಮಿಕ ಕ್ಷೇತ್ರಗಳ ದರ್ಶನ?

ಈ ಯಾತ್ರೆಯಲ್ಲಿ ಪೂರ್ವ ಭಾರತದ ಜಗನ್ನಾಥ ಪುರಿ, ದಕ್ಷಿಣ ಭಾರತದ ರಾಮೇಶ್ವರಂ ಹಾಗೂ ಪಶ್ಚಿಮ ಭಾರತದ ದ್ವಾರಕಾಧೀಶ ಧಾಮ ಸೇರಿದಂತೆ ಮೂರು ಪ್ರಮುಖ ಧಾಮಗಳ ದರ್ಶನ ಸಿಗಲಿದೆ. ಇದರ ಜೊತೆಗೆ ಕಾಶಿ ವಿಶ್ವನಾಥ, ಬೈದ್ಯನಾಥ ಧಾಮ, ಮಲ್ಲಿಕಾರ್ಜುನ, ಭೀಮಾಶಂಕರ್, ಗ್ರೀಷ್ಣೇಶ್ವರ, ತ್ರ್ಯಂಬಕೇಶ್ವರ, ನಾಗೇಶ್ವರ, ಸೋಮನಾಥ, ಮಹಾಕಾಳೇಶ್ವರ ಹಾಗೂ ಓಂಕಾರೇಶ್ವರ ಸೇರಿದಂತೆ 11 ಜ್ಯೋತಿರ್ಲಿಂಗಗಳ ದರ್ಶನಕ್ಕೆ ಈ ಅವಕಾಶ ಕಲ್ಪಿಸಲಾಗಿದೆ.

ರೈಲು ಹತ್ತುವ ಸ್ಥಳಗಳು

ದೆಹಲಿ ಸಫ್ದರ್‌ಜಂಗ್‌ ಮಾತ್ರ ಅಲ್ಲದೆ ಗಾಜಿಯಾಬಾದ್, ಅಲಿಗಢ, ತುಂಡ್ಲಾ, ಇಟಾವಾ, ಕಾನ್ಪುರ ಹಾಗೂ ಪ್ರಯಾಗರಾಜ್ ರೈಲು ನಿಲ್ದಾಣಗಳಲ್ಲಿಯೂ ಪ್ರಯಾಣಿಕರು ರೈಲು ಹತ್ತಬಹುದು. ಪ್ರವಾಸದ ವೇಳೆ ವಾರಾಣಸಿ, ದೇವಘರ್, ಪುರಿ, ರಾಮೇಶ್ವರಂ, ಪುಣೆ, ನಾಸಿಕ್, ದ್ವಾರಕಾ, ಸೋಮನಾಥ ಹಾಗೂ ಉಜ್ಜಯಿನಿ ಸೇರಿದಂತೆ ಹಲವು ಪ್ರಮುಖ ಧಾರ್ಮಿಕ ಸ್ಥಳಗಳಿಗೆ ಭೇಟಿ ನೀಡಲಾಗುತ್ತದೆ.

ಕೇವಲ 150 ಪ್ರಯಾಣಿಕರಿಗೆ ಅವಕಾಶ

ಭಾರತ ಗೌರವ ಡಿಲಕ್ಸ್ ಎಸಿ ಪ್ರವಾಸದ ರೈಲಿನಲ್ಲಿ ಒಟ್ಟು 150 ಪ್ರಯಾಣಿಕರಿಗೆ ಮಾತ್ರ ಅವಕಾಶವಿದೆ. ರೈಲಿನಲ್ಲಿ ಫಸ್ಟ್ ಎಸಿ, ಸೆಕೆಂಡ್ ಎಸಿ ಮತ್ತು ಥರ್ಡ್ ಎಸಿ ಸೌಲಭ್ಯಗಳಿವೆ. ಪ್ರಯಾಣಿಕರ ಅನುಕೂಲಕ್ಕಾಗಿ ರೈಲಿನಲ್ಲಿ ರೆಸ್ಟೋರೆಂಟ್, ಆಧುನಿಕ ಅಡುಗೆಮನೆ, ಶವರ್ ಬಾತ್ ವ್ಯವಸ್ಥೆ, ಸೆನ್ಸರ್ ಆಧಾರಿತ ಶೌಚಾಲಯ, ಸಿಸಿಟಿವಿ ನಿಗಾವ್ಯವಸ್ಥೆ ಹಾಗೂ ಭದ್ರತಾ ಸಿಬ್ಬಂದಿ ಒದಗಿಸಲಾಗಿದೆ.

Recommended For You

ಗೋಲ್ಡನ್ ಚಾರಿಯಟ್‌ನಲ್ಲಿ ಪ್ರವಾಸ ಈಗ ಮತ್ತಷ್ಟು ಅಗ್ಗ: ಐಆರ್‌ಸಿಟಿಸಿಯಿಂದ 20% ದರ ರಿಯಾಯಿತಿ

ಪ್ಯಾಕೇಜ್‌ನಲ್ಲಿ ಏನೆಲ್ಲ ಸಿಗಲಿದೆ?

IRCTC ಮಾಹಿತಿ ಪ್ರಕಾರ, ಈ ಪ್ಯಾಕೇಜ್‌ನಲ್ಲಿ ರೈಲು ಪ್ರಯಾಣ, ಮೂರು ನಕ್ಷತ್ರ ಹೋಟೆಲ್ ವಸತಿ, ಶುದ್ಧ ಸಸ್ಯಾಹಾರಿ ಊಟ, ಎಸಿ ವಾಹನಗಳಲ್ಲಿ ಸ್ಥಳೀಯ ಪ್ರವಾಸ, ಪ್ರಯಾಣ ವಿಮೆ ಹಾಗೂ ಪ್ರವಾಸ ವ್ಯವಸ್ಥಾಪಕರ ಸೇವೆ ಒಳಗೊಂಡಿರುತ್ತದೆ.

ಪ್ಯಾಕೇಜ್‌ನಲ್ಲಿ ಒಳಗೊಂಡಿರುವ ಪ್ರಮುಖ ಸೌಲಭ್ಯಗಳು:

ಐಆರ್‌ಸಿಟಿಸಿ ನೀಡಿರುವ ಮಾಹಿತಿಯ ಪ್ರಕಾರ, ಈ ಪ್ರವಾಸದ ಪ್ಯಾಕೇಜ್‌ನಲ್ಲಿ ಪ್ರಯಾಣಿಕರಿಗೆ ಈ ಕೆಳಗಿನ ಎಲ್ಲಾ ಸೌಲಭ್ಯಗಳು ಸಿಗಲಿವೆ:

ಪ್ರಯಾಣ ಮತ್ತು ವಸತಿ: ಆರಾಮದಾಯಕ ರೈಲು ಪ್ರಯಾಣ ಹಾಗೂ 3 ಸ್ಟಾರ್ (3-Star) ಹೋಟೆಲ್‌ಗಳಲ್ಲಿ ತಂಗಲು ವಸತಿ ವ್ಯವಸ್ಥೆ.

ಆಹಾರ: ಪ್ರವಾಸದ ಅವಧಿಯಲ್ಲಿ ಶುದ್ಧ ಸಸ್ಯಾಹಾರಿ ಊಟದ ಒದಗಿಸಲಾಗುತ್ತದೆ.

ಸ್ಥಳೀಯ ವೀಕ್ಷಣೆ: ಪ್ರೇಕ್ಷಣೀಯ ಸ್ಥಳಗಳನ್ನು ವೀಕ್ಷಿಸಲು ಎಸಿ (AC) ವಾಹನಗಳ ಸಾರಿಗೆ ವ್ಯವಸ್ಥೆ.

ಸುರಕ್ಷತೆ ಮತ್ತು ಗೈಡ್: ಪ್ರಯಾಣಿಕರ ಸುರಕ್ಷತೆಗಾಗಿ ಟ್ರಾವೆಲ್ ಇನ್ಶೂರೆನ್ಸ್ ಮತ್ತು ಇಡೀ ಪ್ರವಾಸವನ್ನು ಮುನ್ನಡೆಸಲು ಪರಿಣಿತ ಪ್ರವಾಸ ವ್ಯವಸ್ಥಾಪಕರ ಸೇವೆಯನ್ನು ಒದಗಿಸಲಾಗುತ್ತದೆ.