• search
  • Live TV
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
ತ್ವರಿತ ಅಲರ್ಟ್ ಗಳಿಗಾಗಿ
ನೋಟಿಫಿಕೇಷನ್ ಅನುಮತಿಸಿ  
For Daily Alerts

ಪಾರ್ವತಿಪುತ್ರ ಗಣೇಶನಿಗೆ ಒಲವಿನ ಓಲೆ

By Staff
|

ದೇವಾಧಿದೇವ ಗಣಪತಿ ಸಾರ್ವಭೌಮನಿಗೆ - ಇಪ್ಪತ್ತೊಂದು ನಮಸ್ಕಾರಗಳು. ಬೇಡುವ ಆಶೀರ್ವಾಗಳು.

ಭಗವಂತಾ, ಹೇಳಿ ಕೇಳಿ ನೀನು ದೇವ್ರು. ಅದೂ ಏನು? ಗಣನಾಯಕ. ನಿಂಗೆ ತಿಳೀದೇ ಇರೋದು ಏನಿರುತ್ತೆ ? ಆದ್ರೂ ಹೇಳಿಬಿಡ್ತೀನಿ ಕೇಳು-ಭೂಲೋಕದ ಜನರೆಲ್ಲ ಈಗ ದೊಡ್ಡ ಖುಷೀಲಿದಾರೆ. ಅವರೆಲ್ಲರ ಖುಷಿಗೆ ಕಾರಣ ಆಗಿರೋದು ನೀನು ! ಇವತ್ತಾಗಲೇ ಗುರುವಾರ ತಾನೆ? ಶುಕ್ರವಾರ ಕಳೆದು ಶನಿವಾರ ಬಂದ್ರೆ- ದೇವರೇ, ಅವತ್ತು ನಿನ್ನ ಹುಟ್ಟು ಹಬ್ಬ ! ಹ್ಯಾಪಿ ಬರ್ತ್‌ಡೇ !! ದೈವಭಕ್ತರ ಮಾತಲ್ಲಿ ಹೇಳುವುದಾದರೆ ಅವತ್ತು -ಗಣೇಶ ಚತುರ್ಥಿ. ಈ ಶನಿವಾರ ಅನ್ನೋದು ಅವರ ಪಾಲಿಗೆ- ಭಾದ್ರಪದ ಶುಕ್ಲ ಚೌತಿ ! ಅವತ್ತು ಅವರೆಲ್ಲ ನಿನ್ನನ್ನು ಹೊತ್ತು ತರುವುದೇನು? ಮನೆಯಲ್ಲಿ ಪ್ರತಿಪ್ಠಾಪಿಸುವುದೇನು? ಸಿಂಗರಿಸುವುದೇನು? ಪೂಜೆ ಮಾಡುವ ಸಡಗರವೇನು? ಅದೇ ಜನ ತರಹೇವಾರಿಯ ಕಡುಬು ಮಾಡಿಸಿ ನಿನ್ಮುಂದೆ ಇಡುವಾಗಿನ ಸಡಗರವೇನು ? ಆಹಾ..

A letter to Lord Sri Ganeshaಭಗವಂತಾ, ನಾಡಿದ್ದು ನಿನ್ನ ಹುಟ್ಟುಹಬ್ಬ ಅಂತ ನೆನಪು ಮಾಡಿಕೊಂಡಾಗಲೆಲ್ಲ- ನೀನು ನಮ್ಮ ಫ್ರೆಂಡ್‌ ಆಗಿದ್ದಿದ್ರೆ ಚಂದ ಇರ್ತಿತ್ತು ಅನ್ನಿಸಿಬಿಡ್ತದೆ. ಯಾಕ್‌ ಗೊತ್ತಾ ? ಫ್ರೆಂಡ್‌ ಆಗಿದ್ದಿದ್ರೆ- ಅಕ್ಕರೆಯ ಗಣೇಶ ಮಹಾಪ್ರಭುವಿಗೆ -ನೂರು ಸಾವಿರ ಹಾರೈಕೆಗಳು ಎಂದು ಶುಭಕೋರಬಹುದಿತ್ತು. ನಿಂಗೆ ಫಾರ್ಟಿಪ್ಲಸ್‌ ವಯಸ್ಸಾಗಿದ್ದಿದ್ರೆ- ಹ್ಯಾಪಿ ಬರ್ತ್‌ಡೇ ಟು ಯೂ ಡಿಯರ್‌ ಅಂಕಲ್‌ ಅನ್ನಬಹುದಿತ್ತು. ನನ್ನ ಅಪ್ಪಂದಿರ ತಾತನ ವಯಸ್ಸಿನ ನಿನ್ನ ಚಿತ್ರವೇನಾದ್ರೂ ಇದ್ದಿದ್ದರೆ- ತೀರ್ಥರೂಪ ಗಣೇಶ ಮಹಾಪ್ರಭುಗಳ ಚರಣ ಸನ್ನಿಧಿಗೆ ಅಂತ ಬರೆದು ಆಶೀರ್ವಾದ ಬೇಡಬಹುದಿತ್ತು. ಆದ್ರೆ -ನೀನು ಗೆಳೆಯನಲ್ಲ , ಅಂಕಲ್‌ ಅಲ್ಲ , ಅಪ್ಪನ ವಯಸ್ಸಿನವ ಅಲ್ಲ , ಅಜ್ಜನಲ್ಲ- ನೀನು ದೇವರು. ಸಾಕ್ಷಾತ್‌ ಭಗವವಂತ. ನೀನು ಚಿರಂಜೀವಿ ! ಅದೂ ಏನು? ಸಮಸ್ತ ದೇವತೆಗಳಿಗೂ ಅಧಿನಾಯಕ ! ಅಂಥ ನಿನಗೆ ಹುಟ್ಟುಹಬ್ಬದ ಶುಭಾಶಯ ಕೋರುವುದು ಹೇಗೆ? ಅದು ಚಿಕ್ಕ ಪ್ರಶ್ನೆ . ನಮ್ಮನ್ನ ಸಾವಿರ ಕೋಟಿ ವರ್ಷಗಳಿಂದ ಕಾಪಾಡುತ್ತ(?!) ಬಂದಿರುವ ನಿನಗೆ ಗುಡ್‌ಲಕ್‌ ಹೇಳಿದೆ ಇರೋದಾದ್ರೂ ಹೇಗೆ ? ಇದು ದೊಡ್ಡ ಪ್ರಶ್ನೆ !

ಭಗವಾನ್‌, ಮೊದಲೇ ಹೇಳಿಬಿಡ್ತೀನಿ. ಇದು ತೀರಾ ಆಕಸ್ಮಿಕವಾಗಿ ಸೃಷ್ಟಿಯಾದ ಪತ್ರ. ಇಲ್ಲಿ ಒಂದಿಷ್ಟು ಇತಿಹಾಸ ಕಾಣುತ್ತೆ , ಪ್ಲೀಸ್‌,ಅದನ್ನ ಸೀರಿಯಸ್ಸಾಗಿ ತಗೋಬೇಡ. ಒಂದಿಷ್ಟು ತಮಾಷಿ ಪ್ರಶ್ನೆಗಳೂ ಈ ಪತ್ರದೊಳಗೆ ನುಸುಳಿವೆ. ಅವನ್ನ ಕಂಡು ಸಿಟ್ಟುಮಾಡಿಕೋಬೇಡ. ಪತ್ರದ ಕಡೆ ಕಡೇಗೆ ಪ್ರಶ್ನೆಗಳ ದೊಡ್ಡ ಗೊಂಚಲೇ ಇದೆ. ಅವನ್ನ ಕಂಡು ಮುನಿಸಿಕೊಂಡು ಹೋಗಿಬಿಡಬೇಡ. ಸುಮ್ನೆ ಒಂದ್ಸಲ ಕುತೂಹಲದಿಂದ ಓದಿ ನೋಡು, ಪ್ಲೀಸ್‌..

ಹೌದು ದೇವರೇ, ನಿನ್ನ ಪರಿಚಯ ನಮಗಾದದ್ದು ಬಾಲ್ಯದಲ್ಲಿ . ಅಪ್ಪ ಅಪ್ಪ , ಗಣೇಶನಿಗೆ ಅದ್ಯಾಕಪ್ಪ ಸೊಂಡಿಲಿದೆ? ಗಣೇಶ ಬೆಲ್ಟ್‌ ಥರಾ ಹಾವನ್ನೇ ಕಟ್ಟಿಕೊಂಡಿದಾನಲ್ಲ- ಹೆದರಿಕೆ ಆಗಲ್ವ ಅಪ್ಪ? ಅಂಥ ಗಣಪತಿಗೆ ಇಲಿಮರಿ ಹ್ಯಾಗೆ ವಾಹನ ಆಗ್ತದಪ್ಪ ? ಗಣಪತಿಗೆ ನಮ್ಮ ಥರ ಅದ್ಯಾಕಪ್ಪಾ ಮುಖವಿಲ್ಲ ಅಂತ ಒಂದೇ ಸಮನೆ ಕೇಳಿದಾಗಲ್ಲೆ- ಅಪ್ಪ ಪುರಾಣಕ್ಕೆ ಜಾರುತ್ತಿದ್ದರು. ಪಾರ್ವತಿ ತನ್ನ ಮೈನ ಬೆವರಿನಿಂದ ಒಂದು ಬೊಂಬೆ ಮಾಡಿದ್ಲಂತೆ, ಆ ಬೊಂಬೇಗೆ ಜೀವ ನೀಡಿದಳಂತೆ... ಅಪ್ಪ ಹೀಗೆಲ್ಲ ಹೇಳ್ತಾ ಇದ್ದಾಗ ನಾವೆಲ್ಲ ಬೆರಗಿಂದ ಕಥೆ ಕೇಳಿ ಕಡೆಗೆ ಗಣೇಶನಿಗೆ ಅಯ್ಯಪ್ಪಾ ಅದಂಥಾ ಸೊಂಡಿಲೂ, ಎಷ್ಟೊಂದ್‌ ದಪ್ಪದ ಹೊಟ್ಟೇ.. ಎಂದು ಕಿಸಿಕಿಸಿ ನಗುತ್ತಿದ್ದರೆ- ಅಮ್ಮ ಓಡಿ ಬರುತ್ತಿದ್ದಳು. ಬಂದವಳೇ ಕೆನ್ನೆ ಕೆನ್ನೆ ಬಡಿದುಕೊಂಡು ತಪ್ಪಾಯ್ತು ದೇವರೇ ಎಂದು ಸಾಷ್ಟಾಂಗ ಬಿದ್ದು - ನಮ್ಮೆಲ್ಲರಿಗೂ ಗಜಮುಖನೆ ಗಣಪತಿಯೆ ನಿನಗೆ ವಂದನೆ... ಹೇಳಿಕೊಡುತ್ತಿದ್ದಳು !

ಭಗವಂತಾ, ಇದೆಲ್ಲ ಬಾಲ್ಯದ ಕಥೆ . ಆನಂತರದಲ್ಲಿ ಕಾಲ ಬದಲಾಗಿದೆ. ನಿನ್ನ ಕುರಿತಾದ ಕಥೆಗಿದ್ದ ಸ್ವರೂಪ ಬದಲಾಗಿದೆ. ಅದರ ಇತಿಹಾಸ ಬದಲಾಗಿದೆ. ಆದ್ರೆ ನೀನು- ಇಲ್ಲ , ನೀನು ಬದಲಾಗಲ್ಲ. ನಿನ್ನ ಮಹಿಮೆ, ನಿನ್ನ ಮಹಾತ್ಮೆ , ನಿನ್ನ ರೂಪ ಉಹುಂ, ಯಾವುದೂ ಬದಲಾಗಿಲ್ಲ. ಅದನ್ನೆಲ್ಲ ನೋಡಿ ಒಮ್ಮೆಲೇ ಸಂತೋಷ, ಸಂಕಟ ಎರಡೂ ಆಗಿಬಿಡುತ್ತೆ.

ಯಾಕೆ ಗೊತ್ತಾ? ದೇವರುಗಳ, ನಿಮ್ಮ ದೇವಲೋಕ (?!) ದ ಕಥೆ ಹೇಗೋ ಏನೋ ಗೊತ್ತಿಲ್ಲ. ಆದರೆ ಈ ಭೂಲೋಕದಲ್ಲಂತೂ ಎಲ್ಲರೂ ನಿನ್ನನ್ನ ಅಧಿನಾಯಕ ಅಂತ ಒಪ್ಪಿದ್ದಾರೆ. ಸರ್ವಶಕ್ತ ಅಂತ ನಂಬಿದ್ದಾರೆ. ದೈವಭಕ್ತರ ಮಕ್ಕಳಂತೂ ತಮ್ಮ ನೋಟ್‌ ಬುಕ್ಕಿನ ಮೊದಲ ಪುಟದಲ್ಲಿ ಶ್ರಿ ಗಣೇಶಾಯ ನಮಃ ಎಂದು ಬರೆದು ತಮ್ಮ ಭಕ್ತಿ ಪ್ರದರ್ಶಿಸಿದ್ದಾರೆ. ಆದ್ರೆ ಪ್ರಭೂ , ನಿನ್ನನ್ನ ಸರ್ವಶಕ್ತ ಎಂದು ನಂಬಿರುವ ಈ ಭೂಲೋಕದ ಜನರೇ ನಿನ್ನನ್ನ ಗೇಲಿಯ ವಸ್ತುವನ್ನಾಗಿ ಕೂಡ ಮಾಡಿಕೊಂಡಿದ್ದಾರೆ. ಕಲಾವಿದ ಅನಿಸಿಕೊಂಡ ಭೂಪತಿಗಳು ಯಾರಿಗೂ ಅರ್ಥವಾಗದಂಥ ಐದಾರು ಗೆರೆ ಎಳೆದು ಇವನೇ ಗಣೇಶ, ಇವ ಏಕದಂತ ಎಂದು ನಂಬಿಸುತ್ತಿದ್ದಾರೆ. ವಿಚಾರವಾದಿ ಅನಿಸಿಕೊಂಡವರು- ಅರರೆ, ಏನ್ರೀ ಇದು ಕತೇ? ಗಣೇಶ ಪಾರ್ವತಿಯ ಮೈ ಬೆವರಿನಿಂದ ಸೃಷ್ಟಿಯಾದ ಅಂತಾರಲ್ಲ- ಹಾಗಂದ್ರೆ ಏನಪ್ಪ ಅರ್ಥ ಎಂದು ಕೇಳಿ ಪೋಲ್‌ ಪೋಲಿಯಾಗಿ ನಗ್ತಾರೆ. ಆಗೆಲ್ಲ ಅದೆಷ್ಟು ಕಸಿವಿಸಿ ಆಗ್ತದೆ ಗೊತ್ತಾ?

ಭಗವಂತಾ, ಇನ್ಮುಂದೆ ಕೇಳ್ತೀನಲ್ಲ -ಅವೆಲ್ಲ ಶುದ್ದ ತರ್ಲೆ ಪ್ರಶ್ನೆಗಳೇ. ಈ ಪ್ರಶ್ನೆಗಳ ಹಿಂದೆ ದೊಡ್ಡ ಕುತೂಹಲ ಮಾತ್ರವೇ ಇದೆ. ಹೌದು ತಾನೆ? ನೀನು ವರ್ಷಕ್ಕೆ ಒಂದಲ್ಸ ಬರ್ತೀಯ. ಆಗೆಲ್ಲ ನಿನ್ನ ಹೆಸರಲ್ಲಿ ಭಕ್ತರು ಅನಿಸಿಕೊಂಡ ಪುಣ್ಯಾತ್ಮರು ಭಕ್ತಿಗೀತೆಗಳ ನೆಪದಲ್ಲಿ ಬರೀ ಚಿತ್ರಗೀತೆ ಹಾಡ್ತಾರಲ್ಲ. ಆಗ ಕಿರಿಕಿರಿಯಾಗಲ್ವ ? ನಿನ್ನ ಮೂರ್ತಿ ಪ್ರತಿಪ್ಠಾಪನೆಯ ವಿಷಯದಲ್ಲಿ ದೊಡ್ಡಸ್ತಿಕೆ ತೋರಿಸಲು ಮುಂದಾಗ್ತಾರಲ್ಲ-ಆಗ ಹಿಂಸೆ ಅನಿಸಲ್ವ? ಗಣೇಶನಿಗೆ ಅಂತ ಹೆಸರಿಗಷ್ಟೇ ನೈವೇದ್ಯ ಮಾಡಿ ಎಲ್ಲವನ್ನೂ ತಾವೇ ತಿಂದು ಹಾಕ್ತಾರಲ್ಲ- ಅಂಥವರನ್ನು ಕಂಡಾಗ ಸಿಟ್ಟು ಬರಲ್ವ? ಕಡುಬು ಕಂಡಾಕ್ಷಣ ಬಾಯಲ್ಲಿ ಜೊಲ್ಲು ಬಂದುಬಿಡಲ್ವಾ?

ನಿನ್ನನ್ನ ಭಿನ್ನವಾಗಿ ಚಿತ್ರಿಸುವ ಭರದಲ್ಲಿ ವೀರಪ್ಪನ್‌ ಜತೇಲಿ; ಕ್ರಿಕೆಟ್‌ ಆಟಗಾರರ ಮಧ್ಯದಲ್ಲಿ, ರಾಜಕಾರಣಿಗಳ ಪಕ್ಕದಲ್ಲಿ ನಿಲ್ಲಿಸಿ ಇದೇ ಜನ ಖುಷಿ ಪಡ್ತಾರಲ್ಲ- ಆಗೆಲ್ಲ ಸಂಕಟ ಆಗಲ್ವ ? ಭಯ-ಭಕ್ತಿಯಿಂದ ಪೂಜೆ ಮಾಡಿದ ಜನರೇ ಕೆಲವೇ ಕ್ಷಣಗಳ ನಂತರ- ಅಬಾ ್ಬ, ಗಣಪತಿ ಎಂಥ ವಿಚಿತ್ರ ದೇವರು ಅಲ್ವಾ ಎಂಬ ಒಂದು ಪ್ರಶ್ನೆಯನ್ನು ; ಗಣಪತಿಗೂ ಮದುವೆ ಆಗಿದ್ಯಂತೆ ಮಾರಾಯ್ರೇ, ಆದೂ ಒಂದಲ್ಲ-ಎರಡಂತೆ, ಹೌದಾ? ಎಂಬ ಇನ್ನೊಂದು ಪ್ರಶ್ನೆಯನ್ನೂ ಇಟ್ಟುಗೊಂಡು ಚರ್ಚೆಗೆ ನಿಲ್ತಾರಲ್ಲ- ಆಗೆಲ್ಲ ಇಶ್ಯೀ ಅನ್ನಿಸಲ್ವ? ಆಮೇಲೆ ದೇವರೇ, ನಿನ್ನ ವಿಗ್ರಹವನ್ನು ಭಯ ಭಕ್ತಿಯಿಂದ ಪ್ರತಿಷ್ಠಾಪಿಸಿದ ಇದೇ ಜನ ಮೂರು-ನಾಲ್ಕೇ ದಿನಗಳಲ್ಲಿ ಯಾವುದೋ ಕೆರೆಗೆ ; ಹೊಳೆಗೆ ; ಇಲ್ಲದಿದ್ದರೆ ಮನೆಯ ನೀರಿನ ಟ್ಯಾಂಕಿಗೆ ; ಅದೂ ಸಿಗದಿದ್ದರೆ ದೊಡ್ಡ ಬಕೆಟ್‌ಗೆ ಹಾಕಿ ಪಟಾಕಿ ಹೊಡೀತಾ ಮುಳುಗಿಸಿಬಿಡ್ತಾರಲ್ಲ -ಆಗೆಲ್ಲ ದುಃಖ ಆಗಲ್ವ?

ಭಗವಂತಾ , ಪುರಾಣವೇ ಹೇಳುತ್ತೆ. ನೀನೂ ಬರಹಗಾರ ಅಂತೆ ! ವೇದವ್ಯಾಸರು ಮಹಾಭಾರತದ ಕಥೇನ ರೈಲು ವೇಗದಲ್ಲಿ ಹೇಳಿದ್ರೆ, ನೀನು ವಿಮಾನ ವೇಗದಲ್ಲಿ ಬರ್ದು ಹೂಂ, ಆಮೇಲೆ .. ಎಂದು ಕಣ್ಮು ಮಿಟುಕಿಸಿದ್ಯಂತೆ. ನಾಡಿದ್ದು ಮನೆ ಮನೆಗೂ ಹಬ್ಬಕ್ಕೆ ಬರ್ತೀಯಲ್ಲ -ಆಗ ಇನ್ನಷ್ಟು ಮಾತಾಡೋಣಂತೆ . ನಾನು ಹೇಳ್ತಾ ಇರ್ತೀನಿ. ನೀನು ಕೇಳ್ತಾ ಕೂತ್ಬಿಡು. ಸರೀನಾ? ಈ ಪತ್ರಾನ ಮುಖ ಗಂಟಿಕ್ಕದೆ ಓದಿದ್ದಕ್ಕೆ - ಎರಡು ಕಡುಬು ಜಾಸ್ತಿಕೊಡ್ತೀನಿ. ನಾಡಿದ್ದು ಬರ್ತಿದ್ದೀಯಲ್ಲ-ನಿಂಗೆ ಸ್ವಾಗತ. ಸುಸ್ವಾಗತ..

ಪ್ರೀತಿ ಮತ್ತು ಪ್ರೀತಿಯಿಂದ..

- ಎ.ಆರ್‌.ಮಣಿಕಾಂತ್‌

armanikanth@yahoo.co.in

ಕನ್ನಡ ಮ್ಯಾಟ್ರಿಮೋನಿಯಲ್ಲಿ - ಉಚಿತ ನೋಂದಣಿ !

ತಾಜಾ ಸುದ್ದಿ ತಕ್ಷಣ ಪಡೆಯಿರಿ
Enable
x
Notification Settings X
Time Settings
Done
Clear Notification X
Do you want to clear all the notifications from your inbox?
Settings X
We use cookies to ensure that we give you the best experience on our website. This includes cookies from third party social media websites and ad networks. Such third party cookies may track your use on Oneindia sites for better rendering. Our partners use cookies to ensure we show you advertising that is relevant to you. If you continue without changing your settings, we'll assume that you are happy to receive all cookies on Oneindia website. However, you can change your cookie settings at any time. Learn more