ದಕ್ಷಿಣ ಕನ್ನಡದಲ್ಲಿ ಮಳೆ ನಾಪತ್ತೆ , ರೈತರು ಕಂಗಾಲು

ಮಂಗಳೂರು : ದಕ್ಷಿಣ ಕನ್ನಡದಲ್ಲಿ ಮಳೆ ನಾಪತ್ತೆಯಾಗಿದೆ. ಎಡೆಬಿಡದೆ ಮಳೆ ಸುರಿಯಬೇಕಿದ್ದ ಜುಲೈ ತಿಂಗಳಲ್ಲಿ ಮಳೆಯೇ ಇಲ್ಲ. ತುಳುವರ ಆಟಿ ತಿಂಗಳು (ಆಷಾಢದಂತೆ) ಎಂದರೆ ಭಾರಿ ಮಳೆಯ ಕಪ್ಪು ದಿನಗಳ ತಿಂಗಳು. ಆದರೆ, ಈ ಬಾರಿ ಪರಿಸ್ಥಿತಿ ವ್ಯತಿರಿಕ್ತ. ಬೇಸಿಗೆ ಕಾಲದಂತಹ ಬಿರು ಬಿಸಿಲು.

ಆರ್ದ್ರ, ಪುನರ್ವಸು , ಪುಷ್ಯಗಳು ಮಳೆ ಸುರಿಸು-ವ ನಕ್ಷತ್ರಗಳೆಂಬುದು ದ.ಕ. ಜಿಲ್ಲೆಯ ಕೃಷಿಕರ ಲೆಕ್ಕಾಚಾರ. ಈ ಬಾರಿ ಲೆಕ್ಕಾಚಾರ ತಪ್ಪಿದೆ. ಮಳೆ ಇಲ್ಲದೆ ಕೃಷಿಗೆ ನೀರಿನ ಅಭಾವವುಂಟಾಗಿದೆ.

ಮಳೆರಾಯನ ಈ ಮುನಿಸಿನಿಂದ ದಕ್ಷಿಣ ಕನ್ನಡ , ಉಡುಪಿ ಜಿಲ್ಲೆಗಳ ರೈತರು ಕಂಗಾಲಾಗಿದ್ದಾರೆ. ಬೆಟ್ಟುಗದ್ದೆಗಳು ಒಣಗುತ್ತಿವೆ. ಹಸಿರು ಪೈರು ಹಳದಿಯಾಗುತ್ತಿದೆ. ಪಂಪ್‌ಸೆಟ್‌ ಇದ್ದವರು ಅದರ ಮೊರೆ ಹೋಗಿದ್ದಾರೆ. ಸದ್ಯಕ್ಕೆ ಖಾರಿಫ್‌ ಬೆಳೆಯನ್ನು ಉಳಿಸಿಕೊಳ್ಳುವ ಚಿಂತೆಯ ಜೊತೆಗೆ ಎರಡನೇ ಮತ್ತು 3 ನೇ ಬೆಳೆಯ ಕತೆ ಏನು ಎಂಬ ಪ್ರಶ್ನೆ ರೈತನನ್ನು ಕಾಡುತ್ತಿದೆ.

ಈ ಬಾರಿ ಮುಂಗಾರು ಸಕಾಲಕ್ಕೆ ಆರಂಭವಾಗಿ ಭರ್ಜರಿಯಾಗಿ ಸುರಿದಿತ್ತು. ರೈತರು ಉತ್ಸಾಹದಿಂದ ಕೃಷಿ ಚಟುವಟಿಕೆಗಳಲ್ಲಿ ತೊಡಗಿದ್ದರು. ದಕ್ಷಿಣ ಕನ್ನಡ ಎತ್ತರ - ತಗ್ಗು ಪ್ರದೇಶವಾಗಿದ್ದು , ಎತ್ತರದಲ್ಲಿರುವ ಬೆಟ್ಟುಗದ್ದೆಗಳಲ್ಲಿ ಬೆಳೆಗೆ ಮಳೆಯೇ ಆಧಾರ. ಒಟ್ಟು ವಿಸ್ತೀರ್ಣದಲ್ಲಿ ಶೇ. 30 ರಷ್ಟು ಭತ್ತದ ಕೃಷಿ ಆರಂಭವಾಗಿದೆ. ಈಗ ಮತ್ತೆ ಮಳೆಗಾಗಿ ಕಾಯುತ್ತಿದ್ದಾರೆ. ಉಡುಪಿ ಜಿಲ್ಲೆಯ ಕೆಲ ಭಾಗ-ದಲ್ಲಿ ಭತ್ತಕ್ಕೆ ಕಳೆ ರೋಗ , ಸೈನಿಕ ಹುಳುವಿನ ಬಾ-ಧೆಯಂತಹ ತೊಂದರೆಗಳೂ ಕಂಡು ಬಂದು ಕೃಷಿಕನ್ನು ಹೆದರಿಸಿವೆ.

ಪ್ರತಿ ವರ್ಷವೂ ಜುಲೈ ತಿಂಗಳಲ್ಲಿ ಕನಿಷ್ಟ 2 ಅಥವಾ 3 ದಿನಗಳಾದರೂ ಶಾಲಾ ಕಾಲೇಜುಗಳಿಗೆ -ಮ-ಳೆ-ಯಿಂ-ದಾ-ಗಿ ರಜೆ ಘೋಷಿಸಲಾಗುತ್ತಿತ್ತು. ಆದರೆ ಈ ಬಾರಿ ರಜೆ ಘೋಷಿಸಬೇಕಾದ ಪರಿಸ್ಥಿತಿಯನ್ನು ಮಳೆ ನಿರ್ಮಿಸಲೇ ಇಲ್ಲ.

1998ರಲ್ಲಿ ಸುಳ್ಯ, ಬೆಳ್ತಂಗಡಿ, ಪುತ್ತೂರು , ಭಂಟ್ವಾಳ, ಮಂಗಳೂರು ತಾಲೂಕುಗಳಲ್ಲಿ ಜುಲೈ ತಿಂಗಳಲ್ಲಿ 6055.1 ಮಿಮೀ ಮಳೆಯಾಗಿತ್ತು. 1999ರಲ್ಲಿ ಮಳೆಯ ಪ್ರಮಾಣ 6656.5 ಮಿಮೀ ಮತ್ತು 2000ನೇ ಇಸವಿಯಲ್ಲಿ ಸದ್ಯಕ್ಕೆ 3, 519 ಮಿಮೀ ಮಳೆಯಾಗಿದೆ. ಈವರೆಗೆ ಸಾಕಷ್ಟು ಮಳೆಯಾಗಬೇಕಾಗಿದ್ದು, ಒಟ್ಟು ಪ್ರಮಾಣದಲ್ಲಿ ಈ ವರ್ಷ ಅರ್ಧಕ್ಕರ್ಧ ಕುಸಿದಿದೆ ಎಂದೇ ಹೇಳಬಹುದು.

ಹಳ್ಳಿಗಳಲ್ಲಿ ಅಕ್ಟೋಬರ್‌ ಅಂತ್ಯದವರೆಗೆ ಇರುತ್ತಿದ್ದ ಒರತೆ ನೀರು ಈ ಬಾರಿ ಆಗಸ್ಟ್‌ ಆರಂಭಕ್ಕೇ ಬತ್ತಿ ಹೋಗಿದೆ. ಬಯಲು ಪ್ರದೇಶದ ಬೆಳೆಗೂ ನೀರು ಹಾಯಿಸಬೇಕಾಗಿದೆ. ಈಗ ನಾಪತ್ತೆಯಾಗಿರುವ ಮಳೆ ಮತ್ತೆ ಕಟಾವಿನ ಸಮಯಕ್ಕೆ ಬಂದರೆ ಕೈಗೆ ಬಂದ ಕಾಳು ತುತ್ತು ಬಾಯಿಗೆ ಬರುವುದಿಲ್ಲ.

English summary

Rain disappears in South canara