ಅಮೆರಿಕ ಮಾಜಿ ಅಧ್ಯಕ್ಷ ಕ್ಲಿಂಟನ್ ಮನೆಯಲ್ಲಿ ಸ್ಫೋಟಕ ಪತ್ತೆ
ನ್ಯೂಯಾರ್ಕ್, ಅಕ್ಟೋಬರ್ 24: ಅಮೆರಿಕದ ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್ ಮತ್ತು ಮಾಜಿ ವಿದೇಶಾಂಗ ಕಾರ್ಯದರ್ಶಿ ಹಿಲರಿ ಕ್ಲಿಂಟನ್ ದಂಪತಿಯ ಮನೆಯಲ್ಲಿ ಸ್ಫೋಟಕ ಪತ್ತೆಯಾಗಿದೆ.
ನ್ಯೂಯಾರ್ಕ್ನ ಚಪ್ಪಾಕುವಾದಲ್ಲಿರುವ ಕ್ಲಿಂಟನ್ ಅವರ ನಿವಾಸಕ್ಕೆ ಈ ಸ್ಫೋಟಕ ಸಾಧನವನ್ನು ರವಾನಿಸಲಾಗಿದ್ದು, ಹಿಲರಿ ಕ್ಲಿಂಟನ್ ಅವರ ಕಚೇರಿಯಲ್ಲಿ ಇ ಮೇಲ್ ಪರಿಶೀಲಿಸುವ ಕೆಲಸ ಮಾಡುವ ತಂತ್ರಜ್ಞರೊಬ್ಬರ ಕಣ್ಣಿಗೆ ಅದು ಬಿದ್ದಿದೆ.
ಸಮೀಪದ ಬೆಡ್ಫೋರ್ಡ್ ಪಟ್ಟಣದಲ್ಲಿರುವ ಕೋಟ್ಯಧಿಪತಿ ಜಾರ್ಜ್ ಸೊರೊಸ್ ಅವರ ಮನೆಗೆ ಎರಡು ದಿನಗಳ ಹಿಂದೆ ಇದೇ ರೀತಿಯ ಸ್ಫೋಟಕವನ್ನು ಕಳುಹಿಸಲಾಗಿತ್ತು. ಮಾಜಿ ಅಧ್ಯಕ್ಷ ಬರಾಕ್ ಒಬಾಮಾ ಅವರ ನಿವಾಸಕ್ಕೂ ಸಹ ರವಾನಿಸಲಾಗಿತ್ತು.
ಸೊರೊಸ್ ಅವರ ಮನೆ ಆವರಣದಲ್ಲಿ ಅನುಮಾನಾಸ್ಪದವಾಗಿ ಸಿಕ್ಕಿದ್ದ ಪ್ಯಾಕೆಟ್ನಲ್ಲಿ ಸ್ಫೋಟಕ ಪತ್ತೆಯಾಗಿತ್ತು.
ಒಬಾಮಾ ಅವರ ವಾಷಿಂಗ್ಟನ್ ಡಿ.ಸಿ.ಯಲ್ಲಿರುವ ನಿವಾಸಕ್ಕೆ ಬುಧವಾರ ರವಾನೆಯಾಗಿದ್ದ ಪಾರ್ಸೆಲ್ ಅನ್ನು ಭದ್ರತಾ ಸಂಸ್ಥೆ ವಶಕ್ಕೆ ಪಡೆದುಕೊಂಡಿತ್ತು.
ಎಡಪಂಥೀಯ ಧೋರಣೆ ಉಳ್ಳ ನಾಯಕರ ಮನೆಗೆ ಸ್ಫೋಟಕಗಳು ರವಾನೆಯಾಗಿರುವುದು ಹಲವು ಅನುಮಾನಗಳಿಗೆ ಕಾರಣವಾಗಿದೆ.
Click it and Unblock the Notifications
Sign in with Google