ಡಿಕೆ ಶಿವಕುಮಾರ್ ಭದ್ರಕೋಟೆ ಕನಕಪುರ ಕ್ಷೇತ್ರದ ಅಂತರಂಗ

By ರಾಮನಗರ ಪ್ರತಿನಿಧಿ

Updated: Wednesday, April 18, 2018, 17:21 [IST]

ಇಲ್ಲಿನ ಬಹುತೇಕ ಜನರಿಗೆ ಮರೆತು ಹೋಗಿರಲಿಕ್ಕೆ ಸಾಕು, ಅಂದಿನ ಹೆಸರು ಕಾಂಕನಳ್ಳಿ. ಅದೇ ಸ್ವಾಮಿ, ಇಂದಿನ ಕನಕಪುರ. ಈಗ ಕನಕಪುರ ಎಂದರೆ ನೆನಪಾಗುವುದು ಗ್ರಾನೈಟ್ ಕಲ್ಲು. ಇಲ್ಲಿ ಸಿಗುವ ಕರಿಕಲ್ಲಿಗೆ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಬಹಳ ಬೇಡಿಕೆ. ಈ ಭಾಗದ ಶಿಕ್ಷಣ ಕ್ರಾಂತಿಯ ಹರಿಕಾರರಾದ ಕನಕಪುರದ ಗಾಂಧಿಯೆಂದೇ ಪ್ರಸಿದ್ಧವಾಗಿದ್ದ ಕರಿಯಪ್ಪನವರು ಜನಿಸಿದ ಭೂಮಿ.

ಆದರೆ, ಈಗ ರಾಜ್ಯ ರಾಜಕಾರಣದಲ್ಲಿ ಪವರ್ ಫುಲ್ ಸಚಿವ ಅಂತಲೇ ಗುರುತಿಸಿಕೊಂಡಿರುವ ಡಿ.ಕೆ.ಶಿವಕುಮಾರ್ ಅವರು ಸತತ‌ ಪ್ರತಿನಿಧಿಸುತ್ತಿರುವ ವಿಧಾನಸಭೆ ಕ್ಷೇತ್ರ ಇದು. ಒಂದು ಕಾಲದಲ್ಲಿ ಪ್ರಭಾವಿ ನಾಯಕರೆಂದು ಹೆಸರು ಮಾಡಿದ್ದ ಪಿ.ಜಿ.ಆರ್.ಸಿಂಧ್ಯಾ ಅವರನ್ನು ಮಣಿಸಿ, ರಾಜಕೀಯ ಜೀವನ ಆರಂಭಿಸಿದ ಡಿ.ಕೆ.ಶಿವಕುಮಾರ್ ಮತ್ತೆ ಹಿಂತಿರುಗಿ ನೋಡಿಲ್ಲ.

2008ರಲ್ಲಿ ಸಾತನೂರು ವಿಧಾನ ಸಭಾ ಕ್ಷೇತ್ರದಿಂದ ನಾಲ್ಕು ಬಾರಿ ಗೆದ್ದಿದ್ದ ಶಿವಕುಮಾರ್ ಕ್ಷೇತ್ರ ಪುರ್ನವಿಂಗಡಣೆ ಆದಾಗ ಕನಕಪುರ ಸೇರಿತ್ತು. ಕನಕಪುರದಲ್ಲಿ ಸಿಂಧ್ಯ ಕಟ್ಟಿದ ಕೋಟೆಯನ್ನು ಛಿದ್ರಪಡಿಸಿ ಇದೀಗ ಶಿವಕುಮಾರ್ ಪಾರುಪತ್ಯೆ ಮಾಡುತ್ತಿದ್ದಾರೆ. ಕಳೆದ ಬಾರಿ ವಿಧಾನಸಭೆ ಚುನಾವಣೆಯಲ್ಲಿ ನಲವತ್ತು ಸಾವಿರ ಮತಗಳಿಂದ ಜಯ ಗಳಿಸಿದ ಶಿವಕುಮಾರ್ ಎದುರಿಗೆ ಪ್ರಬಲ ಎದುರಾಳಿಗಳ ಕೊರತೆ ಇದೆ.

ಕ್ಷೇತ್ರ ದಲ್ಲಿ ಬಿಜೆಪಿಗೆ ನೆಲೆಯಿಲ್ಲ. ಆದರೆ ಜೆಡಿಎಸ್ ನಿಂದ ಡಿ.ಕೆ.ಶಿವಕುಮಾರ್ ನಾಗಾಲೋಟಕ್ಕೆ ಅಡ್ಡ ಹಾಕುವುದನ್ನು ತಳ್ಳಿ ಹಾಕಲು ಸಾಧ್ಯವಿಲ್ಲ.