ಎನ್ ಡಿಟಿವಿ ಬೆಳ್ಳಿ ಹಬ್ಬ: ದಿಗ್ಗಜರಿಗೆ ಗೌರವಾರ್ಪಣೆ

By Mahesh

Updated: Sunday, December 15, 2013, 15:17 [IST]

ನವದೆಹಲಿ, ಡಿ.15: ಪ್ರಣವ್ ರಾಯ್ ನೇತೃತ್ವದ ನ್ಯೂ ಡೆಲ್ಲಿ ಟೆಲಿವಿಷನ್(ಎನ್ ಡಿಟಿವಿ) ಸುದ್ದಿ ಸಂಸ್ಥೆಗೆ ಈಗ ಬೆಳ್ಳಿ ಹಬ್ಬದ ಸಂಭ್ರಮ. ಈ ಶುಭ ಸಂದರ್ಭದಲ್ಲಿ ಜನತೆಯ ಅಭಿಮತವನ್ನು ಪರಿಗಣಿಸಿ ಭಾರತದ 25 ದಿಗ್ಗಜರನ್ನು ಆತ್ಮೀಯವಾಗಿ ಸನ್ಮಾನಿಸುವ ಕಾರ್ಯಕ್ರಮವನ್ನು ಹಮ್ಮಿಕೊಂಡಿತ್ತು.

1988ರಲ್ಲಿ ಆರಂಭವಾದ ಎನ್ ಡಿಟಿವಿಗೆ ಈಗ ಭರಪೂರ 25 ವರ್ಷ. ಪ್ರಣವ್ ರಾಯ್ ಅವರ ನೇತೃತ್ವದಲ್ಲಿ ಆರಂಭವಾದ ನ್ಯೂ ಡೆಲ್ಲಿ ಟೆಲಿವಿಷನ್ ಕಂಪನಿ ಮೊದಲಿಗೆ ಆರಂಭಿಸಿದ್ದು ದ್ವಿಭಾಷೆಯ ನ್ಯೂಸ್ ಚಾನೆಲ್. ಸದ್ಯ ಎನ್ ಡಿಟಿವಿ 24/7(ಇಂಗ್ಲಿಷ್ ನ್ಯೂಸ್ ಚಾನೆಲ್), ಎನ್ ಡಿಟಿವಿ ಇಂಡಿಯಾ(ಹಿಂದಿ ಸುದ್ದಿ ವಾಹಿನಿ) ಮತ್ತು ಎನ್ ಡಿಟಿವಿ ಪ್ರಾಫಿಟ್(ಬಿಸಿನೆಸ್ ನ್ಯೂಸ್ ಚಾನೆಲ್) ಅನ್ನು ಹೊಂದಿದೆ.

1994, ಆ. 31ರಂದು ಇದು ನ್ಯೂ ದೆಲ್ಲಿ ಟೆಲಿವಿಷನ್ ಲಿ. ಎಂದು ಹೆಸರು ಬದಲಾಯಿಸಿಕೊಂಡಿತು.2003ರಲ್ಲಿ 24 ಗಂಟೆ ನ್ಯೂಸ್ ಚಾನೆಲ್ ಅನ್ನು ಆರಂಭಿಸಿತು. ಎನ್ ಡಿಟಿವಿ 24‍X7 ಮತ್ತು ಎನ್‌ಡಿಟಿವಿ ಹಿಂದಿಯನ್ನು ಆರಂಭಿಸಿತು. 2005ರಲ್ಲಿ ಎನ್‌ಡಿಟಿವಿ ಪ್ರಾಫಿಟ್ ಅನ್ನೂ ಆರಂಭಿಸಿತು. ಈ ಚಾನೆಲ್ ಬಿಸಿನೆಸ್ ನ್ಯೂಸ್ ವಿಭಾಗದಲ್ಲಿ ಭಾರಿ ಮನ್ನಣೆಯನ್ನೂ ಗಳಿಸಿಕೊಂಡಿದೆ.

ಎನ್ ಡಿಟಿವಿ 25 ವರ್ಷವಾದ ಹಿನ್ನೆಲೆಯಲ್ಲಿ ದೆಹಲಿಯ ರಾಷ್ಟ್ರಪತಿ ಭವನದಲ್ಲಿ ಶನಿವಾರ ರಾತ್ರಿ ವರ್ಣರಂಜಿತ ಕಾರ್ಯಕ್ರಮ ನಡೆಯಿತು. ಈ ಸಂದರ್ಭದಲ್ಲಿ ಎನ್ ಡಿಟಿವಿ ಲಿವಿಂಗ್ ಲೆಜೆಂಡ್ಸ್ ಗಳಿಗೆ ಸನ್ಮಾನಿಸಲಾಯಿತು. ಈ ಕಾರ್ಯಕ್ರಮದಲ್ಲಿ ರಾಷ್ಟ್ರಪತಿ ಪ್ರಣಬ್ ಮುಖರ್ಜಿ,ಎಲ್ ಕೆ ಆಡ್ವಾಣಿ, ಭಾರತರತ್ನ ಸಿಎನ್ಅರ್ ರಾವ್, ಅಮಿತಾಭ್ ಬಚ್ಚನ್, ಸಚಿನ್ ತೆಂಡೂಲ್ಕರ್, ಶಾರುಖ್ ಖಾನ್, ರಜನಿಕಾಂತ್, ರತನ್ ಟಾಟಾ, ಇನ್ಫೋಸಿಸ್ ನಾರಾಯಣಮೂರ್ತಿ, ಮುಖೇಶ್ ಅಂಬಾನಿ, ವಿಕ್ರಮ್ ಸೇಠ್ ಸೇರಿ 25 ಗಣ್ಯರನ್ನು ಸನ್ಮಾನಿಸಲಾಯಿತು.