ಬ್ಯಾಂಕಿಗೆ 25 ಅಡಿ ಸುರಂಗ ಕೊರೆದು 6 ಕೋಟಿ ದೋಚಿದ ಖದೀಮರು
ಮುಂಬೈ, ನವೆಂಬರ್ 14: ಸಿನಿಮಾ ಮಾದರಿಯ ದರೋಡೆ ಕೃತ್ಯವೊಂದರಲ್ಲಿ ಬ್ಯಾಂಕಿನೊಳಕ್ಕೆ 25 ಅಡಿ ಉದ್ದದ ಸುರಂಗ ಕೊರೆದು 6 ಕೋಟಿ ರೂಪಾಯಿಗೂ ಹೆಚ್ಚು ಮೌಲ್ಯದ ವಸ್ತುಗಳನ್ನು ಕಳ್ಳತನ ಮಾಡಲಾಗಿದೆ.
ನವಿ ಮುಂಬೈನ ಜುನಿನಗರ್ ನಲ್ಲಿರುವ ಬ್ಯಾಂಕ್ ಆಫ್ ಬರೋಡ ಶಾಖೆಯಲ್ಲಿ ಈ ಕಳ್ಳತನ ನಡೆದಿದೆ.
ಕಳ್ಳರು ಬ್ಯಾಂಕಿಗೆ ಹೊಂದಿಕೊಂಡ ಅಂಗಡಿಯನ್ನು ಕಳೆದ ಮೇನಿಂದ ಬಾಡಿಗೆಗೆ ಪಡೆದಿದ್ದರು. ಈ ಕಳ್ಳರು ಅಂಗಡಿಯಿಂದ ಲಾಕರ್ ಕೋಣೆಗೆ ಸುರಂಗ ಕೊರೆದು ಕಳ್ಳತನ ನಡೆಸಿದ್ದಾರೆ. 225 ಲಾಕರ್ ಗಳಲ್ಲಿ 30 ಲಾಕರ್ ಗಳಲ್ಲಿದ್ದ ಮೌಲ್ಯಯುತ ವಸ್ತುಗಳನ್ನು ಕಳ್ಳರು ದೋಚಿದ್ದಾರೆ. ಇವುಗಳ ಮೌಲ್ಯ 6 ಕೋಟಿ ರೂಪಾಯಿ ಆಗಬಹುದು ಎಂದು ಅಂದಾಜಿಸಲಾಗಿದೆ.
ಶನಿವಾರ ಮತ್ತು ಭಾನುವಾರದ ಮಧ್ಯದಲ್ಲಿ ಈ ದರೋಡೆ ನಡೆದಿದೆ. ಸೋಮವಾರ ಬೆಳಿಗ್ಗೆ ಬ್ಯಾಂಕ್ ಸಿಬ್ಬಂದಿಗಳು ಬಂದು ನೋಡುವಾಗ ದರೋಡೆ ಪ್ರಕರಣ ಬೆಳಕಿಗೆ ಬಂದಿದೆ.
"ನಾವು ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲನೆ ನಡೆಸುತ್ತಿದ್ದೇವೆ. ಇಲ್ಲಿಯವರೆಗೆ ದರೋಡೆ ಮಾಡಿದ ವಸ್ತುಗಳ ಸರಿಯಾದ ಮೊತ್ತ ಗಣನೆಗೆ ಸಿಕ್ಕಿಲ್ಲ," ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಈ ಕುರಿತು ಮುಂಬೈನ ಸನ್ಪದ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು ತನಿಖೆ ಪ್ರಗತಿಯ್ಲಲಿದೆ.