900 ರೂಪಾಯಿ ದಾಟಿದ ರೇಷ್ಮೆಗೂಡು ದರ; ಶಿಡ್ಲಘಟ್ಟ ಮಾರುಕಟ್ಟೆಯಲ್ಲಿ ದಾಖಲೆ
ಶಿಡ್ಲಘಟ್ಟ: ಹವಾಮಾನ ವೈಪರೀತ್ಯದಿಂದ ರೇಷ್ಮೆಗೂಡಿನ ಉತ್ಪಾದನೆ ಕುಸಿದಿದ್ದರೂ, ಮಾರುಕಟ್ಟೆಯಲ್ಲಿ ದರ ಏರಿಕೆಯಾಗಿದ್ದು ರೈತರಿಗೆ ಭಾರಿ ನಿರಾಳತೆ ತಂದಿದೆ. ನಗರ ರೇಷ್ಮೆಗೂಡು ಮಾರುಕಟ್ಟೆಯಲ್ಲಿ ಬೈವೋಲ್ಟಿನ್ (ದ್ವಿತಳಿ/ಬಿಳಿ) ರೇಷ್ಮೆಗೂಡು ಕೆ.ಜಿಗೆ ₹958ಕ್ಕೆ ಮಾರಾಟವಾಗಿದ್ದು, ಈ ವರ್ಷದ ಗರಿಷ್ಠ ದರವೆಂದು ದಾಖಲಾಗಿದೆ. ಬುಧವಾರ ಇದೇ ತಳಿ ₹940ಕ್ಕೆ ಮಾರಾಟವಾಗಿದ್ದರೆ, ಗುರುವಾರ ಮತ್ತಷ್ಟು ಏರಿಕೆ ಕಂಡಿದೆ.
ಮಿಶ್ರತಳಿ ಗೂಡು ಕೂಡ ಉತ್ತಮ ದರ ಪಡೆದುಕೊಂಡಿದ್ದು, ಗರಿಷ್ಠ ₹832ಕ್ಕೆ ವ್ಯವಹಾರ ನಡೆದಿದೆ. ಇತ್ತೀಚಿನ ತಿಂಗಳಲ್ಲಿ ರೇಷ್ಮೆಗೂಡಿಗೆ 'ಬಂಗಾರದ ಬೆಲೆ' ಸಿಗುತ್ತಿರುವುದರಿಂದ ಬೆಳೆಗಾರರಲ್ಲಿ ಉತ್ಸಾಹ ಮೂಡಿದೆ. ಸಾಮಾನ್ಯ ಗೂಡುಗಳು ಸಹ ₹700ರಿಂದ ₹760ರವರೆಗೆ ಮಾರಾಟವಾಗುತ್ತಿವೆ.
ಉತ್ಪಾದನೆ ಏಕೆ ಕಡಿಮೆಯಾಯಿತು?
ರಾಜ್ಯದಲ್ಲಿ ಚಳಿಯ ಪ್ರಮಾಣ ಹೆಚ್ಚಿರುವುದು ಹಾಗೂ ವಾತಾವರಣದ ಏರುಪೇರಿಯಿಂದ ಹಿಪ್ಪುನೇರಳೆ (ಮಲ್ಬರಿ) ಬೆಳೆ ನಿರೀಕ್ಷಿತ ಮಟ್ಟದಲ್ಲಿ ಬೆಳೆಯಲಿಲ್ಲ. ಸಾಮಾನ್ಯವಾಗಿ ಒಂದು ಎಕರೆ ಸೊಪ್ಪಿನಿಂದ 200 ಕೆ.ಜಿವರೆಗೆ ಗೂಡು ಉತ್ಪಾದನೆ ಸಾಧ್ಯ. ಆದರೆ ಈ ಬಾರಿ ಉತ್ಪಾದನೆ 60ರಿಂದ 100 ಕೆ.ಜಿಗೆ ಸೀಮಿತವಾಗಿದೆ. ಹತ್ತು ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಇಷ್ಟು ಪ್ರಮಾಣದ ಚಳಿ ದಾಖಲಾಗಿದ್ದು, ಅದರ ಪರಿಣಾಮ ರೇಷ್ಮೆ ಕೃಷಿಯ ಮೇಲೂ ಬಿದ್ದಿದೆ.
ಪೂರೈಕೆ ಕುಸಿತ-ದರ ಏರಿಕೆ
ಚಿಕ್ಕಬಳ್ಳಾಪುರ ಹಾಗೂ ಕೋಲಾರ ಜಿಲ್ಲೆಯ ಮಾರುಕಟ್ಟೆಗಳಿಗೆ ಸ್ಥಳೀಯ ರೈತರ ಜೊತೆಗೆ ಆಂಧ್ರಪ್ರದೇಶ ಮತ್ತು ತಮಿಳುನಾಡಿನಿಂದಲೂ ಗೂಡು ಪೂರೈಕೆಯಾಗುತ್ತದೆ. ಈ ಹಿಂದೆ ದಿನಕ್ಕೆ 10ರಿಂದ 15 ಟನ್ ಗೂಡು ಮಾರುಕಟ್ಟೆಗೆ ಬರುತ್ತಿದ್ದರೆ, ಈಗ ಅದು 4ರಿಂದ 5 ಟನ್ಗೆ ಇಳಿದಿದೆ. ಪೂರೈಕೆ ಕಡಿಮೆಯಾಗಿರುವುದೇ ದರ ಏರಿಕೆಗೆ ಪ್ರಮುಖ ಕಾರಣವೆಂದು ವ್ಯಾಪಾರಿಗಳು ಹೇಳುತ್ತಿದ್ದಾರೆ.
ಕೋಲಾರ ಜಿಲ್ಲೆಯ ಅನೇಕ ರೈತರು ಬೆಳೆಗಾರಿಕೆಯ ಜೊತೆಗೆ ಹೈನುಗಾರಿಕೆ ಹಾಗೂ ರೇಷ್ಮೆ ಕೃಷಿಯನ್ನು ದ್ವಿತೀಯ ಆದಾಯವಾಗಿ ಮಾಡಿಕೊಂಡಿದ್ದಾರೆ. ಕಳೆದ ಆರು ತಿಂಗಳಿಂದ ಮಾರುಕಟ್ಟೆಯಲ್ಲಿ ಉತ್ತಮ ಬೆಲೆ ಸಿಗುತ್ತಿರುವುದು ರೈತರಿಗೆ ಆರ್ಥಿಕವಾಗಿ ಕೈ ಹಿಡಿದಂತಾಗಿದೆ. ಉತ್ಪಾದನೆ ಕಡಿಮೆಯಾದರೂ, ದರ ಏರಿಕೆಯ ಪರಿಣಾಮ ನಷ್ಟ ತಪ್ಪಿದ್ದು, ಲಾಭದಾಯಕ ಸ್ಥಿತಿ ನಿರ್ಮಾಣವಾಗಿದೆ.
ಹವಾಮಾನ ಪರಿಸ್ಥಿತಿ ಸುಧಾರಿಸಿದರೆ ಹಿಪ್ಪುನೇರಳೆ ಬೆಳವಣಿಗೆ ಹೆಚ್ಚಾಗಿ ಉತ್ಪಾದನೆ ಸುಧಾರಿಸಬಹುದು. ಆದರೆ ಪೂರೈಕೆ ಕಡಿಮೆ ಇರುವವರೆಗೆ ಮಾರುಕಟ್ಟೆಯಲ್ಲಿ ದರ ಏರಿಕೆ ಮುಂದುವರಿಯುವ ಸಾಧ್ಯತೆ ಇದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಉತ್ಪಾದನಾ ಸವಾಲುಗಳ ನಡುವೆಯೇ ರೇಷ್ಮೆಗೂಡಿನ ದರ ಜಿಗಿತ ಕಂಡುಬಂದಿದ್ದು, ಬೆಳೆಗಾರರ ಬದುಕಿಗೆ ಹೊಸ ಚೈತನ್ಯ ತುಂಬಿದೆ.
Click it and Unblock the Notifications
Sign in with Google