ಚುನಾವಣೆ ಟಿ20 ಕ್ರಿಕೆಟ್ ಅಲ್ಲ, ಯೋಚಿಸಿ ಮತ ಚಲಾಯಿಸಿ: ಪ್ರಕಾಶ್ ರೈ

ಬೆಂಗಳೂರು, ಮೇ 12: ಬಿಜೆಪಿಯನ್ನು ಸೋಲಿಸಲೇ ಬೇಕೆಂದು ಜಸ್ಟ್ ಆಸ್ಕಿಂಗ್ ಅಭಿಯಾನ ಪ್ರಾರಂಭಿಸಿರುವ ಪ್ರಕಾಶ್ ರೈ ಅವರು, ಕರ್ನಾಟಕ ವಿಧಾನಸಭೆ ಚುನಾವಣೆಗೆ ತಪ್ಪದೆ ಮತ ಚಲಾಯಿಸುವಂತೆ ಮನವಿ ಮಾಡಿದ್ದಾರೆ.

ಟ್ವಿಟ್ಟರ್ ನಲ್ಲಿ ವಿಡಿಯೋ ಅಪ್‌ಲೋಡ್ ಮಾಡಿರುವ ಪ್ರಕಾಶ್ ರೈ, ನಾವು ಈ ಮುಂಚೆ ಮಾಡಿರುವ ತಪ್ಪುಗಳನ್ನು ತಿದ್ದಿಕೊಳ್ಳುವ ಸಮಯ ಈಗ ಬಂದಿದೆ, ಜಾತಿ ಹೆಸರಲ್ಲಿ, ಹಣ ಪಡೆದು, ನಮ್ಮವ ಎಂಬ ಕಾರಣಕ್ಕೆ ಮತಹಾಕುವ ಪರಿಪಾಠ ಬಿಟ್ಟು ಉತ್ತಮ ಅಭ್ಯರ್ಥಿಗಾಗಿ ಈ ಬಾರಿ ಮತ ಹಾಕೋಣ ಎಂದು ಅವರು ಹೇಳಿದ್ದಾರೆ.

ಚುನಾವಣೆ ಟಿ20 ಪಂದ್ಯವಲ್ಲ, ಸತ್ಯದ ಬಗ್ಗೆ ಯೋಚನೆ ಮಾಡಿ, ಮನಃಸಾಕ್ಷಿಯಿಂದ ಕೆಲ ಕಾಲ ಕೂತು ಸುಮ್ಮನೆ ಯೋಚಿಸಿ ಆ ನಂತರ ನಿರ್ಧಾರ ಮಾಡಿ ಮತಗಟ್ಟೆಗೆ ಹೋಗಿ ಮತ ಚಲಾಯಿಸಿ. ಇದು ಅತ್ಯಂತ ಜವಾಬ್ದಾರಿಯ ವಿಷಯ ಹಾಗಾಗಿ ಆತುರದ ನಿರ್ಧಾರ ಬೇಡ ಎಂದು ಅವರು ಹೇಳಿದ್ದಾರೆ.

ರಜೆ ಇದೆಯೆಂದು ಅಲ್ಲಿ-ಇಲ್ಲಿ ತೆರಳದೆ ತಪ್ಪದೆ ಮತ ಚಲಾಯಿಸಿ ಕರ್ನಾಟಕದ ಭವಿಷ್ಯವನ್ನು ನಿರ್ಧಾರ ಮಾಡಿ, ಉತ್ತಮ ಭವಿಷ್ಯವೇ ನಿಮ್ಮ ಆಯ್ಕೆ ಆಗಿರಲಿ ಎಂದು ಅವರು ಸಂದೇಶ ನೀಡಿದ್ದಾರೆ.

English summary

Prakash Rai request to vote responsibly in this Karnataka assembly elections 2018. He posted a video in his twitter account. he said election is not t20 match think before you vote.