ಹತ್ಯೆದಿನ ಹಂತಕ ಗೌರಿ ಲಂಕೇಶ್ ಮನೆ ಸುತ್ತ 3 ಬಾರಿ ಬಂದು ಹೋಗಿದ್ದ!

ಬೆಂಗಳೂರು, ಸೆಪ್ಟೆಂಬರ್ 13: ಗೌರಿ ಲಂಕೇಶ್ ಹತ್ಯೆಯ ತನಿಖೆ ನಡೆಯುತ್ತಿದ್ದು ಸಿಸಿಟಿವಿ ಫೂಟೇಜ್ ಗಳು ನೀಡಿದ ಸಾಕ್ಷ್ಯಗಳ ಪ್ರಕಾರ ಒಬ್ಬನೇ ಒಬ್ಬ ವ್ಯಕ್ತಿ ಕೊಲೆ ಮಾಡಿದ್ದಾನೆ ಎಂದು ತಿಳಿದು ಬಂದಿದೆ.

ಸಿಸಿಟಿವಿಯಲ್ಲಿ ದಾಖಲಾಗಿರುವ ಬೇರೆ ಬೇರೆ ಕೋನಗಳ ದೃಶ್ಯಾವಳಿಗಳು ಇದನ್ನು ಹೇಳುತ್ತಿವೆ. ಗೌರಿ ಲಂಕೇಶ್ ಹತ್ಯೆಯಾದ ದಿನ ಅಂದರೆ ಸೆಪ್ಟೆಂಬರ್ 5ರಂದು ಬಿಳಿ ಶರ್ಟ್ ಧರಿಸಿ ಹೆಲ್ಮೆಟ್ ಹಾಕಿಕೊಂಡಿದ್ದ ಹಂತಕ ಮೂರು ಬಾರಿ ಅವರ ಮನೆ ಬಳಿ ಬಂದು ಹೋಗಿದ್ದ.

3.15 ನಿಮಿಷಕ್ಕೆ ಆತ ಮೊದಲ ಬಾರಿಗೆ ಮನೆ ಪಕ್ಕ ಬಂದಿದ್ದ. ಮೂರು ಬಾರಿಯೂ ಆತ ಬೈಕ್ ನಲ್ಲೇ ಬಂದಿದ್ದು. ಮೂರನೇ ಬಾರಿಗೆ ಆತ ಬರುವಾಗ ಆತನ ಜತೆಗೊಂದು ಬ್ಯಾಗ್ ಇತ್ತು. ಇದರಲ್ಲಿ ಆತ ಬಂದೂಕು ಅಡಗಿಸಿಟ್ಟುಕೊಂಡಿರಬಹುದು ಎಂದು ಪೊಲೀಸರು ಅಂದಾಜಿಸಿದ್ದಾರೆ.

ಇದೇ ವೇಳೆ ಪ್ರಕರಣಕ್ಕೆ ಸಂಬಂಧಿಸಿದ ಹಲವಾರು ವ್ಯಕ್ತಿಗಳನ್ನು ವಿಶೇಷ ತನಿಖಾ ತಂಡ ವಿಚಾರಣೆ ನಡೆಸುತ್ತಿದೆ. ಆದರೆ ಇಲ್ಲಿಯವರೆಗೆ ಯಾರನ್ನೂ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಂಧಿಸಿಲ್ಲ.

ಹಲವು ಕೋನಗಳಿಂದ ಪ್ರಕರಣವನ್ನು ತನಿಖೆ ನಡೆಸಲಾಗುತ್ತಿದೆ. ಸುಳಿವುಗಳು, ವಿಧಿ ವಿಜ್ಞಾನ ಪ್ರಯೋಗಾಲಯದ ವರದಿ ಎಲ್ಲವನ್ನೂ ಪಡೆದುಕೊಂಡು ತನಿಖೆಯಲ್ಲಿ ಬಳಸಿಕೊಳ್ಳಲಾಗುತ್ತಿದೆ.

ಗೌರಿ ಲಂಕೇಶ್ ಕೊಲೆ ಮಾಡಿದ ವ್ಯಕ್ತಿ ಒಟ್ಟು ನಾಲ್ಕು ಬುಲೆಟ್ ಗಳನ್ನು ಶೂಟ್ ಮಾಡಿದ್ದ. ಇದರಲ್ಲಿ ಮೂರು ಆಕೆಯ ದೇಹವನ್ನು ಹೊಕ್ಕರೆ ಒಂದು ಮಾತ್ರ ಮಿಸ್ ಆಗಿ ಗೋಡೆಗೆ ಬಡಿದಿತ್ತು ಎಂಬುದು ತನಿಖೆ ವೇಳೆ ತಿಳಿದು ಬಂದಿದೆ.

English summary

The investigations being conducted into the Gauri Lankesh murder case increasingly suggests that there could have been just one assailant. The various angles captured by the CCTV footage suggests that the killer was alone.