ಕೊರೊನಾ ಕರಿನೆರಳು: ಸೋಂಕಿತರ ಸಂಖ್ಯೆಯಲ್ಲಿ ಚೀನಾ ಮೀರಿಸಿದ ಅಮೇರಿಕಾ!

Updated: Friday, March 27, 2020, 9:58 [IST]

ಮಾರಣಾಂತಿಕ ಕೊರೊನಾ ವೈರಸ್ ಮೊದಲು ಕಾಣಿಸಿಕೊಂಡಿದ್ದು ವುಹಾನ್ ನಗರದಲ್ಲಿ. ಡೆಡ್ಲಿ ಕೊರೊನಾ ವೈರಸ್ ನಿಂದ ಮೊದಲು ಜರ್ಜರಿತವಾದ ರಾಷ್ಟ್ರ ಚೀನಾ. ಆದ್ರೀಗ, ಇದೇ ಕೊರೊನಾ ವೈರಸ್ ನಿಂದ ಇಟಲಿ ಮತ್ತು ಯು.ಎಸ್.ಎ ಹೆಣಗಾಡುತ್ತಿದೆ. ಯಾಕಂದ್ರೆ, ಕೋವಿಡ್-19 ನಿಂದಾಗಿ ಚೀನಾಗಿಂತ ಇಟಲಿಯಲ್ಲಿ ಸಾವಿನ ಪ್ರಮಾಣ ಜಾಸ್ತಿಯಿದ್ದರೆ, ಚೀನಾಗಿಂತ ಯು.ಎಸ್.ಎ ನಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಹೆಚ್ಚಳವಾಗಿದೆ.

ಕೊರೊನಾ ವೈರಸ್ ಬಗ್ಗೆ ಆರಂಭಿಕ ನಿರ್ಲಕ್ಷ್ಯ ವಹಿಸಿದ್ದ ಪರಿಣಾಮ, ಯು.ಎಸ್.ಎ ನಲ್ಲಿ ದಿನದಿಂದ ದಿನಕ್ಕೆ ಸೋಂಕಿತರ ಸಂಖ್ಯೆ ಮತ್ತು ಮರಣ ಪ್ರಮಾಣ ಏರುಗತಿಯಲ್ಲಿ ಸಾಗುತ್ತಿದೆ.

ಇಲ್ಲಿಯವರೆಗೆ ಚೀನಾದಲ್ಲಿ 81,340 ಮಂದಿಗೆ ಕೊರೊನಾ ಸೋಂಕು ತಗುಲಿದೆ. ಚೀನಾಗಿಂತ ಯು.ಎಸ್.ಎ ನಲ್ಲಿ ಸೋಂಕು ವ್ಯಾಪಕವಾಗಿದ್ದು, 85,435 ಮಂದಿ ಕೋವಿಡ್-19 ನಿಂದ ಬಳಲುತ್ತಿದ್ದಾರೆ. ಆ ಮೂಲಕ ಕೊರೊನಾ ಸೋಂಕಿತರ ಪಟ್ಟಿಯಲ್ಲಿ ಚೀನಾ ದೇಶವನ್ನು ಹಿಂದಕ್ಕೆ ತಳ್ಳಿ ಯು.ಎಸ್.ಎ ಮೊದಲ ಸ್ಥಾನಕ್ಕೇರಿದೆ.

ಯು.ಎಸ್.ಎ ಅಂಕಿ-ಅಂಶ

ಯು.ಎಸ್.ಎ ನಲ್ಲಿ ಇಲ್ಲಿಯವರೆಗೂ 85,435 ಮಂದಿಗೆ ಕೊರೊನಾ ಸೋಂಕು ತಗುಲಿದೆ. ಅದರಲ್ಲಿ ಈಗಾಗಲೇ 1295 ಮಂದಿ ಮೃತಪಟ್ಟಿದ್ದಾರೆ. 1868 ಮಂದಿ ಗುಣಮುಖರಾಗಿದ್ದು, 2,122 ಮಂದಿಯ ಪರಿಸ್ಥಿತಿ ಚಿಂತಾಜನಕವಾಗಿದೆ.

81,000 ಮಂದಿ ಸಾವನ್ನಪ್ಪಬಹುದು.?

ಅಧ್ಯಯನವೊಂದರ ಪ್ರಕಾರ, ಕೊರೊನಾ ವೈರಸ್ ಸೋಂಕಿನಿಂದ ಯು.ಎಸ್.ಎ ನಲ್ಲಿ ಇನ್ನು ನಾಲ್ಕು ತಿಂಗಳಲ್ಲಿ 81,000 ಕ್ಕೂ ಅಧಿಕ ಮಂದಿ ಸಾವನ್ನಪ್ಪಬಹುದು. ಯೂನಿವರ್ಸಿಟಿ ಆಫ್ ವಾಷಿಂಗ್ಟನ್ ಸ್ಕೂಲ್ ಆಫ್ ಮೆಡಿಸಿನ್ ಕೈಗೊಂಡ ಡೇಟಾ ಅನಾಲಿಸಿಸ್ ಪ್ರಕಾರ, ಏಪ್ರಿಲ್ ಎರಡನೇ ವಾರದ ಹೊತ್ತಿಗೆ ಆಸ್ಪತ್ರೆಗೆ ದಾಖಲಾಗುವವರ ಸಂಖ್ಯೆ ಹೆಚ್ಚಾಗಲಿದ್ದು, ಜೂನ್ ಮತ್ತು ಜುಲೈ ವೇಳೆಯಲ್ಲಿ ಹೆಚ್ಚು ಸಾವು ಸಂಭವಿಸಲಿದೆ.