Breaking: ಉತ್ತರ ಕ್ಯಾಲಿಫೋರ್ನಿಯಾದಲ್ಲಿ 6.4 ತೀವ್ರತೆ ಭೂಕಂಪ

Published: Wednesday, December 21, 2022, 7:43 [IST]

ಕ್ಯಾಲಿಫೋರ್ನಿಯಾ, ಡಿಸೆಂಬರ್ 21: ಉತ್ತರ ಕ್ಯಾಲಿಫೋರ್ನಿಯಾ ಮಂಗಳವಾರ ಮುಂಜಾನೆ ಪ್ರಬಲ ಭೂಕಂಪ ಸಂಭವಿಸಿದೆ. ಇದರಿಂದ ವಿದ್ಯುತ್ ಕಡಿತಗೊಂಡು ಸಾವಿರಾರು ಮನೆಗಳಿಗೆ ಹಾನಿಯಾಗಿದೆ. ಭೂಕಂಪನದ ಪ್ರಭಾವದಿಂದ ಹಲವು ರಸ್ತೆಗಳು ಕೂಡ ಒಡೆದು ಹೋಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಭೂಕಂಪದ ತೀವ್ರತೆಯು 6.4ರಷ್ಟಿದೆ ಮತ್ತು 2:34ಕ್ಕೆ ಫೆರ್ನ್‌ಡೇಲ್ ಬಳಿ ಸಂಭವಿಸಿದೆ, ಸ್ಯಾನ್ ಫ್ರಾನ್ಸಿಸ್ಕೋದ ವಾಯುವ್ಯಕ್ಕೆ 210 ಮೈಲುಗಳು (345 ಕಿಲೋಮೀಟರ್) ಮತ್ತು ಪೆಸಿಫಿಕ್ ಕರಾವಳಿಗೆ ಹತ್ತಿರದಲ್ಲಿ ಭೂಕಂಪನದ ಕೇಂದ್ರಬಿಂದುವಿದೆ. ಈ ಭೂಕಂಪನದಲ್ಲಿ ಸದ್ಯಕ್ಕೆ ಯಾವುದೇ ಸಾವು-ನೋವಿನ ಬಗ್ಗೆ ವರದಿಯಾಗಿಲ್ಲ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಉತ್ತರ ಕ್ಯಾಲಿಫೋರ್ನಿಯಾದಲ್ಲಿ ನಡೆದ ಭೂಕಂಪನಿಂದ ಸಾರ್ವಜನಿಕರು ತತ್ತರಿಸಿ ಹೋಗಿದ್ದಾರೆ. ಮನೆಗಳಿಗೆ ಹಾನಿಯಾಗಿದ್ದು, ಭೂಕಂಪದ ಭಯದಲ್ಲಿಯೇ ಕಾಲ ಕಳೆಯುವಂತಹ ಪರಿಸ್ಥಿತಿ ನಿರ್ಮಾಣವಾಗಿ ಬಿಟ್ಟಿದೆ. ಈ ಮಧ್ಯೆ ಕೆಲವರು ಭೂಕಂಪನದಿಂದ ತಮ್ಮ ಮನೆಗಳಲ್ಲಿ ಸೃಷ್ಟಿಯಾಗಿರುವ ಹಾನಿಯ ಕುರಿತಾದ ವಿಡಿಯೋಗಳನ್ನು ಸೋಷಿಯಲ್ ಮೀಡಿಯಾಗಳಲ್ಲಿ ಪೋಸ್ಟ್ ಮಾಡಿದ್ದಾರೆ. ಉತ್ತರ ಕ್ಯಾಲಿಫೋರ್ನಿಯಾದಲ್ಲಿ ಭೂಕಂಪನದ ಎಫೆಕ್ಟ್ ಹೇಗಿತ್ತು ಎಂಬುದನ್ನು ಈ ವಿಡಿಯೋಗಳು ಹೇಳುತ್ತವೆ.

ಭೂಕಂಪದ ಎಚ್ಚರಿಕೆ ನೀಡಿದ ಹಂಬೋಲ್ಟ್ ಕೌಂಟಿ ಶೆರಿಫ್ ಕಚೇರಿ

"ತೀವ್ರ ಭೂಕಂಪದಿಂದಾಗಿ, ಹಂಬೋಲ್ಟ್ ಕೌಂಟಿಯಾದ್ಯಂತ ರಸ್ತೆಗಳು ಮತ್ತು ಮನೆಗಳಿಗೆ ವ್ಯಾಪಕ ಹಾನಿ ವರದಿಯಾಗಿದೆ. ನಂತರದ ಆಘಾತಗಳಿಗೆ ಸಿದ್ಧರಾಗಿರಿ. ಹಾನಿ ಅಥವಾ ಸೋರಿಕೆಗಾಗಿ ಅನಿಲ ಮತ್ತು ನೀರಿನ ಮಾರ್ಗಗಳನ್ನು ಪರಿಶೀಲಿಸಿ, "ಎಂದು ಹಂಬೋಲ್ಟ್ ಕೌಂಟಿ ಶೆರಿಫ್ ಕಚೇರಿ ಟ್ವೀಟ್ ಮಾಡಿದೆ.

ಸುನಾಮಿ ಬಗ್ಗೆ ಯಾವುದೇ ನಿರೀಕ್ಷೆಯಿಲ್ಲ

"ಯಾವುದೇ ಸುನಾಮಿಯನ್ನು ನಿರೀಕ್ಷಿಸಲಾಗಿಲ್ಲ. ಫೋರ್ಚುನಾದಿಂದ 14 ಮೈಲಿ ದೂರದಲ್ಲಿ 6.4 ತೀವ್ರತೆಯ ಭೂಕಂಪನ ಸಂಭವಿಸಿದೆ. ಈ ಜಿಲ್ಲೆಯಾದ್ಯಂತ ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ. ನೀವು ತಕ್ಷಣದ ತುರ್ತು ಪರಿಸ್ಥಿತಿಯನ್ನು ಅನುಭವಿಸದ ಹೊರತು 911ಗೆ ಕರೆ ಮಾಡಬೇಡಿ," ಎಂದು ಹಂಬೋಲ್ಟ್ ಕೌಂಟಿ ಶೆರಿಫ್ ಕಚೇರಿಯ ಮತ್ತೊಂದು ಟ್ವೀಟ್‌ನಲ್ಲಿ ಹೇಳಿದೆ.

70,000 ಗ್ರಾಹಕರಿಗೆ ಇಲ್ಲ ವಿದ್ಯುತ್ ಸಂಪರ್ಕ

ಫರ್ಂಡೇಲ್‌ನಲ್ಲಿ ಹಾನಿಯನ್ನು ತೋರಿಸುತ್ತಿದ್ದ ಪ್ರಮುಖ ಸೇತುವೆಯನ್ನು ಅಧಿಕಾರಿಗಳು ಮುಚ್ಚಿದ್ದಾರೆ ಎಂದು ಕೆಆರ್‌ಸಿಆರ್-ಟಿವಿ ವರದಿ ಮಾಡಿದೆ. ಕೆಲವು ಕಡೆಗಳಲ್ಲಿ ಅನಿಲ ಸೋರಿಕೆಯೂ ಆಗಿರುವ ಬಗ್ಗೆ ವರದಿಯಾಗಿದೆ. poweroutage.us ಪ್ರಕಾರ, ಈ ಪ್ರದೇಶದಲ್ಲಿ 70,000 ಕ್ಕೂ ಹೆಚ್ಚು ಗ್ರಾಹಕರು ವಿದ್ಯುತ್ ಸಂಪರ್ಕವನ್ನು ಕಳೆದುಕೊಂಡಿದ್ದಾರೆ.

That was a big one. Power is now out in #ferndaleca. House is a mess. #earthquake pic.twitter.com/YEmcv1Urhp
— Caroline Titus (@caroline95536) December 20, 2022

ಭೂಕಂಪನದ ಎಫೆಕ್ಟ್ ಹೀಗಿತ್ತು ನೋಡಿ!

ಫರ್ಂಡೇಲ್‌ನ ನಿವಾಸಿ ಕ್ಯಾರೋಲಿನ್ ಟೈಟಸ್ ತನ್ನ ಕತ್ತಲೆಯಾದ ಮನೆಯಲ್ಲಿ ಪೀಠೋಪಕರಣಗಳು ಮತ್ತು ಭಕ್ಷ್ಯಗಳನ್ನು ಒಡೆದುಹಾಕಿದ ವೀಡಿಯೊವನ್ನು ಟ್ವೀಟ್ ಮಾಡಿದ್ದಾರೆ. "ನಮ್ಮ ಮನೆ 140 ವರ್ಷ ವಯಸ್ಸಿನ ವಿಕ್ಟೋರಿಯನ್ ಆಗಿದೆ. ಉತ್ತರ/ದಕ್ಷಿಣ ಭೂಕಂಪನದಿಂದ ಬಿದ್ದದ್ದರಲ್ಲಿ ಸ್ಪಷ್ಟವಾಗಿ ಕಂಡುಬರುತ್ತದೆ, "ಎಂದು ಅವರು ಟ್ವೀಟ್ ಮಾಡಿದ್ದಾರೆ. ಸ್ಯಾನ್ ಫ್ರಾನ್ಸಿಸ್ಕೊ ಕೊಲ್ಲಿ ಪ್ರದೇಶದಲ್ಲಿ 3.6 ತೀವ್ರತೆಯ ಭೂಕಂಪ ಸಂಭವಿಸಿದ ಕೆಲವೇ ದಿನಗಳ ನಂತರ ಈ ಭೂಕಂಪ ಸಂಭವಿಸಿದೆ. ಕಳೆದ ಶನಿವಾರ ಮುಂಜಾನೆ 4 ಗಂಟೆಯ ಮೊದಲು ಸಾವಿರಾರು ಜನರು ಮುನ್ನೆಚ್ಚರಿಕೆ ವಹಿಸಿದ್ದರಿಂದ ಹಾನಿಯ ಪ್ರಮಾಣ ಚಿಕ್ಕದಾಗಿದೆ.

Published On December 21, 2022